ಶಿವಮೊಗ್ಗ ಲೋಕಸಭೆ ಚುನಾವಣೆ ಮತದಾನ: ಬೈಂದೂರಿನಲ್ಲಿ ಉತ್ತಮ ಸ್ಪಂದನೆ

ಬೈಂದೂರು: ಶಿವಮೊಗ್ಗ ಲೋಕಸಭೆ ಚುನಾವಣೆಗೆ ಮಂಗಳವಾರ ನಡೆದ ಚುನಾವಣೆಯಲ್ಲಿ ಬೈಂದೂರು ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಉತ್ತಮ ಸ್ಪಂದನೆ ದೊರೆತಿದೆ.

ಬಿಜೂರು ಗ್ರಾಮದ ಗರಡಿ, ದೊಂಬ್ಲಿಕೇರಿ, ಕಳುಹಿತ್ಲು, ನಿಸರ್ಗಕೇರಿಯ ಭಾಗದ ನಿವಾಸಿಗಳು ಮತದಾನ ಬಹಿಷ್ಕರಿಸಿದ ಹಿನ್ನೆಲೆಯಲ್ಲಿ ಬಿಜೂರು ಸರಕಾರಿ ಪ್ರೌಢಶಾಲೆಯ ಮತಗಟ್ಟೆ ಬಿಕೋ ಅನ್ನುತ್ತಿತ್ತು. ಉಪ್ಪುಂದ ಮಾದರಿ ಹಿ.ಪ್ರಾ. ಶಾಲಾ ಮತಗಟ್ಟೆಯಲ್ಲಿ ಮತ ಯಂತ್ರ ಕೈಕೊಟ್ಟ ಹಿನ್ನೆಲೆಯಲ್ಲಿ ಮತದಾನ ಸುಮಾರು ಅರ್ಧ ಗಂಟೆ ವಿಳಂಬವಾಗಿರುವುದು ಹೊರತುಪಡಿಸಿದರೆ ಬಹುತೇಕ ಎಲ್ಲ ಭಾಗದಲ್ಲಿ ನಿಗದಿತ ಸಮಯದಲ್ಲಿ ಆರಂಭಗೊಂಡಿದ್ದು, ಮಧ್ಯಾಹ್ನ ಒಂದು ಗಂಟೆ ಸುಮಾರಿಗೆ ಶೇ. 44.64 ಮತದಾನವಾಗಿತ್ತು.

ಶಾಂತಿಯುತ ಮತದಾನ: ಚುನಾವಣೆಯ ಹಿನ್ನೆಲೆಯಲ್ಲಿ ಜಿಲ್ಲಾಧಿಕಾರಿ ಹೆಪ್ಸಿಬಾ ರಾಣಿ ಕೊರ್ಲಪಾಟಿ ಹಾಗೂ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ನಿಶಾ ಜೇಮ್ಸ್‌ ಬೈಂದೂರಿನಲ್ಲಿಯೇ ಮೊಕ್ಕಾಂ ಹೂಡಿ ಬಹುತೇಕ ಬೂತ್‌ಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಕುಂದಾಪುರ ಡಿವೈಎಸ್‌ಪಿ ಬಿ.ಪಿ. ದಿನೇಶ್‌ ಕುಮಾರ್‌ ನೇತೃತ್ವದಲ್ಲಿ ಶಾಂತಿಯುತ ಮತದಾನಕ್ಕಾಗಿ ಕ್ಷೇತ್ರ ವ್ಯಾಪ್ತಿಯ ಎಲ್ಲೆಡೆ ಬಿಗಿ ಪೊಲೀಸ್‌ ಬಂದೋಬಸ್ತ್‌ ಮಾಡಲಾಗಿತ್ತು.

ವಾರದ ಸಂತೆ ಬಂದ್‌: ಮತದಾನದ ಹಿನ್ನೆಲೆಯಲ್ಲಿ ಮಂಗಳವಾರ ಉಪ್ಪುಂದದಲ್ಲಿ ನಡೆಯುವ ವಾರದ ಸಂತೆ ಬಂದ್‌ ಮಾಡಿರುವುದರಿಂದ, ಸಂತೆಗೆ ಆಗಮಿಸಿದ ಗ್ರಾಮೀಣ ಭಾಗದ ಜನರು ಗೊಂದಲಕ್ಕೀಡಾಗಿ ವಾಪಸ್ಸಾದರು.

ಬೋಟ್‌ ನಿಲ್ಲಿಸಿ ಮತದಾನ: ಆಳ ಸಮುದ್ರಕ್ಕೆ ಮೀನುಗಾರಿಕೆಗೆ ತೆರಳಿದ್ದ, ಉಪ್ಪುಂದ ಮಡಿಕಲ್‌ನ ನಾಲ್ಕೈದು ಮಂದಿ ಮೀನುಗಾರರು, ಮತ ಚಲಾಯಿಸಲೇಬೇಕು ಎಂಬ ಉದ್ದೇಶದಿಂದ ಮೀನುಗಾರಿಕೆಯ ಮಧ್ಯೆದಲ್ಲಿಯೇ ವಾಪಸಾಗಿ, ಸ್ಥಳೀಯ ಮೀನುಗಾರರ ಸಹಕಾರದಿಂದ ಮಡಿಕಲ್‌ ಕಡಲ ತೀರದಲ್ಲಿ ತಮ್ಮ ಬೋಟ್‌ನ್ನು ಲಂಗರು ಹಾಕಿಸಿ ಶೀಘ್ರ ಮತದಾನ ಮಾಡಿ ಪುನಃ ಮೀನುಗಾರಿಕೆಗೆ ತೆರಳಿದ್ದಾರೆ. ಇದು ಉಡುಪಿಯ ಮಲ್ಪೆಯ ಬೋಟ್‌ ಆಗಿದ್ದು, ಇದರಲ್ಲಿ ಸ್ಥಳೀಯ ನಾಲ್ಕೈದು ಮಂದಿ ಮೀನುಗಾರರು ಕಾರ್ಮಿಕರಾಗಿ ದುಡಿಯುತ್ತಿದ್ದರು. ಇವರು ಮೀನುಗಾರಿಕೆಗೆ ತೆರಳಿದ 10-15 ದಿನ ಮೀನುಗಾರಿಕೆಯಲ್ಲಿಯೇ ತೊಡಗಿರುತ್ತಿದ್ದು, ಮತ ಚಲಾವಣೆಗಾಗಿ ಅರ್ಧದಲ್ಲಿಯೇ ಬಂದು ಮತ ಚಲಾಯಿಸಿ ಮತ್ತೆ ಮೀನುಗಾರಿಕೆಗೆ ತೆರಳಿದರು.