ಇಂದು ಗುಹೇಶ್ವರದಲ್ಲಿ ಗುಹಾದರ್ಶನ ಭಾಗ್ಯ

ಕುಂದಾಪುರ: ಶಿವರಾತ್ರಿಯಂದು ಗುಹೆಯೊಳಗೆ ಹೊಕ್ಕು ಶಿವದರ್ಶನ ಪಡೆಯುವ ಅವಕಾಶ ಹೊಂದಿರುವ ಗುಜ್ಜಾಡಿ ಶ್ರೀ ಗುಹೇಶ್ವರ ದೇವಳದಲ್ಲಿ ಎಲ್ಲ ಸಿದ್ಧತೆ ನಡೆದಿದೆ. ವರ್ಷದಲ್ಲೊಂದು ದಿನ ಮಾತ್ರ ಇಲ್ಲಿ ಗುಹಾ ದರ್ಶನ ಭಾಗ್ಯ. ಶಿವರಾತ್ರಿಯಂದು ಗುಹಾದರ್ಶನಕ್ಕಾಗಿ ಭಕ್ತರು ಕಾಯುತ್ತಿರುತ್ತಾರೆ. ದೇಗುಲದ ಗರ್ಭಗುಡಿಯ ಹೊರಭಾಗದ ಪುಟ್ಟದಾದ ಮುರಕಲ್ಲಿನ ಪೊಟರೆಯೊಳಗೆ ಪ್ರವೇಶ ಪಡೆದು 20 ಅಡಿ ಉದ್ದದ ಕಗ್ಗತ್ತ ಗುಹೆ ಪ್ರವೇಶಿಸಿ ಶಿವನ ಮೂಲಸನ್ನಿಧಿ ದರ್ಶನ ಪುಣ್ಯಕರ ಎಂಬ ನಂಬಿಕೆ ಇರುವುದರಿಂದ ಶಿವರಾತ್ರಿಯಂದು ಭಕ್ತ ಸಂದೋಹವೇ ಇಲ್ಲಿ ನೆರೆಯುತ್ತದೆ. ಭಕ್ತರ ಆಗಮನ ಹಿನ್ನೆಲೆಯಲ್ಲಿ ದೇವಳದ ವ್ಯವಸ್ಥಾಪನಾ ಮಂಡಳಿ ಗುಹಾ ಪ್ರವೇಶಕ್ಕೆ ಅನುಕೂಲವಾಗುವ ಸಿದ್ಧತೆ ನಡೆಸಿದೆ. ಶಿವರಾತ್ರಿಯ ಹಬ್ಬದ ನಿಮಿತ್ತ ಶತರುದ್ರಾಭಿಷೇಕ ಸಹಿತ ಇನ್ನಿತರ ಧಾರ್ಮಿಕ ವಿಧಿವಿಧಾನಗಳು ನಡೆಯಲಿದೆ.