ಮೀನುಗಾರರು ಮರಳಿ ಬರಲೆಂದು ನಾಗರಿಕ ಸಮಿತಿ ಪ್ರಾರ್ಥನೆ

ಉಡುಪಿ: ಮಲ್ಪೆಯಿಂದ ಮೀನುಗಾರಿಕೆಗೆ ತೆರಳಿ ಡಿ. 15ರಿಂದ ಕಾಣೆಯಾದ ಸುವರ್ಣ ತ್ರಿಭುಜ ದೋಣಿ ಸಹಿತ ಏಳು ಮೀನುಗಾರರು ಮರಳಿ ಬರಲೆಂದು ಉಡುಪಿ ಜಿಲ್ಲಾ ನಾಗರಿಕ ಸಮಿತಿ ವತಿಯಿಂದ ಗುರುವಾರ ಪ್ರಾರ್ಥನೆ ಸಲ್ಲಿಸಲಾಯಿತು.

ಉಡುಪಿ ಸೋದೆ ಮಠದ ಭೂತರಾಜರ ಗುಡಿಯಲ್ಲಿ ಪ್ರಾರ್ಥನಾ ವಿಧಿಯನ್ನು ವೆಂಕಟೇಶ ಆಚಾರ್ಯ, ಸೋದೆ ಮಠದ ಉಸ್ತುವಾರಿ ಮಧ್ವೇಶ ತಂತ್ರಿ ನಡೆಸಿಕೊಟ್ಟರು. ನಾಗರಿಕ ಸಮಿತಿ ವತಿಯಿಂದ ಸಂಕಲ್ಪ ಕೈಗೊಳ್ಳಲಾಯಿತು.

ಸಮಿತಿ ಪ್ರಧಾನ ಕಾರ್ಯದರ್ಶಿ ನಿತ್ಯಾನಂದ ಒಳಕಾಡು, ತಾರಾನಾಥ ಮೇಸ್ತ ಶಿರೂರು, ಉದ್ಯಮಿ ಮುರಳೀಧರ ಬಲ್ಲಾಳ್‌, ಸುಧಾಕರ, ಡೇವಿಡ್‌, ರಾಘವೇಂದ್ರ ಪ್ರಭು ಕರ್ವಾಲು, ಬಸಂತ್‌ ಮಲ್ಪೆ, ಐಸಿರಿ ಸುರೇಂದ್ರ ಕುಕ್ಯಾನ್‌, ಬೋರ್ಕರ್‌, ಪುತ್ರಾಯ, ಸವಿತಾ ಶೆಟ್ಟಿ ಉಪಸ್ಥಿತರಿದ್ದರು.

ದೋಣಿ ಮತ್ತು ಏಳು ಮೀನುಗಾರರು ಕಾಣೆಯಾಗಿ 19 ದಿನಗಳು ಸಂದಿವೆ. ಸಂಬಂಧಿತ ಇಲಾಖೆಗಳು ಶೋಧ ನಡೆಸಿದ್ದರೂ ಯಾವುದೇ ಸುಳಿವು ದೊರೆಯದೆ ಮೀನುಗಾರರ ಕುಟುಂಬ ಆತಂಕದಲ್ಲಿದೆ.