ವಾಕರಸಾ ಸಂಸ್ಥೆಗೆ 200 ಹೊಸ ಬಸ್‌

ಶಿರಸಿ : ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಗೆ ಜನವರಿ ತಿಂಗಳಲ್ಲಿ200 ಹೊಸ ಬಸ್‌ಗಳು ಬರಲಿವೆ ಎಂದು ಸಂಸ್ಥೆ ನೂತನ ಅಧ್ಯಕ್ಷ ವಿ.ಎಸ್‌.ಪಾಟೀಲ್‌ ಹೇಳಿದರು.

ತಾಲೂಕಿನ ಅಡಂಗಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕಿರವತ್ತಿಯಲ್ಲಿಕಾರ್ಯಕ್ರಮವೊಂದರಲ್ಲಿಶುಕ್ರವಾರ ಭಾಗವಹಿಸಿದ್ದ ಅವರು ಸುದ್ದಿಗಾರರೊಂದಿಗೆ ಮಾತನಾಡಿದರು. ಈಗಾಗಲೇ ಸಂಸ್ಥೆಯ ವ್ಯಾಪ್ತಿಯ ಜಿಲ್ಲೆಗಳಲ್ಲಿಹಳೆ ಬಸ್‌ಗಳನ್ನು ತೆಗೆದು ಹೊಸ ಬಸ್‌ಗಳನ್ನು ಓಡಿಸುತ್ತೇವೆ. ಅದರಲ್ಲೂದೂರದೂರುಗಳಿಗೆ ಇವು ಸಂಚರಿಸಲಿವೆ ಎಂದರು.

ಸಂಸ್ಥೆಯ ವ್ಯಾಪಿಯಲ್ಲಿ4996 ಬಸ್‌ಗಳಿದ್ದು ನಿತ್ಯ 15.80ಲಕ್ಷ ಕಿಮೀ ಓಡುತ್ತವೆ. ರಸ್ತೆಗಳು ಹಾಳಾಗಿದ್ದರಿಂದ ಸಮಯಕ್ಕೆ ಸರಿಯಾಗಿ ಬಸ್‌ಗಳು ತೆರಳುವುದಕ್ಕೆ ತೊಂದರೆಯಾಗುತ್ತಿದೆ. ಬಸ್‌ಗಳ ಬಿಡಿಭಾಗಗಳಿಗೆ ಹಾನಿಯಾಗುತ್ತಿದೆ. ಒಟ್ಟಾರೆ ಸಂಸ್ಥೆಗೆ ನಿತ್ಯ 50 ಲಕ್ಷ ರೂ.ಹಾನಿಯಾಗುತ್ತಿದೆ ಎಂದರು.

ಜಿಲ್ಲೆಯಲ್ಲೂಸಹ ಎಷ್ಟು ಹೊಸ ಬಸ್‌ಗಳ ಅಗತ್ಯತೆಯಿದೆ ಎಂಬುದರ ಬಗ್ಗೆ ಡಿಪೋ ಮ್ಯಾನೇಜರ್‌ಗಳ ಜತೆ ಚರ್ಚಿಸಿದ್ದೇವೆ. ಶಿರಸಿಯ ಹಳೆ ಬಸ್‌ ನಿಲ್ದಾಣ ಕೆಡವಿ ಪುನರ್‌ ನಿರ್ಮಾಣದ ಬಗ್ಗೆ ಸಾರ್ವಜನಿಕರ ಅಭಿಪ್ರಾಯ ಪಡೆಯಲು ಸಭೆ ನಡೆಸಲಾಗುತ್ತದೆ ಎಂದರು.