ಬೌದ್ಧ ಸನ್ಯಾಸಿಗೆ 1.96 ಕೋಟಿ ರೂ. ಪಂಗನಾಮ ಹಾಕಿದ ಫೇಸ್‌ಬುಕ್ ಸ್ನೇಹಿತೆ

ಮುಂಡಗೋಡ (ಉತ್ತರ ಕನ್ನಡ): ಫೇಸ್ಬುಕ್‌ನಲ್ಲಿ ಪರಿಚಯವಾದ ಅಮೆರಿಕ ಮಹಿಳೆಯೊಬ್ಬಳು ಇಲ್ಲಿನ ಟಿಬೆಟಿಯನ್‌ ಬೌದ್ಧ ಸನ್ಯಾಸಿಗೆ ನಂಬಿಸಿ 1.96 ಕೋಟಿ ರೂ. ವಂಚನೆ ಮಾಡಿರುವ ಘಟನೆ ಜರುಗಿದೆ.

ಟಿಬೆಟಿಯನ್‌ ಲಾಮಾ ಕ್ಯಾಂಪ್‌ ನಂ. 2ರಲ್ಲಿನ ಡ್ರೆಪುಂಗ್‌ ಬೌದ್ಧ ಮಂದಿರದ ನಿವಾಸಿ ಕರ್ಮಾ ಕೆಡುಪ್‌ (73) ಎಂಬವರೇ ವಂಚನೆಗೊಳಗಾದ ಬೌದ್ಧ ಸನ್ಯಾಸಿ.

ಘಟನೆಯ ವಿವರ: ಈ ಬೌದ್ಧ ಸನ್ಯಾಸಿಗೆ ಪೇಸ್ಬುಕ್‌ನಲ್ಲಿ ಪರಿಚಯವಾದ ಅಮೆರಿಕದ ರೋನಲ್ಡ ಮೈಕಲ್‌ ಎಂಬ ಮಹಿಳೆ ತಾನು ಸೇನೆಯಲ್ಲಿ ಕಾರ‍್ಯ ನಿರ್ವಹಿಸುತ್ತಿರುವುದಾಗಿ ನಂಬಿಸಿದ್ದಾಳೆ. ಅಲ್ಲದೇ ತಾನು ಅನಾಥೆ, ಭಾರತ ದೇಶದ ಅನಾಥ ಮಕ್ಕಳಿಗೆ ಆರ್ಥಿಕ ಸಹಾಯ ಮಾಡುವ ಇಚ್ಛೆ ವ್ಯಕ್ತಪಡಿಸಿ ಅದಕ್ಕಾಗಿ 2.5 ಮಿಲಿಯನ್‌ ಅಮೆರಿಕನ್‌ ಡಾಲರ್‌ನ್ನು ಕೊರಿಯರ್‌ ಮುಖಾಂತರ ಕಳುಹಿಸುವುದಾಗಿ ತಿಳಿಸಿದ್ದಾಳೆ. ಇದಕ್ಕೆ ಬೌದ್ಧ ಸನ್ಯಾಸಿ ಒಪ್ಪಿಕೊಂಡು ಹಣ ಕಳುಹಿಸುವಂತೆ ಹೇಳಿದ್ದಾರೆ.

ನಂತರ ಮತ್ತೆ ಕರೆ ಮಾಡಿದ ಮಹಿಳೆ ವಿಲಿಯಂ ಜಾನ್ಸನ್‌ ಎಂಬವರು ಭಾರತಕ್ಕೆ ಬರುತ್ತಿದ್ದಾರೆ. ಅವರ ಹತ್ತಿರವೇ ಹಣ ಕೊಟ್ಟು ಕಳುಹಿಸುವುದಾಗಿ ತಿಳಿಸಿ ಅವರ ಮೊಬೈಲ್‌ ನಂಬರ್‌ ಕೊಟ್ಟಿದ್ದಾಳೆ.

ನಂತರ ಬೌದ್ಧ ಸನ್ಯಾಸಿ ಕೆಡುಪ್‌ ಅವರು ವಿಲಿಯಂ ಜಾನ್ಸನ್‌ ಅವರೊಂದಿಗೆ ಸಂಪರ್ಕ ಸಾಧಿಸಿ ಹಣದ ಬಗ್ಗೆ ವಿಚಾರಿಸಿದ್ದಾರೆ. ಆಗ ಹಣ ಬಂದಿದೆ ಎಂದು ನಂಬಿಕೆ ಹುಟ್ಟಿಸಿದ ವಿಲಿಯಂ ಕಸ್ಟಮ್‌ ಕ್ಲಿಯರನ್ಸ್‌, ಇನ್ಕಂ ಟ್ಯಾಕ್ಸ್‌, ಪೊಲೀಸ್‌ ವೇರಿಫಿಕೇಶನ್‌ಗೆ ಹಣ ಪಾವತಿಸಬೇಕಾಗುತ್ತದೆ ಎಂದು ಹೇಳಿ ಭಾರತ ದೇಶದ ನಾನಾ ರಾಜ್ಯದ ವಿವಿಧ ಬ್ಯಾಂಕ್‌ ಖಾತೆಗಳ ಸಂಖ್ಯೆಗಳನ್ನು ನೀಡಿದ್ದಾನೆ. ಅದನ್ನು ನಂಬಿದ ಬೌದ್ಧ ಸನ್ಯಾಸಿ ನಾನಾ ಬ್ಯಾಂಕ್‌ಗಳ ಖಾತೆಗಳಿಗೆ 1,96,84,000 ರೂ.ಗಳನ್ನು ಜಮಾ ಮಾಡಿದ್ದಾರೆ.

ಆದರೆ 3 ತಿಂಗಳು ಕಳೆದರೂ ಯಾವುದೇ ಪಾರ್ಸಲ್‌ ಬಾರದಿರುವುದರಿಂದ ತಾನು ಮೋಸ ಹೋಗಿದ್ದಾಗಿ ತಿಳಿದ ಬೌದ್ಧ ಸನ್ಯಾಸಿ ಕರ್ಮಾ ಕೆಡುಪ್‌ ಕಾರವಾರ ಅಪರಾಧ ವಿಭಾಗದ ಪೊಲೀಸ್‌ ಠಾಣೆಗೆ ದೂರು ಸಲ್ಲಿಸಿದ್ದಾರೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಕ್ರಮ ಕೈಗೊಂಡಿದ್ದಾರೆ.