ಆಟೋ, 7 ಬೈಕ್‌, 5 ಸೈಕಲ್‌ ಭಸ್ಮ

1ಕಾರವಾರ : ರಸ್ತೆಯ ಪಕ್ಕದಲ್ಲಿ ನಿಲ್ಲಿಸಿದ್ದ ಬೈಕ್‌ಗಳಿಗೆ ಬೆಂಕಿ ತಗುಲಿ ಸುಟ್ಟು ಕರಕಲಾದ ಘಟನೆ ಇಲ್ಲಿನ ಹರಿದೇವ ನಗರದಲ್ಲಿ ಮಂಗಳವಾರ ತಡರಾತ್ರಿ ನಡೆದಿದೆ.

ಹರಿದೇವನಗರದ ಸರಕಾರಿ ಗ್ರಂಥಾಲಯದ ಸಮೀಪ ನಿಲ್ಲಿಸಿದ್ದ 7 ಬೈಕ್‌, 5 ಸೈಕಲ್‌ ಹಾಗೂ ಒಂದು ಆಟೋ ಬೆಂಕಿಗೆ ಆಹುತಿಯಾಗಿವೆ.

ಈ ಭಾಗದಲ್ಲಿ ಎತ್ತರದ ಗುಡ್ಡಗಳಲ್ಲಿ ಮನೆ ಹೊಂದಿರುವವರು ಹಾಗೂ ಚಿಕ್ಕ ರಸ್ತೆಯ ಕಾರಣಕ್ಕೆ ಮನೆ ಆವಾರಕ್ಕೆ ವಾಹನ ಕೊಂಡೊಯ್ಯಲು ಆಗದವರು ಬೈಕ್‌ಗಳನ್ನು ಗ್ರಂಥಾಲಯದ ಸಮೀಪದ ರಸ್ತೆಪಕ್ಕದಲ್ಲಿ ನಿಲ್ಲಿಸುತ್ತಾರೆ. ಕೆಲ ವಾಹನಗಳು ನಿಲ್ಲಿಸಿದ ಜಾಗದಲ್ಲಿಯೇ ವಿದ್ಯುತ್‌ ಕಂಬವಿದ್ದು ಶಾರ್ಟ್‌ ಸಕ್ರ್ಯೂಟ್‌ ಆಗಿರುವ ಅನುಮಾನವನ್ನು ಕೆಲವರು ವ್ಯಕ್ತಪಡಿಸಿದ್ದಾರೆ.

ಇನ್ನೊಂದೆಡೆ ಮೊದಲು, ಈ ಭಾಗದಲ್ಲಿ ನಿಲ್ಲಿಸಿದ್ದ ಬೈಕ್‌ನಿಂದ ಪೆಟ್ರೋಲ್‌ ಕದಿಯುತ್ತಿದ್ದರು. ಅದೇ ರೀತಿ ಮಂಗಳವಾರ ರಾತ್ರಿ ಕೂಡ ಪೆಟ್ರೋಲ್‌ ಕದಿಯುವ ವೇಳೆ ಈ ಘಟನೆ ನಡೆದಿರುವ ಸಾಧ್ಯತೆ ಇದೆ ಎಂಬುದು ಇನ್ನು ಕೆಲವರ ಶಂಕೆಯಾಗಿದೆ. ಈ ಕುರಿತು ಶಹರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.