ಜೋಗ ಜಲಪಾತಕ್ಕೆ ರಾಜಹಂಸ ಕಾರ್ಯಾಚರಣೆ ಆರಂಭ

ತುಮಕೂರು: ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ವಿಶ್ವ ವಿಖ್ಯಾತ ಜೋಗ ಜಲಪಾತದ ವೀಕ್ಷಣೆಗೆ ವಿಶೇಷ ಪ್ಯಾಕೇಜ್‌ ಕಾರ್ಯಕ್ರಮದಡಿ ರಾಜಹಂಸ ಹಾಗೂ ವೇಗದೂತ ಸಾರಿಗೆ ಕಾರ್ಯಾಚರಣೆಯನ್ನು ಪ್ರಾರಂಭಿಸಲಾಗಿದೆ ಎಂದು ನಿಗಮದ ವಿಭಾಗೀಯ ನಿಯಂತ್ರಣಾಧಿಕಾರಿ ತಿಳಿಸಿದ್ದಾರೆ.

ಈ ವಿಶೇಷ ಪ್ಯಾಕೇಜ್‌ನಡಿ ಆ.7ರಿಂದ ಪ್ರತಿ ಶನಿವಾರ ಮತ್ತು ಭಾನುವಾರ ಜಲಪಾತದ ವೀಕ್ಷಣೆಗೆ ಸಾರಿಗೆ ಸೌಲಭ್ಯ ಕಲ್ಪಿಸಲಾಗಿದೆ. ಆಸಕ್ತರು ಕರಾರಸಾ ನಿಗಮದ ಅವತಾರ್‌ ತಂತ್ರಾಂಶದಲ್ಲಿ ಮುಂಗಡವಾಗಿ ಟಿಕೆಟ್‌ ಕಾಯ್ದಿರಿಸಿಕೊಂಡು ಪ್ರವಾಸ ಕೈಗೊಳ್ಳಬಹುದಾಗಿದೆ. ವೇಗದೂತ ಪ್ರಯಾಣ ದರವನ್ನು ವಯಸ್ಕರಿಗೆ 650 ರೂ. ಹಾಗೂ 6-12 ವರ್ಷದೊಳಗಿನ ಮಕ್ಕಳಿಗೆ 400 ರೂ., ರಾಜಹಂಸ ಪ್ರಯಾಣ ದರವನ್ನು ವಯಸ್ಕರಿಗೆ 850 ರೂ. ಹಾಗೂ 6-12 ವರ್ಷದೊಳಗಿನ ಮಕ್ಕಳಿಗೆ 600 ರೂ.ಗಳನ್ನು ನಿಗದಿಪಡಿಸಲಾಗಿದೆ.

ವೇಗದೂತ ಸಾರಿಗೆಯು ತುಮಕೂರಿನಿಂದ ಬೆಳಗ್ಗೆ 6 ಗಂಟೆಗೆ ನಿರ್ಗಮಿಸಿ ಸಾಗರ, ವರದ ಮೂಲ, ಇಕ್ಕೇರಿ, ಜೋಗ ಜಲಪಾತಕ್ಕೆ ಮಧ್ಯಾಹ್ನ 2.45 ಗಂಟೆಗೆ ತಲುಪಿ ಸಂಜೆ 5.30 ಗಂಟೆಗೆ ಜೋಗ ಜಲಪಾತದಿಂದ ಹೊರಟು ಮಧ್ಯರಾತ್ರಿ 12.45 ಗಂಟೆಗೆ ತುಮಕೂರಿಗೆ ಮರಳಿ ಬರಲಿದೆ. ಇದೇ ಮಾರ್ಗದಲ್ಲಿ ರಾಜಹಂಸ ಸಾರಿಗೆಯು ತುಮಕೂರಿನಿಂದ ಬೆಳಗ್ಗೆ 6 ಗಂಟೆಗೆ ನಿರ್ಗಮಿಸಿ ಮಧ್ಯಾಹ್ನ 2.15 ಗಂಟೆಗೆ ಜೋಗ ತಲುಪಿ ಜೋಗದಿಂದ ಸಂಜೆ 5.30 ಗಂಟೆಗೆ ಜೋಗ ಜಲಪಾತದಿಂದ ಹೊರಟು ಮಧ್ಯರಾತ್ರಿ 12.15 ಗಂಟೆಗೆ ತುಮಕೂರಿಗೆ ಮರಳಿ ಬರಲಿದೆ ಎಂದು ಅವರು ತಿಳಿಸಿದ್ದಾರೆ.