ನಿರಾಶ್ರಿತರ ಕೇಂದ್ರದಲ್ಲಿರುವ ಐವರು ಗರ್ಭಿಣಿಯರಿಗೆ ತುಮಕೂರು ಜಿಲ್ಲಾಡಳಿತದಿಂದ ಸೀಮಂತ ಕಾರ್ಯ!

ತುಮಕೂರು: ನಗರದ ಹನುಮಂತಪುರ ಹಾಸ್ಟೆಲ್‌ನಲ್ಲಿ ತೆರೆದಿರುವ ನಿರಾಶ್ರಿತರ ಕೇಂದ್ರದಲ್ಲಿ ಆಶ್ರಯ ಪಡೆದಿರುವ ಐವರು ಗರ್ಭಿಣಿಯರಿಗೆ ಸೀಮಂತ ಮಾಡಲಾಗಿದೆ.

ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಬೇರೆ ಬೇರೆ ಜಿಲ್ಲೆಗಳಿಂದ ಆಗಮಿಸಿರುವ ವಲಸೆ ಕೂಲಿ ಕಾರ್ಮಿಕರಿಗೆ ಜಿಲ್ಲಾಡಳಿತದಿಂದ ಇಲ್ಲಿ ತಾತ್ಕಾಲಿಕ ಆಶ್ರಯ ಕಲ್ಪಿಸಲಾಗಿದೆ. ಈ ಪೈಕಿ ಐವರು ತುಂಬು ಗರ್ಭಿಣಿಯರು ಇರುವುದನ್ನು ಗಮನಿಸಿದ ಅಧಿಕಾರಿಗಳು ಅವರಿಗೆ ಸೀಮಂತ ಮಾಡಿ, ಹೃದಯ ವೈಶಾಲ್ಯತೆ ಮೆರೆದಿದ್ದಾರೆ.

ಯಾದಗಿರಿಯ ಲಕ್ಷ್ಮೇ, ರಾಯಚೂರಿನ ಗೋವಿಂದಮ್ಮ, ಕಲಬುರಗಿಯ ಮೈಬೂಬಿ, ಲಕ್ಷ್ಮ ಹಾಗೂ ಯಾದಗಿರಿಯ ಶಾಂಬಮ್ಮ ಅವರಿಗೆ ಉಡಿ ತುಂಬಿ, ಸಂಪ್ರದಾಯದ ಪ್ರಕಾರವಾಗಿ ಸೀಮಂತ ಶಾಸ್ತ್ರ ನೆರವೇರಿಸಿದ್ದಾರೆ.

ಈ ಕೇಂದ್ರದಲ್ಲಿ 361 ಕಾರ್ಮಿಕರು ಆಶ್ರಯ ಪಡೆದಿದ್ದು, ಮಹಿಳಾ ಪೊಲೀಸರು, ಕಂದಾಯ ಸೇರಿದಂತೆ ನಾನಾ ಇಲಾಖೆಯ ಮಹಿಳಾ ಅಧಿಕಾರಿ, ಸಿಬ್ಬಂದಿಗಳು ಸ್ವತಃ ಆರತಿ ಬೆಳಗಿ ಸುಖ ಪ್ರಸವಕ್ಕೆ ಹಾರೈಸಿದರು. ತಹಸೀಲ್ದಾರ್‌ ಮೋಹನ್‌, ಎನ್‌ಇಪಿಎಸ್‌ ಪೊಲೀಸ್‌ ಠಾಣೆ ಪಿಎಸ್‌ಐ ಮಂಜುಳಾ ಮತ್ತಿತರರಿದ್ದರು.