ಹಾಸನ ರೇವಣ್ಣನ ಸಾಮ್ರಾಜ್ಯನಾ? ಜೆ.ಸಿ. ಮಾಧುಸ್ವಾಮಿ ಟಾಂಗ್

ತುಮಕೂರು: ಹಾಸನ ಕರ್ನಾಟಕ ರಾಜ್ಯದ ಒಳಗಡೆ ಇದೆ. ಹಾಸನವನ್ನು ಯಾರಿಗೂ ಬರೆದು ಕೊಟ್ಟಿಲ್ಲ. ಅದು ರೇವಣ್ಣನ ಸಾಮ್ರಾಜ್ಯವಲ್ಲ ಎಂದು ಕಾನೂನು ಮತ್ತು ಸಂಸದೀಯ ವ್ಯವಹಾರಗಳ ಹಾಗೂ ಸಣ್ಣ ನೀರಾವರಿ ಸಚಿವ ಜೆ.ಸಿ.ಮಾಧುಸ್ವಾಮಿ ಮಾಜಿ ಸಚಿವ ಎಚ್.ಡಿ. ರೇವಣ್ಣಗೆ ಟಾಂಗ್ ನೀಡಿದರು.

‘ಹಾಸನದಲ್ಲಿ ಎಚ್.ಡಿ. ರೇವಣ್ಣ ಎಲ್ಲಾ ವಿಷಯದಲ್ಲೂ ಹೆಚ್ಚು ಹಸ್ತಕ್ಷೇಪ ಮಾಡುತ್ತಿದ್ದಾರೆ’ ಎಂಬ ಸುದ್ದಿಗಾರರ ಪ್ರಶ್ನೆಗೆ ಗುರುವಾರ ಉತ್ತರಿಸಿದ ಅವರು, “ತುಮಕೂರಿಗಿಂತ ಹಾಸನ ತುಂಬಾ ಚೆನ್ನಾಗಿಯೇ ಇದೆ. ಹಾಸನವನ್ನು ರೈಲ್ವೆ ಹಳಿಯ ಮೇಲೆ ತರುವ ಸಾಮರ್ಥ್ಯ ತಮಗೆ ಇದೆ ಅಂತ ಹಾಸನ ಜಿಲ್ಲೆಯ ಉಸ್ತುವಾರಿಯನ್ನಾಗಿ ನೇಮಿಸಿದ್ದಾರೆ. ಅಧಿಕಾರಿಗಳು ನನ್ನ ಮಾತು ಕೇಳಬೇಕು ಅನ್ನೋ ಆಕ್ಷೇಪ ಮಾಡುವ ರಾಜಕಾರಣಿ ನಾನಲ್ಲ,” ಎಂದು ಎಚ್.ಡಿ. ರೇವಣ್ಣ ಅವರಿಗೆ ಪರೋಕ್ಷವಾಗಿ ಎಚ್ಚರಿಕೆ ನೀಡಿದರು.

ಸರಕಾರ ದಿವಾಳಿಯಾಗಿದ್ದರೆ ಅದನ್ನಾದರೂ ಘೋಷಣೆ ಮಾಡಿ: ರೇವಣ್ಣ ಆಕ್ರೋಶ

ಕಷ್ಟ ಪಡೋಕೆ ಸಚಿವ ಆಗಿರೋದು

ಸಚಿವ ಸ್ಥಾನದ ಜತೆಗೆ ಒಬ್ಬೊಬ್ಬರಿಗೆ ಎರಡೆರಡು ಜಿಲ್ಲೆಯ ಉಸ್ತುವಾರಿ ಸಚಿವರನ್ನಾಗಿ ನೇಮಿಸಲಾಗಿದೆ. ಇದರಿಂದ ಒತ್ತಡ ಉಂಟಾಗುವುದಿಲ್ಲವೇ ಎಂಬ ಪ್ರಶ್ನೆಗೆ, 'ತಾವು ಕಷ್ಟ ಪಡೋಕೆ ಸಚಿವರಾಗಿರುವುದು.‌ ತಮ್ಮ ಅಧಿಕಾರವಧಿಯಲ್ಲಿ ಸಾಧ್ಯವಾದಷ್ಟು ಮಟ್ಟಿಗೆ ಕೆಲಸ ಮಾಡುತ್ತೇವೆ. ತಮಗೆ ಯಾವುದೇ ಒತ್ತಡವಾಗುವುದಿಲ್ಲ,' ಎಂದು ಸಮರ್ಥಿಸಿಕೊಂಡರು.