ಆ್ಯಪ್ನಗರ

ನವೀಕರಣಕ್ಕೆ 700 ಕೋಟಿ: ಹೊಸ ವೇಷದಲ್ಲಿ ತವರಿಗೆ ಬರುತ್ತಿರುವ ವಿಕ್ರಮಾದಿತ್ಯ

ಈ ಯುದ್ಧ ನೌಕೆ ಮೂಲತಃ ಕಾರವಾರದ ಸೀ ಬರ್ಡ್‌ ನೌಕಾನೆಲೆಯದ್ದಾಗಿದೆ. ಇದನ್ನು ಪ್ರತಿ 2-3 ವರ್ಷಗಳಿಗೊಮ್ಮೆ ನಿರ್ವಹಣೆ ಮಾಡಬೇಕಿದೆ.

Vijaya Karnataka 25 Oct 2018, 9:34 am
ಕಾರವಾರ: ನವೀಕರಣ ಮತ್ತು ನಿರ್ವಹಣೆ ಕಾಮಗಾರಿಗಳಿಗಾಗಿ 5 ತಿಂಗಳಿಂದ ಕೊಚ್ಚಿನ್‌ನಲ್ಲಿದ್ದ ದೇಶದ ಏಕೈಕ ವಿಮಾನ ವಾಹಕ ಯುದ್ಧ ನೌಕೆ ಐಎನ್‌ಎಸ್‌ ವಿಕ್ರಮಾದಿತ್ಯ ಇನ್ನು ಒಂದೆರಡು ದಿನದೊಳಗೆ ವಾಪಸ್‌ ತನ್ನ ತವರು ನೆಲೆಯಾದ ಕಾರವಾರದ ಸೀ ಬರ್ಡ್‌ ನೌಕಾ ನೆಲೆಯನ್ನು ತಲುಪುವ ನಿರೀಕ್ಷೆ ಇದೆ.
Vijaya Karnataka Web ins


ಈ ಯುದ್ಧ ನೌಕೆ ಮೂಲತಃ ಕಾರವಾರದ ಸೀ ಬರ್ಡ್‌ ನೌಕಾನೆಲೆಯದ್ದಾಗಿದೆ. ಇದನ್ನು ಪ್ರತಿ 2-3 ವರ್ಷಗಳಿಗೊಮ್ಮೆ ನಿರ್ವಹಣೆ ಮಾಡಬೇಕಿದೆ. ಈ ಬಾರಿ ಕೊಚ್ಚಿನ್‌ನಲ್ಲಿರುವ ನೌಕಾಸೇನೆಯ ಹಡಗು ನಿರ್ವಹಣಾ ಕೇಂದ್ರದಲ್ಲಿ ಯುದ್ಧ ನೌಕೆಯ ನಿರ್ವಹಣಾ ಕಾಮಗಾರಿಗಳನ್ನು ನಡೆಸಲಾಯಿತು. ಸುಮಾರು 700 ಕೋಟಿ ರೂ. ವೆಚ್ಚದಲ್ಲಿ ಕೆಲ ದುರಸ್ತಿ, ಪೇಂಟಿಂಗ್‌ ಮೊದಲಾದ ಕೆಲಸಗಳನ್ನು ನಡೆಸಲಾಗಿದೆ. ಈ ನೌಕೆ ಈಗ ಯುದ್ಧದ ಅಗತ್ಯಗಳಿಗೆ ಸಂಪೂರ್ಣ ಸಜ್ಜುಗೊಂಡಿದ್ದು ಮಂಗಳವಾರ ಕೊಚ್ಚಿನ್‌ನಿಂದ ಕಾರವಾರದೆಡೆಗೆ ತೆರಳಿದೆ ಎಂದು ನೌಕಾನೆಲೆಯ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಮೇಲ್ದರ್ಜೆಗೆ ಯೋಜನೆ

ವಿಕ್ರಮಾದಿತ್ಯವನ್ನು ಇನ್ನಷ್ಟು ಮೇಲ್ದರ್ಜೆಗೇರಿಸಲು ನೌಕಾಸೇನೆ ಸಿದ್ಧತೆ ನಡೆಸಿದೆ. ತಲಾ 1000 ಟನ್‌ ಸಾಮರ್ಥ್ಯ‌ದ ಎರಡು ಇಂಧನ ಟ್ಯಾಂಕ್‌ಗಳನ್ನು ನೌಕೆಗೆ ಸದ್ಯದಲ್ಲೇ ಅಳವಡಿಸಲಾಗುತ್ತಿದೆ. ಕೋಲ್ಕತ್ತಾ ಮೂಲದ ತಿತಾಘರ್‌ ವೇಗೋನ್ಸ್‌ ಲಿ. ಕಂಪನಿಯು ಈಗಾಗಲೇ ಒಂದು ಟ್ಯಾಂಕ್‌ ನಿರ್ಮಾಣ ಮಾಡಿದ್ದು ನವೆಂಬರ್‌ನಲ್ಲಿ ಈ ಟ್ಯಾಂಕನ್ನು ನೌಕೆಗೆ ಅಳವಡಿಸಲಾಗುತ್ತದೆ. 12.5 ಮೀ.ಅಗಲ ಹಾಗೂ 68 ಮೀ. ಉದ್ದದ ಇನ್ನೊಂದು ಇಂಧನ ಟ್ಯಾಂಕನ್ನು ಡಿಸೆಂಬರ್‌ದಲ್ಲಿ ಅಳವಡಿಸಲಾಗುತ್ತಿದೆ.

ಇಂಧನ ಟ್ಯಾಂಕ್‌ಗಳ ಅಳವಡಿಕೆಯಿಂದ ನೌಕೆಯು ಯುದ್ಧದ ಸಂದರ್ಭದಲ್ಲಿ ದೀರ್ಘ ಕಾಲ ಸಮುದ್ರಯಾನ ಮಾಡಲು ಅನುಕೂಲವಾಗಲಿದೆ ಎಂಬುದು ನೌಕಾಸೇನೆ ಅಧಿಕಾರಿಗಳ ಅಭಿಪ್ರಾಯ.

ಇದಲ್ಲದೇ ಯುದ್ಧ ವಿಮಾನ ಬಳಕೆಯ ಅನುಕೂಲತೆಗೆ ಮರೈನ್‌ ಹೈಡ್ರಾಲಿಕ್‌ ಸಿಸ್ಟಂ ತಂತ್ರಜ್ಞಾನವನ್ನು ಸಹ 2019ರ ಮೇ ವೇಳೆಗೆ ನೌಕೆಯಲ್ಲಿ ಅಳವಡಿಸಲಾಗುತ್ತಿದೆ.

ಮತ್ತೆ ಗೋವಾಕ್ಕೆ

ಐಎನ್‌ಎಸ್‌ ವಿಕ್ರಮಾದಿತ್ಯ ಯುದ್ಧ ನೌಕೆ ಕೊಚ್ಚಿನ್‌ನಿಂದ ಬಂದ ಬಳಿಕ ಕೆಲವೇ ದಿನಗಳ ಕಾಲ ಮಾತ್ರ ಕಾರವಾರದಲ್ಲಿ ತಂಗಲಿದೆ. ಮತ್ತೆ ಯುದ್ಧ ನೌಕೆಯನ್ನು ಪರೀಕ್ಷಾರ್ಥಕ್ಕೆ ಗೋವಾಕ್ಕೆ ಕೊಂಡೊಯ್ಯಲಾಗುತ್ತದೆ.

ನೌಕೆಯ ವಿಶೇಷಗಳು

* ರಶಿಯಾ ಮೂಲದ ಈ ನೌಕೆ ಭಾರತೀಯ ನೌಕಾ ಸೇನೆಗೆ 2013ರ ನವೆಂಬರ್‌ನಲ್ಲಿ ಸೇರ್ಪಡೆ

* 284 ಮೀ. ಉದ್ದ ಹಾಗೂ 60 ಮೀ. ಅಗಲ, 40 ಸಾವಿರ ಟನ್‌ ಭಾರ

* ಮಿಗ್‌ 29 ಕೆ, ಕಾರ್ನೋವ್‌ 31, 28 ಸೇರಿ ನಾನಾ ಮಾದರಿಯ ವಿಮಾನಗಳನ್ನು ಸಮುದ್ರದಲ್ಲಿ ದೀರ್ಘ ಕಾಲ ಕೊಂಡೊಯ್ಯುವ ಸಾಮರ್ಥ್ಯ‌

* 22 ಡೆಕ್‌ಗಳ ಅಳವಡಿಕೆ, ಏಕಕಾಲಕ್ಕೆ 700 ಸೈನಿಕರು ಉಳಿಯುವ ಸಾಮರ್ಥ್ಯ‌

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ