ಕೊಲ್ಲೂರು ದೇಗುಲ ಲಕ್ಷ್ಮೀಮಂಟಪಕ್ಕೆ ಮಹಿಳೆ ಪ್ರವೇಶ ಚರ್ಚೆಗೆ ಗ್ರಾಸ

ಕುಂದಾಪುರ: ಕೊಲ್ಲೂರು ಶ್ರೀಮೂಕಾಂಬಿಕಾ ದೇವಸ್ಥಾನದ ಗರ್ಭಗುಡಿಯ ಒಳಪ್ರಾಕಾರದ ಲಕ್ಷ್ಮೀಮಂಟಪವನ್ನು ದೇವಳದ ಮಾಜಿ ಅಧಿಕಾರಿಯೊಬ್ಬರು ಪ್ರವೇಶಿಸಿದ್ದು ಗೊಂದಲ ಸೃಷ್ಟಿಸಿದೆ.

ಮಂಗಳವಾರ ಸಂಜೆ 7ರಿಂದ 7.30ರ ನಡುವಿನ ಅವಧಿಯಲ್ಲಿ ಈ ಹಿಂದೆ ದೇವಳದಲ್ಲಿ ಕಾರ್ಯನಿರ್ವಹಣಾಧಿಕಾರಿ ಆಗಿದ್ದ ಉಮಾ ದೇಗುಲದ ಗರ್ಭಗುಡಿಯ ಒಳ ಪ್ರಾಕಾರದ ಲಕ್ಷ್ಮೀ ಮಂಟಪ ಪ್ರವೇಶಿಸಿದ ದೃಶ್ಯ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿರುವಂತೆ ಪರ ವಿರೋಧ ನಿಲುವು ವ್ಯಕ್ತವಾಗಿದೆ. ಪ್ರಕರಣದ ಹಿನ್ನೆಲೆಯಲ್ಲಿ ಕುಂದಾಪುರ ಸಹಾಯಕ ಕಮಿಷನರ್‌ ಟಿ.ಭೂಬಾಲನ್‌ ದೇವಳಕ್ಕೆ ಭೇಟಿ ನೀಡಿ ವಿವರ ಪಡೆದುಕೊಂಡಿದ್ದಾರೆ.

ಗರ್ಭಗುಡಿಯ ಒಳ ಪ್ರಾಕಾರದ ಲಕ್ಷ್ಮೇಮಂಟಪಕ್ಕೆ ಮಹಿಳೆಯರು ಪ್ರವೇಶಿಸುವಂತಿಲ್ಲ. ಆದರೆ ನವರಾತ್ರಿ ಸಂದರ್ಭ ಅರ್ಚಕರ ಕುಟುಂಬದ ಮಹಿಳೆಯರು ಪ್ರವೇಶಿಸಬಹುದಾಗಿದೆ. ಅರ್ಚಕ ಕುಟುಂಬಕ್ಕೆ ಸೇರದ ಉಮಾ ಅವರು ಬಾಗಿನ ಅರ್ಪಿಸಲು ಲಕ್ಷ್ಮೇಮಂಟಪ ಪ್ರವೇಶಿಸಿರುವುದು ವಿವಾದಕ್ಕೆ ಕಾರಣವಾಗಿದೆ.

ದೇವಳದ ಸಿಸಿ ಟಿವಿ ಕ್ಯಾಮರಾದಲ್ಲಿ ಮೂಡಿಬಂದ ದೃಶ್ಯವನ್ನು ಮೊಬೈಲ್‌ನಲ್ಲಿ ಸೆರೆಹಿಡಿದು ಸಾಮಾಜಿಕ ಜಾಲತಾಣದಲ್ಲಿ ಅಪೊ್ಲೕಡ್‌ ಮಾಡಿರುವುದರ ಹಿಂದಿನ ಉದ್ದೇಶದ ಬಗ್ಗೆ ತನಿಖೆ ನಡೆಯುತ್ತಿದೆ.