ಉಡುಪಿ: ಖಾಸಗಿ ಬಸ್ ನಿರ್ವಾಹಕನ ಹತ್ಯೆ

ಉಡುಪಿ: ಖಾಸಗಿ ಬಸ್ ಮಾಲೀಕ ಹಾಗೂ ನಿರ್ವಾಹಕನಾಗಿದ್ದ ಪ್ರಶಾಂತ್ ಪೂಜಾರಿ (38) ಅವರನ್ನು ಬೈಕಿನಲ್ಲಿ ಬಂದ ಇಬ್ಬರು ದುಷ್ಕರ್ಮಿಗಳು ಮನೆ ಹೊರಗೆ ಗುರುವಾರ ಹತ್ಯೆ ಮಾಡಿದ್ದಾರೆ.

ಬೈರಂಪಳ್ಳಿಯ ಮನೆಗೆ ರಾತ್ರಿ 12 ರಿಂದ 1 ರ ನಡುವೆ ಬೈಕಿನಲ್ಲಿ ಬಂದ ದುಷ್ಕರ್ಮಿಗಳು ಮನೆ ಬಾಗಿಲು ಬಡಿದು ಪ್ರಶಾಂತ್ ಪೂಜಾರಿಯನ್ನು ಹೊರ ಕರೆದು ಮಾತುಕತೆ ನಡೆಸಿದ್ದರು.

ಮಾತಿನ ಚಕಮಕಿ ಬಳಿಕ ಮನೆಯೊಳಗಿಂದ ಕತ್ತಿ ತಂದ ದುಷ್ಕರ್ಮಿಗಳು ಬಾಗಿಲ ಚಿಲಕ ಹೊರಗಿನಿಂದ ಹಾಕಿ ಪ್ರಶಾಂತ್ ಪೂಜಾರಿಗೆ ಕತ್ತಿಯಿಂದ ಕಡಿದಿದ್ದರು. ಹೊರಗೆ ಗಲಾಟೆ ನಡೆಯುತ್ತಿದ್ದರೂ ಪತ್ನಿ ವಿಜಯಾ, ಮಕ್ಕಳಾದ ಅಂಜಲಿ (14) ಹಾಗೂ ನಂದನ್ (11) ಹೊರ ಬರಲಾಗದೆ ಒಳಗಿದ್ದರು.

ಪಕ್ಕದ ಮನೆ ಮಂದಿಗೆ ದೂರವಾಣಿ ಕರೆ ಸಂಪರ್ಕ ಸಿಗಲಿಲ್ಲ, ಸಂಬಂಧಿಕರಿಗೆ ಕರೆ ಮಾಡಿ ಸ್ಥಳಕ್ಕೆ ಬಂದಾಗ ರಕ್ತದ ಮಡುವಲ್ಲಿದ್ದ ಪ್ರಶಾಂತ್ ಪೂಜಾರಿ ಸಾವನ್ನಪ್ಪಿದ್ದರು. ಎಸ್ಪಿ ನಿಶಾ ಜೇಮ್ಸ್ ಸಹಿತ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿದ್ದಾರೆ.

ಹಣಕಾಸು ವಿಚಾರದಲ್ಲಿ ಸ್ಥಳೀಯ ಪರಿಚಿತ ವ್ಯಕ್ತಿಗಳೇ ಕೃತ್ಯ ಎಸಗಿರಬೇಕೆಂದು ಶಂಕಿಸಲಾಗಿದ್ದು ದುಷ್ಕರ್ಮಿಗಳು ಸ್ಟ್ಯಾಂಡ್ ತುಂಡಾದ ಬೈಕನ್ನು ಸ್ಥಳದಲ್ಲೇ ಬಿಟ್ಟು ಪರಾರಿಯಾಗಿದ್ದಾರೆ.

ಬ್ರಹ್ಮಾವರ ಪೊಲೀಸ್ ವೃತ್ತ ನಿರೀಕ್ಷಕ ಶ್ರೀಕಾಂತ್ ನೇತೃತ್ವದಲ್ಲಿ ಪೊಲೀಸ್ ಅಧಿಕಾರಿಗಳು ತನಿಖಾ ನಿರತರಾಗಿದ್ದಾರೆ. ಸ್ಥಳದಲ್ಲಿ ಬಿಟ್ಟು ಹೋದ ಬೈಕಿನ ಆಧಾರದಲ್ಲಿ ಆರೋಪಿಗಳನ್ನು ಶೀಘ್ರ ಪತ್ತೆ ಹಚ್ಚಲಾಗುವುದು ಎಂದು ಎಸ್ಪಿ ನಿಶಾ ಜೇಮ್ಸ್ ತಿಳಿಸಿದ್ದಾರೆ.