ತುಮಕೂರಿನಲ್ಲಿ ಮೊಹರಂ ಆಚರಣೆ

ತುಮಕೂರು: ನಗರ ಸೇರಿದಂತೆ ಜಿಲ್ಲೆಯ ವಿವಿಧೆಡೆ ಮುಸ್ಲೀಮರ ಪವಿತ್ರ ಹಬ್ಬಗಳಲ್ಲಿ ಒಂದಾದ ಮೊಹರಂ ಹಬ್ಬವನ್ನು ಶುಕ್ರವಾರ ಅತ್ಯಂತ ಶ್ರದ್ಧಾ ಭಕ್ತಿಯಿಂದ ಆಚರಿಸಲಾಯಿತು.

ಪ್ರತಿ ವರ್ಷದಂತೆ ಈ ಬಾರಿಯೂ ಮುಸ್ಲೀಮ್‌ ಸಂಪ್ರದಾಯದಂತೆ ಬಾಬಯ್ಯನ ಗುಡಿ ಮುಂಭಾಗ ಹಾಕುವ ಅಗ್ನಿಕೊಂಡಕ್ಕೆ ಹಿಂದೂಗಳು ಸೇರಿದಂತೆ ಮುಸ್ಲೀಮ್‌ ಮಹಿಳೆಯರು, ಮಕ್ಕಳಾದಿಯಾಗಿ ಮಾಡಿಕೊಂಡಿದ್ದ ಹರಕೆ ತೀರಿಸಲು ನಮಸ್ಕರಿಸಿ ಬಾಬಯ್ಯನ ಆಶೀರ್ವಾದ ಪಡೆದರು.

ಮೊಹರಂ ಕಡೇ ದಿನದ ಅಂಗವಾಗಿ ಮುಂಜಾನೆ ನಗರದ ಚಿಕ್ಕಪೇಟೆಯಲ್ಲಿರುವ ಜೋಡಿ ಬಾಬಯ್ಯ ಸ್ಥಳದಲ್ಲಿ ಮುಸ್ಲೀಮರ ಸಂಪ್ರದಾಯದ ಪ್ರಕಾರ ಪೂಜಾ ಕಾರ್ಯಗಳನ್ನು ನೆರವೇರಿಸಲಾಯಿತು. ಬೆಳಗ್ಗೆ 8 ಗಂಟೆ ಸುಮಾರಿಗೆ ಜಿಸಿಆರ್‌ ಕಾಲೋನಿ ಸೇರಿದಂತೆ ವಿವಿಧ ಬಡಾವಣೆಗಳಿಂದ ಮೊಹರಂ ಹಬ್ಬದ ಅಂಗವಾಗಿ ಹಮ್ಮಿಕೊಂಡಿದ್ದ ಬಾಬಯ್ಯ ಮತ್ತು ಥಾಬೂತ್‌ ದೇವರ ಮೆರವಣಿಗೆಯು ಮಂಡಿಪೇಟೆ ಸರ್ಕಲ್‌ನಲ್ಲಿ ಸಮಾವೇಶಗೊಂಡಿತು. ಮೆರವಣಿಗೆಯಲ್ಲಿ ಮಹಿಳೆಯರು, ಮಕ್ಕಳು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು ಬಾಬಯ್ಯನ ಕೃಪೆಗೆ ಪಾತ್ರರಾದರು.