ಉಡುಪಿ: ಶೂ, ಸಾಕ್ಸ್‌ ಪೂರೈಕೆದಾರರಿಂದ 7,000 ರೂ. ಲಂಚ ಸ್ವೀಕರಿಸುತ್ತಿದ್ದ ಶಾಲಾ ಮುಖ್ಯಶಿಕ್ಷಕರೊಬ್ಬರನ್ನು ಉಡುಪಿಯ ಎಸಿಬಿ ಪೊಲೀಸರು ಶನಿವಾರ ದಾಳಿ ನಡೆಸಿ ಬಂಧಿಸಿದ್ದಾರೆ.
ಹಿರಿಯಡ್ಕ ಸರಕಾರಿ ಮಾ.ಹಿ.ಪ್ರಾ. ಶಾಲೆಯ ಮುಖ್ಯಶಿಕ್ಷಕ ಎಂ.ಕೆ. ವಾಸುದೇವ ಬಂಧಿತ ಆರೋಪಿ. ಸರಕಾರದ ಶೂ ಭಾಗ್ಯ ಯೋಜನೆಯಡಿ ಶಾಲಾ ಮಕ್ಕಳ ಶೂ, ಸಾಕ್ಸ್‌ ಪೂರೈಸುವ ಮಣಿಪಾಲ ಶೂ ಝೋನ್‌ ಮಾಲೀಕ ಪ್ರಶಾಂತ್‌ ಅವರಲ್ಲಿ ಲಂಚದ ಹಣಕ್ಕೆ ಬೇಡಿಕೆ ಇಟ್ಟು ಕಿರುಕುಳ ನೀಡುತ್ತಿದ್ದರು.
ಅಂಗಡಿಗೆ ತೆರಳಿ ಹಣ ನೀಡದಿದ್ದಲ್ಲಿ ಯಾವುದೇ ಶಾಲೆಗೆ ಶೂ, ಸಾಕ್ಸ್‌ ಪೂರೈಕೆಗೆ ಅವಕಾಶ ಸಿಗದಂತೆ ಮಾಡುವ ಬೆದರಿಕೆ ಹಾಕಿದ್ದರು. ಪ್ರಶಾಂತ ಉಡುಪಿ ಎಸಿಬಿ ಪೊಲೀಸರಿಗೆ ದೂರು ನೀಡಿದ್ದು, ದಾಳಿ ನಡೆಸಿ ಲಂಚದ ಹಣ ವಶಪಡಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ ಎಂದು ಎಸಿಬಿ ಪ್ರಕಟಣೆ ತಿಳಿಸಿದೆ.