ತುಮಕೂರು: ನರೇಗಾ ಯೋಜನೆಯಡಿ 891 ಮಾನವ ದಿನಗಳ ಸೃಜನೆ

ತುಮಕೂರು: ಜಿಲ್ಲೆಯ ಬರಪೀಡಿತ ತಾಲೂಕುಗಳಲ್ಲಿ ಕೊರಟಗೆರೆ ತಾಲೂಕು ಒಂದಾಗಿದೆ. ಇಲ್ಲಿನ ಹುಲಿಕುಂಟೆ ಗ್ರಾಪಂ ವ್ಯಾಪ್ತಿಯ ಹುಲಿಕುಂಟೆಯ ಚಿಕ್ಕಕೆರೆಯಲ್ಲಿ ಹೂಳೆತ್ತುವ ಕಾಮಗಾರಿ ಕೈಗೊಂಡಿದ್ದು, ಈವರೆಗೆ 891 ಮಾನವ ದಿನಗಳ ಸೃಜನೆಯಾಗಿದೆ ಎಂದು ಜಿಪಂ ಸಿಇಒ ಶುಭಾ ಕಲ್ಯಾಣ್‌ ತಿಳಿಸಿದ್ದಾರೆ.

ಚಿಕ್ಕಕೆರೆಯಲ್ಲಿ ಸುಮಾರು 2.50 ಲಕ್ಷ ರೂ. ವೆಚ್ಚದಲ್ಲಿ ಹೂಳೆತ್ತುವ ಕಾಮಗಾರಿ ಪ್ರಗತಿಯಲ್ಲಿದ್ದು, ಈ ಕೆರೆ ಹೂಳೆತ್ತುವ ಕಾಮಗಾರಿಯಲ್ಲಿ ಗ್ರಾಮದ ನೂರಾರು ಕುಟುಂಬಗಳು ಭಾಗವಹಿಸಿ, ಉದ್ಯೋಗ ಕಂಡುಕೊಂಡಿವೆ. ಕೆರೆ ಹೂಳೆತ್ತುವ ಕಾಮಗಾರಿಯಲ್ಲಿ 2.45 ಲಕ್ಷ ರೂ. ಕೂಲಿ ವೆಚ್ಚವಾಗಿದ್ದು, 5,000 ರೂಪಾಯಿ ಸಾಮಗ್ರಿ ವೆಚ್ಚವಾಗಿರುತ್ತದೆ.

ಈ ಕಾಮಗಾರಿಯಿಂದಾಗಿ 100ಕ್ಕೂ ಹೆಚ್ಚು ಕುಟುಂಬಗಳಿಗೆ ನರೇಗಾ ಯೋಜನೆ ವರದಾನವಾಗಿದೆ. ಕೊರಟಗೆರೆ ತಾಲೂಕು ಬರಪೀಡಿತ ತಾಲೂಕುಗಳಲ್ಲಿ ಒಂದಾಗಿದೆ. ಇಂದು ಅಥವಾ ನಾಳೆ ಉತ್ತಮ ಮಳೆ ಆಗಬಹುದು ಎಂಬ ನಿರೀಕ್ಷೆ ಇಲ್ಲಿನ ಗ್ರಾಮಸ್ಥರದ್ದು. ಕಳೆದ ವಾರದಿಂದಲೂ ತಾಲೂಕಿನಲ್ಲಿ ಮೋಡ ಕವಿದ ವಾತಾವರಣವಿದ್ದರೂ ಸಹ ಮಳೆ ಆಗಿರುವುದಿಲ್ಲ. ಇಂದಲ್ಲ ನಾಳೆ ಮಳೆ ಆಗುತ್ತದೆ ಎಂಬ ಆಸೆಯಿಂದಲೇ ಗ್ರಾಮಸ್ಥರು ಮಹಾತ್ಮ ಗಾಂಧಿ ನರೇಗಾ ಯೋಜನೆಯಡಿ ಕೆರೆ ಹೂಳೆತ್ತುವ ಕಾಮಗಾರಿಯಲ್ಲಿ ಭಾಗವಹಿಸಿದ್ದಾರೆ ಎಂದು ಗ್ರಾಪಂ ಸದಸ್ಯ ಶಿವಕುಮಾರ್‌ ಅಭಿಪ್ರಾಯಪಟ್ಟಿದ್ದಾರೆ.