9ರಿಂದ ಮಣಿಪಾಲದಲ್ಲಿ ವಿಲೇಜ್‌ ಲೈಫ್‌ ಚಿತ್ರಕಲಾ ಪ್ರದರ್ಶನ

ಉಡುಪಿ: ಮಣಿಪಾಲದ ತ್ರಿವರ್ಣ ಆರ್ಟ್‌ ಸೆಂಟರ್‌ ವತಿಯಿಂದ ಉಡುಪಿ ಹಾಗೂ ಕುಂದಾಪುರದ ಸುಮಾರು 25 ಮಂದಿ ಚಿತ್ರಕಲಾವಿದರು ಗ್ರಾಮೀಣ ಜೀವನದ ಬಗ್ಗೆ ರಚಿಸಿದ ಚಿತ್ರಕಲಾ ಪ್ರದರ್ಶನ 'ವಿಲೇಜ್‌ ಲೈಫ್‌ ' ಮಾ.9ರಿಂದ 11ರವರೆಗೆ ಮಣಿಪಾಲದ ಗೀತಾ ಮಂದಿರದಲ್ಲಿ ನಡೆಯಲಿದೆ.

ತ್ರಿವರ್ಣ ಆರ್ಟ್‌ ಸೆಂಟರ್‌ನ ನಿರ್ದೇಶಕ, ಚಿತ್ರಕಲಾವಿದ ಹರೀಶ್‌ ಸಾಗ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.

ಮಾ.9ರಂದು ಬೆಳಗ್ಗೆ 9.45ಕ್ಕೆ ಅಂಬಲಪಾಡಿ ದೇವಳದ ಧರ್ಮದರ್ಶಿ ಡಾ.ನೀ.ಬಿ.ವಿಜಯ ಬಲ್ಲಾಳ್‌ ಉದ್ಘಾಟಿಸಲಿದ್ದು, ಮಣಿಪಾಲ ಅಕಾಡೆಮಿ ಆಫ್‌ ಜನರಲ್‌ ಎಜುಕೇಶನ್‌ ಆಡಳಿತಾಧಿಕಾರಿ ಡಾ.ಎಚ್‌.ಶಾಂತಾರಾಮ್‌ ಅಧ್ಯಕ್ಷತೆ ವಹಿಸಲಿದ್ದಾರೆ. ಉದ್ಯಮಿ ಮನೋಹರ ಎಸ್‌.ಶೆಟ್ಟಿ, ಡಾ.ಗೌರಿ, ಮಹೇಶ್‌ ಠಾಕೂರ್‌, ಕೌನ್ಸಿಲರ್‌ ಮಂಜುನಾಥ ಮಣಿಪಾಲ ಉಪಸ್ಥಿತರಿರುವರು ಎಂದು ತಿಳಿಸಿದರು.

ಏನೆಲ್ಲ ಕಲಾಕೃತಿಗಳು?: ಚಿತ್ರಕಲಾ ಪ್ರದರ್ಶನದಲ್ಲಿ ತ್ರಿವರ್ಣ ಆರ್ಟ್‌ ಸೆಂಟರ್‌ನ 19ರಿಂದ 75 ವರ್ಷ ವಯೋಮಿತಿಯ 24 ಮಂದಿ ಕಲಾ ವಿದ್ಯಾರ್ಥಿಗಳು ಭಾಗವಹಿಸಿದ್ದಾರೆ. ಅಕ್ಕಿ ಮುಡಿ ಕಟ್ಟುವುದು, ಎಳನೀರು ಸೇವನೆ ಮಾಡುತ್ತಿರುವ ವೃದ್ಧ, ಪೊಕ್ಕು ಆಡುತ್ತಿರುವ ಬಾಲೆಯರು, ಹೂ ಕಟ್ಟುತ್ತಿರುವ ಮಹಿಳೆ, ದನ-ಕರುಗಳೊಂದಿಗೆ ಸಾಗುತ್ತಿರುವ ಮಹಿಳೆ, ಲಗೋರಿ ಆಡುತ್ತಿರುವ ಹುಡುಗರು, ಐಸ್‌ ಕ್ಯಾಂಡಿ ಮಾರುವವ, ಮಗುವಿನ ಎಣ್ಣೆ ಸ್ನಾನ, ಮುಂಜಾನೆ ಎತ್ತಿನ ಗಾಡಿ ಪಯಣ, ಚಿಮಣಿ ದೀಪದಲ್ಲಿ ಓದುತ್ತಿರುವ ಬಾಲಿ, ಭೂತದ ಕೋಲ ಹೀಗೆ ಸುಮಾರು 24 ಕಲಾಕೃತಿಗಳು ಇಲ್ಲಿ ಪ್ರದರ್ಶನಗೊಂಡು ಹಳ್ಳಿ ಜೀವನದ ಸೊಗಡು, ಶ್ರದ್ಧಾ ಭಕ್ತಿ, ವೃತ್ತಿ ದಿನಚರಿ, ಬಾಲ್ಯದ ಮೋಜು, ಕಠಿಣ ಪರಿಶ್ರಮ, ಹಳ್ಳಿ ತಿನಸುಗಳ ಅವಿಸ್ಮರಣೀಯ ಚಿತ್ರಣವನ್ನು ಕಲಾರಸಿಕರ ಮುಂದೆ ಕಟ್ಟಿಕೊಡಲಿವೆ. ಅಕ್ರಾಲಿಕ್‌ ಮಾಧ್ಯಮದಲ್ಲಿ 18 ಕಲಾಕೃತಿಗಳು ಹಾಗೂ ಚಾರ್ಕೋಲ್‌ ಪೇಪರ್‌ ಮಾಧ್ಯಮದಲ್ಲಿ 6 ಕಲಾಕೃತಿಗಳು ಮೂಡಿ ಬಂದಿವೆ.

ಈ ಚಿತ್ರಕಲಾ ಪ್ರದರ್ಶನ ಮಾ.9ರಿಂದ 11ರವರೆಗೆ ಬೆಳಗ್ಗೆ 10ರಿಂದ ಸಂಜೆ 7.30ರವರೆಗೆ ಸಾರ್ವಜನಿಕ ವೀಕ್ಷಣೆಗೆ ಲಭ್ಯವಿರಲಿವೆ.

ಸುದ್ದಿಗೋಷ್ಠಿಯಲ್ಲಿ ಕಲಾವಿದರಾದ ಡಿ.ವಿ.ಶೆಟ್ಟಿಗಾರ್‌ ಹಾಗೂ ಗುರುಪ್ರಸಾದ್‌ ಉಪಸ್ಥಿತರಿದ್ದರು.