ಕಾರ್ಕಳ: 2 ಮಂಗಗಳಿಗೆ ಕೆಎಫ್‌ಡಿ ಸೋಂಕು ದೃಢ

ಕಾರ್ಕಳ: ಕೆಎಫ್‌ಡಿ ಸೋಂಕು ಪತ್ತೆಯಾದಂದಿನಿಂದ ಈವರೆಗೆ ಕಾರ್ಕಳ ತಾಲೂಕಿನಲ್ಲಿ ಒಟ್ಟು 52 ಮಂಗಗಳು ಮೃತಪಟ್ಟಿದ್ದು, ಅವುಗಳ ಪೈಕಿ ಎರಡು ಮಂಗಗಳಿಗೆ ಮಂಗನಕಾಯಿಲೆ ಸೋಂಕು ಇತ್ತೆಂಬುದು ದೃಢಪಟ್ಟಿದೆ.

ಕಳೆದೊಂದು ತಿಂಗಳಿನಲ್ಲಿ ದಾಖಲಾದ ಪ್ರಕರಣಗಳ ಪೈಕಿ 19 ಮಂಗಗಳ ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ. ಅವುಗಳ ಪೈಕಿ ಹಿರ್ಗಾನ ಗ್ರಾಮದ ಚಿಕ್ಕಲ್‌ಬೆಟ್ಟು ಮತ್ತು ಕುಕ್ಕುಂದೂರು ಗ್ರಾಮದ ಪಿಲಿಚಂಡಿ ಸ್ಥಾನದ ಬಳಿ ಪತ್ತೆಯಾದ ಮಂಗಗಳ ಸ್ಯಾಂಪಲ್‌ನಲ್ಲಿ ಈ ಸೋಂಕು ಕಾಣಿಸಿಕೊಂಡಿರುವ ಬಗ್ಗೆ ತಾಲೂಕು ಆರೋಗ್ಯ ಇಲಾಖೆ ಮಾಹಿತಿ ನೀಡಿದೆ.

ವಯೋ ಸಹಜ ಸಾವನ್ನು ಕಂಡ ಮಂಗಗಳ ಮೃತದೇಹಗಳನ್ನು ಕೂಡ ಪತ್ತೆ ಹಚ್ಚಿದ ಜನತೆ, ಸಂಬಂಧಿಸಿದ ಇಲಾಖೆಗೆ ಮಾಹಿತಿ ನೀಡುತ್ತಿದ್ದಾರೆ. ಪರಿಣಾಮ ಮಂಗನಕಾಯಿಲೆ ಬಗ್ಗೆ ಜನತೆ ಜಾಗೃತರಾಗಿರುವುದು ಕಂಡು ಬಂದಿದೆ ಎಂದು ಕಾರ್ಕಳ ವಲಯಾರಣ್ಯಾಧಿಕಾರಿ ಜಿ.ಡಿ. ದಿನೇಶ್‌ ಕುಮಾರ್‌ ತಿಳಿಸಿದ್ದಾರೆ.