50 ಕಿಮೀ ಹೆಚ್ಚುವರಿ ದೂರ

ಚಂದ್ರಶೇಖರಯ್ಯ ಹಿರೇಮಠ ಮಂಡಗೋಡ: ಮುಂಡಗೋಡ, ಯಲ್ಲಾಪುರ ತಾಲೂಕುಗಳ ಸಂಪರ್ಕ ಕೊಂಡಿಯಾಗಿರುವ ಶಿಡ್ಲಗುಂಡಿ ಸೇತುವೆ ನೀರಿನ ರಭಸಕ್ಕೆ ಕೊಚ್ಚಿ ಹೋಗಿರುವುದು ತಾಲೂಕಿನ ಜನರಿಗೆ ತಲೆನೋವುಂಟು ಮಾಡಿದೆ.

ಮುಂಡಗೋಡ ತಾಲೂಕಿನ ಜನರು ಜಿಲ್ಲಾ ಕೇಂದ್ರಕ್ಕೆ ತೆರಳಬೇಕಾದರೆ ಯಲ್ಲಾಪುರ ಮಾರ್ಗವಾಗಿ ಕಾರವಾರಕ್ಕೆ ತೆರಳುತ್ತಾರೆ. ಈ ಮಾರ್ಗ ಬಂದ್‌ ಆದರೆ 50 ಕಿ.ಮೀ. ಹೆಚ್ಚಿಗೆ ಸುತ್ತಿ ಬಳಸಿ ಹೋಗಬೇಕಾದ ಸ್ಥಿತಿ ಜನರಿಗೆ ಎದುರಾಗಿದೆ.

ಹೌದು, ತಾಲೂಕಿನ ಯಲ್ಲಾಪುರ, ಮುಂಡಗೋಡ ತಾಲೂಕುಗಳ ಗಡಿಭಾಗದಲ್ಲಿರುವ ಶಿಡ್ಲಗುಂಡಿ ಸೇತುವೆ ನೀರಿನ ರಭಸಕ್ಕೆ ಕೊಚ್ಚಿ ಹೋಗಿರುವುದು ತಾಲೂಕಿನ ಜನರಿಗೆ ತಲೆನೋವಾಗಿದೆ. ಹುಬ್ಬಳ್ಳಿ ಭಾಗದಿಂದ ಹರಿದು ಬರುವ ನೀರು ಶಿಡ್ಲಗುಂಡಿ ಮೂಲಕ ಯಲ್ಲಾಪುರದತ್ತ ಹರಿದು ಹೋಗಿ ಅಲ್ಲಿ ಬೇಡ್ತಿ ನದಿಯಾಗಿದೆ. ಮೂರ್ನಾಲ್ಕು ದಿನಗಳ ಕಾಲ ನಿರಂತರ ಮಳೆ ಸುರಿದ ಪರಿಣಾಮ ಹಿಂದೆಂದೂ ಕಾಣದಷ್ಟು ನೀರು ಹರಿದು ಬಂದು ಸೇತುವೆ ಕೊಚ್ಚಿ ಹೋಗಿದೆ.

2009ರಲ್ಲಿ ಉದ್ಘಾಟನೆ: ಬ್ರಿಟಿಷರ ಕಾಲದಲ್ಲಿ ಸೇತುವೆ ನಿರ್ಮಿಸಲಾಗಿತ್ತು ಈ ಸೇತುವೆ ತುಂಬಾ ಶಿಥಲಾವಸ್ಥೆ ತಲುಪಿ 2004ರಲ್ಲಿ ಸೇತುವೆ ಕುಸಿಯಲಾರಂಭಿಸಿತ್ತು. ಇದನ್ನು ಕಂಡು ಸಂಚಾರ ಬಂದ್‌ ಮಾಡಿ ಹಳೆಯ ಸೇತುವೆ ತೆರವುಗೊಳಿಸಿ ನೂತನ ಸೇತುವೆ ನಿರ್ಮಿಸಲು ಯೋಜನೆ ರೂಪಿಸಲಾಯಿತು. ಅದರಂತೆ ಸೇತುವೆ ನಿರ್ಮಾಣ ಕಾಮಗಾರಿ ಆರಂಭಿಸಿ 2009ಕ್ಕೆ ಕಾಮಗಾರಿ ಪೂರ್ಣಗೊಳಿಸಿ ಉದ್ಘಾಟಿಸಲಾಯಿತು. ಐದು ವರ್ಷ ಈ ಮಾರ್ಗದಲ್ಲಿ ಸಂಚಾರ ಬಂದ್‌ ಆಗಿ ಜನರು ಪರದಾಡಿದ್ದರು.

ವಿದ್ಯಾರ್ಥಿಗಳಿಗೆ ತೊಂದರೆ :ತಾಲೂಕಿನ ಬಡ್ಡಿಗೇರಿ, ಗುಂಜಾವತಿ, ಮೈನಳ್ಳಿ, ಶಿಡ್ಲಗುಂಡಿ ಗ್ರಾಮಗಳಿಂದ ನೂರಕ್ಕೂ ಅಧಿಕ ವಿದ್ಯಾರ್ಥಿಗಳು ಯಲ್ಲಾಪುರದ ಶಾಲಾ, ಕಾಲೇಜುಗಳಿಗೆ ಪ್ರತಿದಿನ ಹೋಗುತ್ತಾರೆ. ಇದೀಗ ಶಿಡ್ಲಗುಂಡಿ ಸೇತುವೆ ಕೊಚ್ಚಿಹೋಗಿರುವಪರಿಣಾಮ ಶಾಲಾ, ಕಾಲೇಜಿಗೆ ಹೇಗೆ ಹೋಗಬೇಕು ಎಂದು ವಿದ್ಯಾರ್ಥಿಗಳಿಗೆ ದಿಕ್ಕು ತೋಚದಂತಾಗಿದೆ.

ಈ ಕುರಿತು ಹಿರಿಯ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳು ಇತ್ತ ಗಮನ ಹರಿಸಿ ಪ್ರಕೃತಿ ವಿಕೋಪದಡಿ ಅನುದಾನ ಬಳಕೆ ಮಾಡಿಕೊಂಡು ಕೂಡಲೇ ಶಿಡ್ಲಗುಂಡಿ ಸೇತುವೆ ನಿರ್ಮಾಣಕ್ಕೆ ಕ್ರಮ ಕೈಗೊಳ್ಳುವುದು ಅತಿ ಅವಶ್ಯವಿದೆ ಎಂಬುದು ಸಾರ್ವಜನಿಕರ ಒತ್ತಾಯ