ಮತದಾನ ಹೆಚ್ಚಾದರೂ ಕಡಿಮೆಯಾದರೂ ಬಿಜೆಪಿಗೆ ಲಾಭ - ಬಿವೈ ವಿಜಯೇಂದ್ರ!

ತುಮಕೂರು: ಕಳೆದ ಮೂರು ವಾರಗಳಿಂದ ಶಿರಾ ಕ್ಷೇತ್ರದಲ್ಲಿ ಇದ್ದುಕೊಂಡು ಪಕ್ಷದ ಎಲ್ಲಾ ಮುಖಂಡರು ಮತ ಕೇಳಿದ್ದೇವೆ.
ಇಂದು (ಮಂಗಳವಾರ) ಅತಿ ಹೆಚ್ಚು ಮತದಾನ ಆಗಿರುವುದನ್ನ ನೋಡಿ ಸಂತೋಷವಾಗಿದೆ ಎಂದು ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಬಿವೈ ವಿಜಯೇಂದ್ರ ಹೇಳಿದ್ದಾರೆ.

ಶಿರಾ ಉಪಚುನಾವಣೆ ಹಿನ್ನೆಲೆಯಲ್ಲಿ ತುಮಕೂರು ತಾಲೂಕಿನ ಬೆಳ್ಳಾವಿ ಕ್ರಾಸ್ ಬಳಿ ವಿಜಯೇಂದ್ರ ಹೇಳಿಕೆ. ಮಾತನಾಡಿದ ಅವರು, ವಿಶೇಷವಾಗಿ ಯುವಕರು ಹಾಗೂ ಮಹಿಳೆಯರು ಅತ್ಯಂತ ಉತ್ಸಾಹದಿಂದ ಮತದಾನ ಮಾಡಿದ್ದಾರೆ. ಶೇಕಡವಾರು ಮತದಾನ ಹೆಚ್ಚಾದರೂ ಕಡಿಮೆಯಾದರೂ ಬಿಜೆಪಿಗೆ ಲಾಭ ಎಂದು ವಿಶ್ಲೇಷಿಸಿದರು.

ನಾವು ಅಂದುಕೊಂಡ ಅಂತರಕ್ಕಿಂತ ಹೆಚ್ಚಿನ ಅಂತರದಲ್ಲಿ ಮತದಾರರು ನಮ್ಮನ್ನು ಗೆಲ್ಲಿಸುತ್ತಾರೆ ಎನ್ನುವ ವಿಶ್ವಾಸವಿದೆ. ಹಿಂದೆ ಬಿಜೆಪಿ ನಗರ ಪ್ರದೇಶಕ್ಕೆ ಸೀಮಿತ ಅಂತ ಹೇಳುತ್ತಿದ್ದರು. ಆದರೆ ಈಗ ಟ್ರೆಂಡ್ ಬದಲಾಗಿದೆ. ಎಲ್ಲಾ ಪ್ರದೇಶ ಹಾಗೂ ಜಾತಿಗಳು ಬಿಜೆಪಿಯನ್ನು ಬೆಂಬಲಿಸುತ್ತಿವೆ ಎಂದು ಅವರು ತಿಳಿಸಿದರು.

ಆರ್‌.ಆರ್‌ ನಗರ, ಶಿರಾ ಬೈಎಲೆಕ್ಷನ್: ನೀರಸ ಮತದಾನ, ಅಭ್ಯರ್ಥಿಗಳಿಗೆ ಕಾಡ್ತಿದೆ ಆತಂಕ
ಶಿರಾ ಕ್ಷೇತ್ರದಲ್ಲಿ ಸರಿ ಸುಮಾರು ಶೇ.85ರಷ್ಟು ಮತದಾನವಾಗುವ ಸಾಧ್ಯತೆ ಇದೆ. ಇಲ್ಲಿ ನಿಶ್ಚಿತವಾಗಿ ಬಿಜೆಪಿ ಗೆಲುವು ಸಾಧಿಸಲಿದೆ. ಚುನಾವಣೆ ಆರಂಭದ ದಿನದಲ್ಲಿ 5-6 ಸಾವಿರ ಮತಗಳ ಅಂತರದಲ್ಲಿ ಗೆಲ್ಲುವ ವಿಶ್ವಾಸವಿತ್ತು. ಮತದಾನಕ್ಕೆ ಐದಾರು ದಿನ ಬಾಕಿ ಇರುವಾಗ 10-15 ಸಾವಿರ ಅಂತರದಲ್ಲಿ ಗೆಲ್ಲುವ ವಿಶ್ವಾಸ ಮೂಡಿತು. ಇಂದು ಮತದಾನವಾಗಿದ್ದು, 20-25 ಸಾವಿರದ ಅಂತರದಲ್ಲಿ ಗೆಲ್ಲುವ ಸುಳಿವು ಸಿಕ್ಕಿದೆ ಎಂದು ಅವರು ಹೇಳಿದರು.