ಮುಳ್ಳಿಕಟ್ಟೆ: ಸರಕಾರಿ ಜಾಗಕ್ಕೆ ಆಕಸ್ಮಿಕ ಬೆಂಕಿ

ಕುಂದಾಪುರ: ತಾಲೂಕಿನ ಮುಳ್ಳಿಕಟ್ಟೆ ಎಂಬಲ್ಲಿ ರಾಷ್ಟ್ರೀಯ ಹೆದ್ದಾರಿ ಸಮೀಪ ಸರ್ಕಾರಿ ಜಾಗದಲ್ಲಿ ಬೆಂಕಿ ಕಾಣಿಸಿಕೊಂಡು ಸುಮಾರು 10 ಎಕರೆಯಷ್ಟು ಭೂಮಿ ಬೆಂಕಿಯ ಕೆನ್ನಾಲಿಗೆಗೆ ತುತ್ತಾದ ಘಟನೆ ಮಂಗಳವಾರ ರಾತ್ರಿ ನಡೆದಿದೆ.

ಇಲ್ಲಿನ ಮುಳ್ಳಿಕಟ್ಟೆಯ ಮುಳೆ ಕೋಡಿ ಕೊಪ್ಪರಿಗೆ ಜಾಗ ಎಂದು ಕರೆಯಲ್ಪಡುವ ಅಂದಾಜು 20 ಎಕರೆಯಷ್ಟು ವಿಸ್ತೀರ್ಣ ಹೊಂದಿರುವ ಸರ್ಕಾರಿ ಜಾಗದಲ್ಲಿ ಸುಮಾರು 10 ಎಕರೆಯಷ್ಟು ಜಾಗಕ್ಕೆ ಬೆಂಕಿ ತಗುಲಿದೆ. ಮಂಗಳವಾರ ಸಂಜೆ 6 ಗಂಟೆಯ ಸುಮಾರಿಗೆ ಈ ಭಾಗದಲ್ಲಿ ಸಣ್ಣ ಪ್ರಮಾಣದಲ್ಲಿ ಬೆಂಕಿ ಕಾಣಿಸಿಕೊಂಡಿತ್ತು. ತದನಂತರ ಬೆಂಕಿಯ ಕೆನ್ನಾಲಿಗೆ ಹಬ್ಬುತ್ತಿರುವುದನ್ನು ಗಮನಿಸಿ ಎಚ್ಚೆತ್ತ ಸ್ಥಳೀಯರು ಹಾಗೂ ಯುವಕರು ತಕ್ಷ ಣ ಅಗ್ನಿಶಾಮಕ ದಳದ ಸಿಬ್ಬಂದಿಗಳನ್ನು ಸಂಪರ್ಕಿಸಿ ಬೆಂಕಿ ನಂದಿಸಲು ಮುಂದಾಗಿದ್ದರು.

ಕೊಪ್ಪರಿಗೆ ಜಾಗದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಗಾಳಿ ಮರಗಳು ಇರುವ ಹಿನ್ನೆಯಲ್ಲಿ ಇವುಗಳಿಂದ ಬಿದ್ದಂತಹ ಎಲೆಗಳ ರಾಶಿಗಳಿಗೆ ಬೆಂಕಿ ತಗುಲಿದೆ. ಇದು ಬೆಂಕಿಯ ತೀವ್ರತೆ ಇನ್ನಷ್ಟು ವ್ಯಾಪಿಸಲು ಕಾರಣವಾಗಿದೆ ಎಂದು ಶಂಕಿಸಲಾಗಿದೆ.

ಗಿಡದಿಂದ ಬೆಂಕಿ ನಂದಿಸಲು ಮುಂದಾದರು: ಏರು ತಗ್ಗು ಪ್ರದೇಶಗಳಿಂದ ಕೂಡಿದ ಜಾಗವಾಗಿರುವ ಹಿನ್ನೆಲೆಯಲ್ಲಿ ಅಗ್ನಿಶಾಮಕ ದಳದ ಸಿಬ್ಬಂದಿಗಳು ಬಂದರೂ ಯಾವುದೇ ಪ್ರಯೋಜನವಾಗದೇ ವಾಹನದೊಂದಿಗೆ ಸ್ಥಳಕ್ಕೆ ತೆರಳಲು ಹರಸಾಹಸ ಪಡುವಂತಾಯಿತು. ಇದರಿಂದಾಗಿ ಪ್ರಯೋಜನವಾಗದೇ ಅಗ್ನಿಶಾಮಕ ದಳದ ಸಿಬ್ಬಂದಿಗಳು ಸಾರ್ವಜನಿಕರ ಸಹಕಾರದೊಂದಿಗೆ ಸಣ್ಣ ಸಣ್ಣ ಗಿಡಗಳನ್ನು ಬಳಸಿ ಬೆಂಕಿ ನಂದಿಸಲು ತೊಡಗಿದರು.

ಸರಿ ಸುಮಾರು ರಾತ್ರಿ 9.30ರ ತನಕ ಬೆಂಕಿ ನಂದಿಸುವ ಕಾರ್ಯಾಚರಣೆ ಮುಂದುವರಿದಿದ್ದು ನಂತರ ಬೆಂಕಿಯನ್ನು ಒಂದು ಹಂತಕ್ಕೆ ಹತೋಟಿಗೆ ತಂದು ನಿಲ್ಲಿಸಲಾಯಿತು. ಕೊಪ್ಪರಿಗೆ ಪ್ರದೇಶಕ್ಕೆ ತಾಗಿಕೊಂಡೇ ಅಂದಾಜು 20ಕ್ಕೂ ಅಧಿಕ ಮನೆಗಳಿದ್ದು ಬೆಂಕಿಯ ತೀವ್ರತೆ ಹೆಚ್ಚುತ್ತಿರುವಂತೆ ಸ್ಥಳೀಯರು ಭಯಭೀತರಾಗಿದ್ದರು. ತದನಂತರ ಸ್ಥಳೀಯ ಇನ್ನಿತರ ಯುವಕರನ್ನೂ ಕರೆದು ಕಾರ್ಯಾಚರಣೆ ಕೈಗೊಂಡು ಬೆಂಕಿ ನಂದಿಸುವಲ್ಲಿ ಯಶಸ್ವಿಯಾದರು.