ಮಣಿಪಾಲದಲ್ಲಿ ವಿಷ ಉಣಿಸಿ 10 ಬೀದಿ ನಾಯಿಗಳ ಹತ್ಯೆ: ಪ್ರಕರಣ ದಾಖಲು

ಉಡುಪಿ: ವಿಷ ಬೆರೆಸಿದ ಮೀನನ್ನು ಬೀದಿ ನಾಯಿಗಳಿಗೆ ಉಣಿಸಿದ ದುಷ್ಕರ್ಮಿಗಳ ಹೇಯ ಕೃತ್ಯದಿಂದ ಕಳೆದೆರಡು ದಿನಗಳಲ್ಲಿ ಒಟ್ಟು 10 ಬೀದಿ ನಾಯಿಗಳು ಮಣಿಪಾಲ ಖಾಸಗಿ ವಸತಿ ಸಮುಚ್ಛಯದ ಮುಂಭಾಗ ಮೃತಪಟ್ಟಿದ್ದು, ಪ್ರಕರಣ ಪೊಲೀಸ್‌ ಠಾಣೆ ಮೆಟ್ಟಿಲೇರಿದೆ.

ಮಲ್ಪೆ ಮಧ್ವರಾಜ್‌ ಅನಿಮಲ್‌ ಕೇರ್‌ ಟ್ರಸ್ಟ್‌ನ ಸಂಸ್ಥಾಪಕಿ ಬಬಿತಾ ಮಧ್ವರಾಜ್‌ ಮಂಗಳವಾರ ಮಣಿಪಾಲ ಪೊಲೀಸ್‌ ಠಾಣೆಯಲ್ಲಿ ದೂರು ನೀಡಿದ್ದು, ಆರೋಪಿ ವಿರುದ್ಧ ಕಾನೂನು ಕ್ರಮಕ್ಕೆ ಆಗ್ರಹಿಸಿದ್ದಾರೆ. ಸದ್ಯ ಈ 10 ಬೀದಿ ನಾಯಿಗಳ ಸಾವಿಗೆ ಕಾರಣ ಏನು ಎನ್ನುವ ನಿಟ್ಟಿನಲ್ಲಿ ಮಣಿಪಾಲ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ದೂರಿನ ವಿವರ: ಜೂ. 22, ರಾತ್ರಿ 9.30 ಕ್ಕೆ ಮಣಿಪಾಲ ಖಾಸಗಿ ವಸತಿ ಸಮುಚ್ಛಯದ ಮುಂಭಾಗ ದ್ವಿಚಕ್ರ ವಾಹನದಲ್ಲಿ ಬಂದಿದ್ದ ದುಷ್ಕರ್ಮಿಯೋರ್ವ ವಿಷಪೂರಿತ ಮೀನುಗಳನ್ನು ಬೀದಿ ನಾಯಿಗಳಿಗೆ ಹಾಕಿ ಹೋಗಿದ್ದ. ಈ ವಿಷಪೂರಿತ ಮೀನು ತಿಂದು 8 ನಾಯಿಗಳು ಮೃತಪಟ್ಟಿವೆ. ಜೂ. 24, ಸಂಜೆ 4.30ಕ್ಕೆ ಚಿಕ್ಕ ಮರಿ ಸಹಿತ 2 ನಾಯಿಗಳ ಮೃತದೇಹ ಪತ್ತೆಯಾಗಿದೆ ಎಂದು ಬಬಿತಾ ಮಧ್ವರಾಜ್‌ ದೂರಿನಲ್ಲಿ ತಿಳಿಸಿದ್ದಾರೆ.

ಶಂಕಿತ ದುಷ್ಕರ್ಮಿಯ ಹೇಯ ಕೃತ್ಯದಿಂದ ಈ 10 ನಾಯಿಗಳು ಮೃತಪಟ್ಟಿದ್ದು, ಎಲ್ಲಾ ನಾಯಿಗಳ ಕಳೆಬರಹವನ್ನು ಉಡುಪಿ ನಗರಸಭೆಗೆ ಸಂಬಂಧಿಸಿದವರು ತೆಗೆದುಕೊಂಡು ಹೋಗಿದ್ದಾರೆ. ಈ ಕೃತ್ಯ ಪ್ರಾಣಿಗಳ ಮೇಲಿನ ಕ್ರೌರ್ಯವನ್ನು ತಡೆಯುವ ಸೆಕ್ಷನ್‌ 11ರ ಉಲ್ಲಂಘನೆ. ಭಾರತೀಯ ದಂಡ ಸಂಹಿತೆ ಸೆಕ್ಷನ್‌ 428, 429 ಹಾಗೂ ಕರ್ನಾಟಕ ಪೊಲೀಸರ ಸೆಕ್ಷನ್‌ 93ರ ಅಡಿಯಲ್ಲಿ ಕ್ರಮ ಕೈಗೊಳ್ಳುವಂತೆ ದೂರಿನಲ್ಲಿ ಒತ್ತಾಯಿಸಿದ್ದಾರೆ.

ಪ್ರಕರಣಕ್ಕೆ ಸಂಬಂಧಿಸಿ ಸಿಸಿ ಟಿ ದೃಶ್ಯಾವಳಿ ಸಹಿತ ಇತರೆ ದಾಖಲೆಗಳನ್ನು ಪರಿಶೀಲಿಸಿ ಆರೋಪಿ ವಿರುದ್ಧ ಕಾನೂನು ಕ್ರಮಕೈಗೊಳ್ಳಬೇಕು. ನಾಯಿಗಳ ಶವವನ್ನು ಜಿಲ್ಲಾ ಪಶುವೈದ್ಯಾಧಿಕಾರಿಗಳ ಮೂಲಕ ಮರಣೋತ್ತರ ಪರೀಕ್ಷೆ ನಡೆಸಬೇಕೆಂದು ದೂರಿನಲ್ಲಿ ತಿಳಿಸಿದ್ದಾರೆ.