ಜೆಡಿಎಸ್‌ ಸೋಲಿಗೆ ಅಪಪ್ರಚಾರವೇ ಕಾರಣ: ತುಮಕೂರಿನಲ್ಲಿ ಎಚ್‌.ಡಿ.ರೇವಣ್ಣ ಹೇಳಿಕೆ

ಶಿರಾ: ಬಿಜೆಪಿಯವರು ಅಧಿಕಾರಿಗಳನ್ನು ಇಟ್ಟಿಕೊಂಡು ಹಣ ಹಂಚಿದ್ದಾರೆ. ಸರಕಾರದ ಅಧಿಕಾರಿಗಳು, ಚುನಾವಣೆ ಆಯೋಗ ಸಂಪೂರ್ಣ ಈ ರಾಜ್ಯದಲ್ಲಿ ಬಿಜೆಪಿ ಕೈಗೊಂಬೆಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ ಎಂದು ಮಾಜಿ ಸಚಿವ ಎಚ್‌.ಡಿ.ರೇವಣ್ಣ ಆರೋಪಿಸಿದ್ದಾರೆ.

ನಗರದಲ್ಲಿ ಪತ್ರಿಕಾಗೋಷ್ಠಿ ನಡೆಸಿ ಮಾತನಾಡಿದ ಅವರು, ಶಿರಾ ಉಪ ಚುನಾವಣೆಯಲ್ಲಿ ಜೆಡಿಎಸ್‌ ಪಕ್ಷ ಸೋಲಲು ಪ್ರಮುಖ ಕಾರಣ ಅಪಪ್ರಚಾರ. ಬಿಜೆಪಿಯವರ ಹಣ ಹಂಚಿಕೆಯೇ ಪ್ರಮುಖ ಕಾರಣ. ಈ ರಾಜ್ಯದಲ್ಲಿ ಅಧಿಕಾರಿಗಳಿಗೆ ಭಯದ ವಾತಾವರಣ ಇದೆ. ನಾನು 21 ವರ್ಷ ರಾಜಕೀಯದಲ್ಲಿಅಧಿಕಾರ ನಡೆಸಿದ್ದೇನೆ. ಆದರೆ ಈ ರೀತಿಯ ವಾತಾವರಣ ಎಂದೂ ನೋಡಿಲ್ಲ. ಇಂದು ಬಿಜೆಪಿ ಸರಕಾರ ಅಧಿಕಾರಿಗಳ ಮೂಲಕ ಹಣ ಹಂಚಿಸುತ್ತಿದೆ. ಶಿರಾದಲ್ಲಿ ಸ್ವಾಭಿಮಾನದ ಜನ ಇದ್ದಾರೆ. ಹಾಗಾಗಿಯೇ ಜೆಡಿಎಸ್‌ ಪಕ್ಷಕ್ಕೆ 35 ಸಾವಿರ ಮತಗಳು ಬಂದಿರುವುದು. ಈ ರೀತಿಯ ಚುನಾವಣೆ ಮಾಡಿ ಜನರ ತೆರಿಗೆ ಹಣ ವ್ಯಯ ಮಾಡುವ ಬದಲು ರಷ್ಯಾ ಇತರೆ ರಾಷ್ಟ್ರಗಳಲ್ಲಿ ಸಾಯುವವರೆಗೂ ಅಧ್ಯಕ್ಷರಾಗುವ ರೀತಿಯಲ್ಲಿ ಈ ದೇಶದಲ್ಲಿ ಆ ಸನ್ನಿವೇಶ ಬರುವುದರಲ್ಲಿ ಅನುಮಾನವಿಲ್ಲ ಎಂದರು.

ಶಿರಾ ಕ್ಷೇತ್ರದಲ್ಲಿ ಜೆಡಿಎಸ್‌ ಪಕ್ಷ ಸೋಲುಂಡಿರಬಹುದು. ಇದಕ್ಕೆ ಪಕ್ಷದ ಕಾರ್ಯಕರ್ತರು ಎದೆಗುಂದುವುದು ಬೇಡ, ಮುಂದಿನ ದಿನಗಳಲ್ಲಿ ಶಿರಾದಲ್ಲಿ ಪಕ್ಷದ ಕಚೇರಿ ತೆರೆದು ಕಾರ್ಯಕರ್ತರೊಂದಿಗೆ ಇರುತ್ತೇವೆ. ಪಕ್ಷ ಸಂಘಟನೆ ಮಾಡಿ ಮುಂದಿನ ಚುನಾವಣೆಯಲ್ಲಿ ಮತ್ತೊಮ್ಮೆ ಪಕ್ಷ ಗೆಲುವಿಗೆ ಶ್ರಮಿಸೋಣ ಎಂದರು.

''ಬಿಜೆಪಿಯವರು ಶಿರಾ ಜನತೆಗೆ ಮಾತು ಕೊಟ್ಟಂತೆ 6 ತಿಂಗಳೊಳಗೆ ಮದಲೂರು ಕೆರೆಗೆ ನೀರು ಹರಿಸಲಿ ಎಂದು ಮನವಿ ಮಾಡುತ್ತೇನೆ'' ಎಂದರು. ಪತ್ರಿಕಾಗೋಷ್ಠಿಯಲ್ಲಿ ವಿಧಾನ ಪರಿಷತ್‌ ಸದಸ್ಯ ತಿಪ್ಪೇಸ್ವಾಮಿ, ಜಿ.ಪಂ. ಮಾಜಿ ಉಪಾಧ್ಯಕ್ಷ ಮುದಿಮಡು ರಂಗಶಾಮಯ್ಯ, ಮಾಜಿ ಸದಸ್ಯ ಸಿ.ಆರ್‌.ಉಮೇಶ್‌, ತಾಲೂಕು ಜೆಡಿಎಸ್‌ ಅಧ್ಯಕ್ಷ ಆರ್‌.ಉಗ್ರೇಶ್‌, ಎಂ.ರಂಗನಾಥ್‌, ರಾಘವೇಂದ್ರ, ಆರ್‌.ರಾಮು, ನಟರಾಜು, ಶ್ರೀರಂಗ, ಹರೀಶ್‌ ಮತ್ತಿತರರು ಹಾಜರಿದ್ದರು.