ಉಡುಪಿ: ಜಿಲ್ಲೆಯಲ್ಲಿ ಶರವೇಗದಲ್ಲಿ ಕೊರೊನಾ ಪಾಸಿಟಿವ್‌ ಪ್ರಕರಣಗಳು ಹೆಚ್ಚುತ್ತಿದ್ದು, ಮಂಗಳವಾರ ಒಂದೇ ದಿನ 150 ಪಾಸಿಟಿವ್‌ ಪ್ರಕರಣಗಳು ಪತ್ತೆಯಾಗಿವೆ. ಈ ಮೂಲಕ ಒಟ್ಟು ಪ್ರಕರಣಗಳ ಸಂಖ್ಯೆ ಬರೋಬ್ಬರಿ 410 ಕ್ಕೇರಿದೆ. ಸೋಮವಾರ ಜಿಲ್ಲೆಯಲ್ಲಿ 73 ಕೇಸ್‌ಗಳು ಖಚಿತವಾಗಿದ್ದವು.

ಮಂಗಳವಾರ ಪತ್ತೆಯಾದ ಹೆಚ್ಚಿನ ಪ್ರಕರಣಗಳು ಮುಂಬಯಿ ಬಂದವರಾಗಿದ್ದು, ಅವರೆಲ್ಲ ಪತ್ತೆ ಹಚ್ಚಿ ಜಿಲ್ಲೆಯಲ್ಲಿರುವ ಕೋವಿಡ್‌ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡುವ ಕೆಲಸವಾಗುತ್ತಿದೆ ಎಂದು ಜಿಲ್ಲಾಧಿಕಾರಿ ಜಿ. ಜಗದೀಶ್‌ ತಿಳಿಸಿದ್ದಾರೆ. 150 ರಲ್ಲಿ 147 ಜನರು ಮಹಾರಾಷ್ಟ್ರ ಪ್ರಯಾಣದ ಹಿನ್ನೆಲೆ ಹೊಂದಿದ್ದರೆ, ತಲಾ ಒಬ್ಬರು ಆಂಧ್ರ ಪ್ರದೇಶ, ತೆಲಂಗಾಣ ಮತ್ತು ಗೋವಾದಿಂದ ಬಂದವರಾಗಿದ್ದಾರೆ.

ಈ 150 ಪಾಸಿಟಿವ್‌ ಪ್ರಕರಣದಲ್ಲಿ 15 ವರ್ಷದೊಳಗಿನ 8 ಮಕ್ಕಳು, 60 ಮೇಲ್ಪಟ್ಟ ಇಬ್ಬರು, 120 ಪುರುಷರು ಹಾಗೂ 30 ಮಂದಿ ಮಹಿಳೆಯರೆಂದು ಪತ್ತೆ ಹಚ್ಚಲಾಗಿದೆ. 2,000 ಪರೀಕ್ಷೆಯಲ್ಲಿ 150 ಪಾಸಿಟಿವ್‌ ಬಂದಿದ್ದು, ಜನ ಅನಗತ್ಯವಾಗಿ ಆತಂಕಕ್ಕೆ ಒಳಾಗುವ ಅವಶ್ಯವಿಲ್ಲ ಎಂದು ಡಿಸಿ ತಿಳಿಸಿದ್ದಾರೆ.

ರಾಜ್ಯದಲ್ಲಿ ಕೊರೊನಾ ‘ಮಹಾ’ ಸ್ಫೋಟ, ಒಂದೇ ದಿನ 388 ಕೇಸ್‌; ಉಡುಪಿ 150, ಕಲಬುರಗಿ 100!

ಪ್ರತಿ ದಿನವೂ 10, 12 ಪಾಸಿಟಿವ್‌ ಬರುತ್ತಿದ್ದು, ಪರೀಕ್ಷೆಯೂ ಕೂಡಾ 200, 300 ಜನರಿಗೆ ಮಾತ್ರವೇ ಮಾಡಲಾಗುತ್ತಿತ್ತು. 2,000 ಪರೀಕ್ಷೆ ಮಾಡಿರುವ ಪರಿಣಾಮ ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಪಾಸಿಟಿವ್‌ ಬಂದಿದೆ. ಮುಂಬಯಿಯಿಂದ ಬಂದವರಲ್ಲಿ ಶೇ. 10 ರಷ್ಟು ಜನರಿಗೆ ಕೊರೊನಾ ಪಾಸಿಟಿವ್‌ ಇರುವುದು ವರದಿಯಾಗಿದೆ ಎಂದರು.

ಕೊರೊನಾ ಪಾಸಿಟಿವ್‌ ವ್ಯಕ್ತಿಗಳ ಚಿಕಿತ್ಸೆಗಾಗಿ ಜಿಲ್ಲೆಯಲ್ಲಿ 1,120 ಬೆಡ್‌ ವ್ಯವಸ್ಥೆ ಮಾಡಲಾಗಿದೆ. ಒಟ್ಟು 410 ಪ್ರಕರಣವಿದ್ದು, 800 ಕ್ಕೂ ಅಧಿಕ ಹೆಚ್ಚುವರಿ ಬೆಡ್‌ಗಳಿವೆ. ಈ 1,50 ಮಂದಿಗೆ ಚಿಕಿತ್ಸೆ ನೀಡುವಂತೆ ಸೂಚಿಸಲಾಗಿದೆ. 7 ದಿನದ ಬಳಿಕ ರೋಗದ ಲಕ್ಷಣವಿಲ್ಲದೇ ಹೋದರೆ ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗುವುದು ಎಂದು ವಿವರಿಸಿದರು.

ಇದುವರೆಗೆ ಕೊರೊನಾ ಪಾಸಿಟಿವ್‌ ಕಾಣಿಸಿಕೊಂಡಿದ್ದವರ ಪೈಕಿ ಇಬ್ಬರು ಮಾತ್ರ ಗಂಭೀರವಾಗಿದ್ದು, ಒಬ್ಬರಿಗೆ ಆಕ್ಸಿಜನ್‌ ವ್ಯವಸ್ಥೆ ಕಲ್ಪಿಸಲಾಗಿದೆ. ಇನ್ನೊಬ್ಬರನ್ನು ಐಸಿಯಲ್ಲಿ ಇಟ್ಟಿದ್ದು, ಇಬ್ಬರ ಆರೋಗ್ಯದಲ್ಲಿ ಚೇತರಿಕೆ ಕಾಣುತ್ತಿದೆ ಎಂದರು.

ಮತ್ತೆ 13 ಮಂದಿ ಐಸೋಲೇಶನ್‌ ವಾರ್ಡ್‌ಗೆ

ಜಿಲ್ಲೆಯಲ್ಲಿ ಕೊರೊನಾ ಸೋಂಕಿನ ಹಿನ್ನೆಲೆಯಲ್ಲಿ ಮಂಗಳವಾರ ಮತ್ತೆ 13 ಮಂದಿ ಐಸೋಲೇಶನ್‌ ವಾರ್ಡ್‌ಗೆ ದಾಖಲಾಗಿದ್ದಾರೆ. ಉಸಿರಾಟದ ತೊಂದರೆಯಿಂದ ಇಬ್ಬರು ಪುರುಷರು, ಒಬ್ಬ ಮಹಿಳೆ, ಕೋವಿಡ್‌ ಶಂಕೆ ಹಿನ್ನೆಲೆಯಲ್ಲಿ ಮೂವರು ಪುರುಷರು, ಒಬ್ಬ ಮಹಿಳೆ, ಶೀತ ಜ್ವರ ಸಂಬಂಧಿ ಅನಾರೋಗ್ಯದಿಂದ ನಾಲ್ವರು ಪುರುಷರು ಹಾಗೂ ಇಬ್ಬರು ಮಹಿಳೆಯರು ಸೇರಿದಂತೆ ಒಟ್ಟು 13 ಮಂದಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ.

12,511 ಮಂದಿಯ ಗಂಟಲಿನ ಸ್ರಾವ ಹಾಗೂ ರಕ್ತದ ಮಾದರಿ ಸಂಗ್ರಹಿಸಿದ್ದು, 6,255 ನೆಗೆಟಿವ್‌ ಹಾಗೂ 410 ಪಾಸಿಟಿವ್‌ ಪತ್ತೆಯಾಗಿದೆ. ಇನ್ನೂ 5,846 ಮಂದಿಯ ಫಲಿತಾಂಶ ಬರಲು ಬಾಕಿ ಇದೆ ಎಂದು ಜಿಲ್ಲಾ ಆರೋಗ್ಯಾಧಿಕಾರಿ ಡಾ. ಸುಧೀರ್‌ಚಂದ್ರ ಸೂಡಾ ತಿಳಿಸಿದ್ದಾರೆ.