ಗೋವಾದಲ್ಲಿ ಕರಾವಳಿ ಮೀನಿಗೆ ನಿಷೇಧ: ಲಾರಿ ಮಾಲೀಕರಿಗೆ ತಟ್ಟಿದ ಬಿಸಿ

ಅಜಿತ್ ಆರಾಡಿ

ಉಡುಪಿ: ಫಾರ್ಮಾಲಿನ್ ಲೇಪನದ ಆರೋಪದಡಿ ಗೋವಾ ಸರಕಾರ ಕರ್ನಾಟಕ ಕರಾವಳಿ ಮೀನು ನಿಷೇಸಿ ಕೆಲ ನಿಬಂಧನೆ ಹೇರಿದ ಬೆನ್ನಲ್ಲೇ ಈ ಭಾಗದ ಲಾರಿ ಮಾಲೀಕರಿಗೆ ನೇರ ಬಿಸಿ ತಟ್ಟಿದೆ. ಆಹಾರ ಸಾಗಾಟಕ್ಕೆ ಪರವಾನಗಿ ಪಡೆಯದೇ ಕದ್ದುಮುಚ್ಚಿ ಮೀನು ಸಾಗಾಟ ಮಾಡುತ್ತಿದ್ದ ವಾಹನಗಳು ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ (ಎಫ್‍ಎಸ್‍ಎಸ್‍ಎಐ) ಕಚೇರಿಗೆ ದೌಡಾಯಿಸಿ, ನೋಂದಣಿಗೆ ತುದಿಗಾಲಿನಲ್ಲಿ ನಿಂತಿವೆ.

ಕಳೆದ ಕೆಲ ವರ್ಷಗಳಿಂದ ಗೋವಾಕ್ಕೆ ಮೀನು ಸಾಗಾಟ ಮಾಡುತ್ತಿದ್ದ ಹೆಚ್ಚಿನ ವಾಹನಗಳು ಮೀನು ಸಾಗಾಣಿಕಾ ಆಹಾರ ಪರವಾನಗಿಗೆ ಮುಂದಾಗಿದ್ದು, ಸೈಬರ್ ಸೆಂಟರ್‌ಗಳಲ್ಲಿ ಆನ್‍ಲೈನ್‍ನಲ್ಲಿ ನೋಂದಣಿ ಮಾಡಿಕೊಳ್ಳುತ್ತಿವೆ. ನ. 1 ರಿಂದ ಅಜ್ಜರಕಾಡಿನಲ್ಲಿರುವ ಕಚೇರಿಯಲ್ಲಿ 84 ವಾಹನಗಳಿಗೆ 57 ಮೀನು ಸಾಗಾಣಿಕಾ ಆಹಾರ ಪರವಾನಗಿ ನೀಡಲಾಗಿದೆ. ಈ ಪ್ರಮಾಣ ಇನ್ನಷ್ಟು ಹೆಚ್ಚುವ ಸಾಧ್ಯತೆಯೂ ಇದೆ.

ಕರ್ನಾಟಕ ಸಹಿತ ಹೊರ ರಾಜ್ಯದ ಮೀನುಗಳಿಗೆ ಫಾರ್ಮಾಲಿನ್ ಲೇಪನವಿರುವ ಅನುಮಾನದ ಮೇರೆಗೆ ಅ. 26 ರಿಂದ ಗೋವಾ ಸರಕಾರ ಮೀನು ಆಮದು ನಿಷೇಧ ಹೇರಿತ್ತು. ಇದು ಕರಾವಳಿ ಮತ್ಸ್ಯೋದ್ಯಮಕ್ಕೆ ಬಿಸಿ ಮುಟ್ಟಿದ್ದು, ಬಹುತೇಕ ಮೀನಿನ ದರ ಇಳಿಕೆಯಾಗಿತ್ತು. ಗೋವಾ ಸರಕಾರ ಮೀನಿನ ಆಮದಿಗೆ ಫಾರ್ಮಾಲಿನ್ ಲೇಪನವಾಗಿಲ್ಲ ಎನ್ನುವುದಕ್ಕೆ ಆಹಾರ ಇಲಾಖೆ ಪ್ರಮಾಣ ಪತ್ರ ಹಾಗೂ ಮೀನು ಸಾಗಾಟ ಮಾಡುವ ಲಾರಿಗಳು ನೀರು ಹೊರ ಚೆಲ್ಲದಂತೆ ಇನ್ಸುಲೇಶನ್ ಅಳವಡಿಸಿಕೊಳ್ಳುವುದು ಕಡ್ಡಾಯವೆಂದು ತಿಳಿಸಿ, ನ. 12 ರಿಂದ ರಾಜ್ಯದ ಮೀನಿಗೆ ನಿಷೇಧ ಹಾಕಿತ್ತು. ಈ ಎಲ್ಲಾ ಕಾರಣಗಳಿಂದಾಗಿ ಲಾರಿ ಮಾಲೀಕರಿಗೆ ಪರವಾನಗಿ ಪಡೆಯುವುದು ಅನಿವಾರ್ಯವಾಗಿದೆ.

ಲೈಸೆನ್ಸ್‌ಗೆ ಏನು ಮಾಡಬೇಕು?: 2 ಭಾವಚಿತ್ರ, ಆಧಾರ್ ಕಾರ್ಡ್, ಆರ್‌ಸಿ, ಪಾನ್ ಕಾರ್ಡ್ ಹಾಗೂ ಪ್ರತಿ ವಾಹನಗಳ ದಾಖಲೆಯನ್ನು ಆನ್‍ಲೈನ್‍ನಲ್ಲಿ ಭರ್ತಿ ಮಾಡಿ ಜೆರಾಕ್ಸ್ ಪ್ರತಿಯನ್ನು ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ ಕಚೇರಿಗೆ ಸಲ್ಲಿಸಬೇಕು. ಲಾರಿ ಮಾಲೀಕರು ಸೂಕ್ತ ದಾಖಲೆ ಕೊಟ್ಟರೆ ಒಂದೆರಡು ದಿನಗಳಲ್ಲಿ ಮೀನು ಸಾಗಾಣಿಕಾ ಆಹಾರ ಸಾಗಾಟಕ್ಕೆ ಲೈಸೆನ್ಸ್ ಸಿಗಲಿದೆ. ಇದನ್ನು ಪ್ರತಿ ವರ್ಷಕ್ಕೊಮ್ಮೆ ಮರುಪರಿಶೀಲನೆ ಮಾಡಬೇಕಿದೆ ಎಂದು ಹಿರಿಯ ಆಹಾರ ಸುರಕ್ಷತಾ ಅಕಾರಿ ಕೆ.ಎಸ್. ವೆಂಕಟೇಶ್ ತಿಳಿಸಿದ್ದಾರೆ.