ತಿಪಟೂರು:
ಚುನಾವಣೆ ವರ್ಷದಲ್ಲಿ ಇಂದು ರಾಜ್ಯಾದ್ಯಂತ ಎಲ್ಲಾ ಪಕ್ಷ ಗಳು, ರಾಜಕಾರಣಿಗಳು, ರಾಜ್ಯ ಸರಕಾರ ವೋಟಿನ ಸ್ವಾರ್ಥಕ್ಕಾಗಿ ಇಂದಿರಾ ಕ್ಯಾಂಟೀನ್, ಅಪ್ಪಾಜಿ ಕ್ಯಾಂಟೀನ್, ರಮ್ಯಾ ಕ್ಯಾಂಟೀನ್... ಹೀಗೆ ಊಟದ ಆಮಿಷವೊಡ್ಡಿ ಎಲ್ಲಾ ಕಡೆ ವೋಟಿನ ಊಟ ಹಾಕುತ್ತಿದ್ದಾರೆ.
ಆದರೆ ಇದಕ್ಕೆ ತದ್ವಿರುದ್ಧವಾಗಿ ತಾಲೂಕಿನ ಸ್ತ್ರೀಶಕ್ತಿ ಒಕ್ಕೂಟದಿಂದ ಯಾವುದೇ ಸ್ವಾರ್ಥವಿಲ್ಲದೆ ಆಸ್ಪತ್ರೆಯ ಆವರಣದಲ್ಲಿ ಬಡ ರೋಗಿಗಳಿಗೆ, ಸಿಬ್ಬಂದಿಗಳಿಗೆ, ಪೋಷಣೆ ಮಾಡುವವರಿಗೆ, ರಿಯಾಯಿತಿ ದರದಲ್ಲಿ ಹಣ್ಣು, ಬ್ರೆಡ್, ಊಟ, ತಿಂಡಿ, ಕಾಫಿ, ವಿತರಿಸಲು ಕ್ಯಾಂಟೀನ್ಅನ್ನು ಮಹಿಳಾ ದಿನಾಚರಣೆ ಅಂಗವಾಗಿ ಗುರುವಾರ ಉದ್ಘಾಟಿಸಲಾಯಿತು.
ತಾಲೂಕಿನಲ್ಲಿ ಸುಮಾರು 1066 ಸ್ತ್ರೀ ಶಕ್ತಿ ಗುಂಪುಗಳಿದ್ದು ಎಲ್ಲವನ್ನು ಸೇರಿಸಿ ಒಕ್ಕೂಟ ರಚಿಸಲಾಗಿದೆ. ಸಹಕಾರ ಸಂಘದ ರೀತಿ ಇಲಾಖೆಯಿಂದ ಒಬ್ಬ ಮೇಲ್ವಿಚಾರಕಿಯನ್ನು ಕಾರ್ಯದರ್ಶಿಯಾಗಿ ನೇಮಕ ಮಾಡಲಾಗಿದೆ. 2015-16ರಲ್ಲಿ ತಾಲೂಕು ಸ್ತ್ರೀಶಕ್ತಿ ಒಕ್ಕೂಟ ರಾಜ್ಯದಲ್ಲೇ ಅತ್ಯುತ್ತಮ ಪ್ರಶಸ್ತಿ ಪಡೆದಿದೆ. ಇದೇ ಆತ್ಮವಿಶ್ವಾಸದಿಂದ ಇಲ್ಲಿನ ಮಹಿಳೆಯರು ಸಮಾಜಕ್ಕೆ ಏನಾದರು ಕೊಡುಗೆ ನೀಡಬೇಕು ಎಂದು ಕ್ಯಾಂಟೀನ್ ಆರಂಭಿಸಿದ್ದಾರೆ.
ಆಸ್ಪತ್ರೆಯ ಆವರಣದಲ್ಲಿದ್ದ, ಟೆಂಡರ್ ಪ್ರೋಸಸ್ ಮಾಡಬೇಕಿದ್ದ ಮಳಿಗೆಯನ್ನು ಶಾಸಕರು ಮಹಿಳೆಯರ ಸ್ವಾವಲಂಬನೆಗಾಗಿ ಎಂದು ಇದನ್ನು ಒಕ್ಕೂಟಕ್ಕೆ ಉಚಿತವಾಗಿ ಕೊಟ್ಟಿದ್ದಾರೆ. ಇಲ್ಲಿನ ಸ್ವಚ್ಛತೆ, ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆಯನ್ನು ಓಕ್ಕೂಟವೇ ಮಾಡಬೇಕಿದೆ.
ನಗರದ ವಿದ್ಯಾನಗರದ ಬೆನ್ನೇನಹಳ್ಳಿ ಅಮ್ಮ ಸ್ತ್ರೀ ಶಕ್ತಿ ಗುಂಪು ಕ್ಯಾಂಟೀನ್ ಮಾಡುತ್ತಿದ್ದು, ತಿಂಡಿಗೆ 10 ರೂ., ಉಟಕ್ಕೆ 20 ರೂ. ಕಾಫಿ, ಟೀಗೆ 5 ರೂ.ಗಳಾಗಿರುತ್ತವೆ. ನಗರದ ನಾಲಬಂದವಾಡಿ(ಎ) ಸುರಭಿ ಸ್ತ್ರೀ ಶಕ್ತಿ ಗುಂಪು ಹಣ್ಣುಗಳ ಮಳಿಗೆ ತೆರೆದಿದ್ದು ಹಾಪ್ಕಾಮ್ಸ್ ದರದಲ್ಲಿ ನೀಡುತ್ತಿದೆ.
ಕಂಚಾಘಟ್ಟದ ಶ್ರೀಒನಕೆ ಓಬವ್ವ ಗುಂಪು ನಂದಿನಿ ಹಾಲು ಉತ್ಪನ್ನಗಳು, ಬೇಕರಿ ಮಳಿಗೆ ಮಾಡಿದ್ದು ರಿಯಾಯಿತಿ ದರದಲ್ಲಿ ನೀಡುತ್ತಿದೆ. ಯಾವುದೇ ಅನುದಾನವಿಲ್ಲದೆ ನಮ್ಮ ತಾಲೂಕಿನ ಸ್ತ್ರೀ ಶಕ್ತಿ ಒಕ್ಕೂಟ ರಿಯಾಯಿತಿ ದರದಲ್ಲಿ ಕ್ಯಾಂಟೀನ್ ಆರಂಭಿಸಿ ಆಸ್ಪತ್ರೆಯ ಬಡ ರೋಗಿಗಳಿಗೆ ಸಹಾಯ ಮಾಡುತ್ತಿರುವುದು ರಾಜ್ಯದಲ್ಲೇ ಪ್ರಥಮ ಎಂಬುದು ತಾಲೂಕಿಗೆ ಹೆಮ್ಮೆಯ ವಿಚಾರವಾಗಿದೆ.
ಕೋಟ್:
ಸಮಾಜಮುಖಿಯಾಗಿ ಮಹಿಳೆಯರು ತಮ್ಮನ್ನು ಗುರುತಿಸಿಕೊಂಡು ಆರ್ಥಿಕವಾಗಿ, ಸಾಮಾಜಿಕವಾಗಿ ಮೇಲೆ ಬರಲು ಮಾಡುತ್ತಿರುವ ಕೆಲಸ ಹೆಮ್ಮೆ ತಂದಿದೆ.
-ಬಿ.ಎನ್ ಪ್ರೇಮಾ, ಒಕ್ಕೂಟದ ಸದಸ್ಯ ಕಾರ್ಯದರ್ಶಿ
ಕೋಟ್:
ಸಮಾಜಕ್ಕೆ ಏನಾದರು ಕೊಡಬೇಕು, ನಾವು ಉತ್ತಮ ಬದುಕು ನಡೆಸಬೇಕು, ಸಮಾಜಕ್ಕೆ ಮಾದರಿಯಾಗಿರಬೇಕೆಂದು ಕ್ಯಾಂಟೀನ್ ಆರಂಭಿಸಿದ್ದೇವೆ.
-ಗಾಯತ್ರಿ, ಅಧ್ಯಕ್ಷ ರು, ಒನಕೆ ಓಬವ್ವ ಸ್ತ್ರೀ ಶಕ್ತಿ ಗುಂಪು, ಕಂಚಾಘಟ್ಟ
ಕೋಟ್:
ತಾಲೂಕಿನ ಬಡ ರೋಗಿಗಳಿಗೆ ಏನಾದರು ಮಾಡಬೇಕೆಂದು ಎಲ್ಲರೂ ಯೋಚಿಸಿ ಕ್ಯಾಂಟೀನ್ ಆರಂಭಿಸಿದ್ದು, ಶಾಸಕರ ಸಹಕಾರ ಮತ್ತು ಸಿಡಿಪಿಒ ಸಹಾಯದಿಂದ ನಮ್ಮ ಕನಸು ನನಸಾಗಿದೆ.
-ಭಾರತಿ, ಅಧ್ಯಕ್ಷ ರು ಸ್ತ್ರೀಶಕ್ತಿ ಸಂಘ, ನಾಲಬಂದವಾಡಿ(ಎ) ತಿಪಟೂರು