ಹದಗೆಟ್ಟ ರಸ್ತೆಯಲ್ಲಿ ಪ್ರಯಾಣ: ಪೇಜಾವರ ಶ್ರೀಗೆ ಬೆನ್ನು ನೋವು

ಉಡುಪಿ: ಪರ್ಯಾಯ ಸಂಭ್ರಮದ ಬಳಿಕ ಮಂತ್ರಾಲಯಕ್ಕೆ ಭೇಟಿ ನೀಡಿದ್ದ ಪೇಜಾವರ ಶ್ರೀಗಳು ಶುಕ್ರವಾರ ಹೈದರಾಬಾದ್‌ಗೆ ಪ್ರಯಾಣಿಸುತ್ತಿದ್ದರು. ಆಗ ಹದಗೆಟ್ಟ ರಸ್ತೆಯಲ್ಲಿ ಅಕಸ್ಮಾತ್ತಾಗಿ ಕಾರ್‌ಗೆ ಬ್ರೇಕ್ ಹಾಕಿದ್ದರಿಂದಾಗಿ ಪೇಜಾವರ ಶ್ರೀಗಳ ಬೆನ್ನು ಹುರಿ ನೋವು ಉಲ್ಬಣಿಸಿದೆ.

ಶ್ರೀಗಳು ಹೈದರಾಬಾದ್‌ನಿಂದ ವಿಮಾನದಲ್ಲಿ ಮಂಗಳೂರು -ಉಡುಪಿಗೆ ಬಂದು ಶನಿವಾರ ಕಾರ್ಕಳದ ಕಾರ್ಯಕ್ರಮಕ್ಕೆ ಹಾಜರಾಗಬೇಕಿತ್ತು. ರಾತ್ರಿ 9.30ಕ್ಕೆ ಕಾರಿನಲ್ಲಿ ಶ್ರೀಗಳು ಮಲಗಿದ್ದಾಗ ಬ್ರೇಕ್‌ ಹಾಕಿದ ಕಾರಣ ಬೆನ್ನುಹುರಿ ನೋವು ಹೆಚ್ಚಿದ್ದು, ಕರ್ನೂಲಿನ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದಾರೆ. ವೈದ್ಯರು ಒಂದು ವಾರದ ವಿಶ್ರಾಂತಿ ಸೂಚಿಸಿದ್ದಾರೆ. ಭಕ್ತರ ಮನೆಯಲ್ಲಿ ವಿಶ್ರಾಂತಿ ಪಡೆದ ಶ್ರೀ ಶನಿವಾರ ಹೈದರಾಬಾದ್‌ನಿಂದ ವಿಮಾನ ಮೂಲಕ ಮಂಗಳೂರು- ಉಡುಪಿಗೆ ಮರಳಿ ವಿಜಯಧ್ವಜದಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದಾರೆ.

ಪಟ್ಟದ ದೇವರು ರಾಮ ವಿಠ್ಠಲ ಪೂಜೆಯನ್ನು ಕಿರಿಯ ಯತಿ ನೆರವೇರಿಸಿದ್ದು ಮಹಾಪೂಜೆ ಆರತಿಯನ್ನು ವಿಶ್ವೇಶತೀರ್ಥರು ಮಾಡಿದರು. ಕಾರ್ಕಳದ ಕಾರ್ಯಕ್ರಮಕ್ಕೆ ತೆರಳಲಾಗದ ಶ್ರೀಪಾದರು ಮಂಗಳೂರು ಕಾರ್ಯಕ್ರಮಕ್ಕೆ ಕಿರಿಯ ಶ್ರೀಗಳನ್ನು ಕಳಿಸಿದ್ದಾರೆ. ವಿಶ್ರಾಂತಿ ಆಗತ್ಯ ಇಇರುವ ಕಾರಣ ಮಾಧ್ಯಮ ಮತ್ತು ಭಕ್ತರಿಗೆ ಸ್ವಾಮೀಜಿಯನ್ನು ಭೇಟಿಯಾಗಲು ಒಂದು ವಾರ ಅವಕಾಶ ಇಲ್ಲ.