ಬಿಜೆಪಿಯವರಿಗೆ ಮಂತ್ರಿಮಂಡಲ ರಚನೆ ಅಸಾಧ್ಯ: ಶಿರೂರು ಶ್ರೀ

ಕುಂದಾಪುರ: ವಿಧಾನಸಭೆ ಚುನಾವಣೆ ಮುಗಿದರೂ ಇನ್ನೂ 9 ದಿನದ ಕಾಲಾವಕಾಶ ಕೇಳಿದ ಬಿಜೆಪಿಯವರಿಗೆ ಮಂತ್ರಿಮಂಡಲ ರಚನೆ ಅಸಾಧ್ಯ ಎಂದು ಉಡುಪಿ ಶಿರೂರು ಮಠಾಧೀಶ ಶ್ರೀಲಕ್ಷ್ಮೀವರ ತೀರ್ಥ ಸ್ವಾಮೀಜಿ ಹೇಳಿದ್ದಾರೆ.

ಬುಧವಾರ ಅವರನ್ನು ಭೇಟಿ ಮಾಡಿದ ಉಡುಪಿ ಜಿಲ್ಲಾ ಜೆಡಿಯು ಅಧ್ಯಕ್ಷ ರಾಜೀವ ಕೋಟ್ಯಾನ್‌ ನಿಯೋಗದೊಂದಿಗೆ ಮಾತನಾಡಿದ ಶ್ರೀಗಳು ಅಮಿತಾ ಶಾ ಅಯೋಗ್ಯರಿಗೆ ಟಿಕೇಟ್‌ ನೀಡುವ ಮೂಲಕ ಬಿಜೆಪಿಯ ಮೂಲತತ್ವಕ್ಕೆ ಧಕ್ಕೆ ತಂದಿದ್ದಾರೆ. ಹಿಂದುತ್ವ ಅಂದರೇನು ತಿಳಿಯದವರು ಶಾಸಕರಾಗಿ ಹೋದರೆ ಅವರಿಗೆ ಶ್ರೀಕೃಷ್ಣನ ಕೃಪೆ ಇರಲು ಹೇಗೆ ಸಾಧ್ಯ. ತೋಳ್ಬಲ, ಹಣಬಲದಿಂದ ಬಿಜೆಪಿ ಗೆದ್ದಿರಬಹುದು. ಇನ್ನೂ 90 ದಿನದಲ್ಲಿ ಈ ರಾಜ್ಯದ ರಾಜಕೀಯ ಚಿತ್ರಣವೇ ಬದಲಾಗಲಿದೆ ಎಂದು ಅವರು ಭವಿಷ್ಯ ನುಡಿದರು. ರಾಮಕೃಷ್ಣ ಹೆಗಡೆಯವರ ದಳದೊಂದಿಗೆ ನಾನಿದ್ದೇನೆ. ನನ್ನ ಸಂಪೂರ್ಣ ಬೆಂಬಲ ನಿಮಗಿದೆ ಎಂದು ಸ್ವಾಮೀಜಿ ಜೆಡಿಯು ನಿಯೋಗಕ್ಕೆ ತಿಳಿಸಿದರು.