ಬ್ಯಾಗ್‌ ಲೆಸ್‌ ಡೇ ಸಂಭ್ರಮ

ಶಿರಸಿ : ಶಾಲೆಗೆ ತೆರಳುವ ವಿದ್ಯಾರ್ಥಿಗಳಿಗೆ ಪಠ್ಯಪುಸ್ತಕಗಳುಳ್ಳ ಬ್ಯಾಗ್‌ ಹೊರೆಯೇ ಹೆಚ್ಚು. ಇಂತಹ ಸಂದರ್ಭದಲ್ಲಿ ತಿಂಗಳಲ್ಲಿ ಮೂರನೇ ಶನಿವಾರ ನಿಗದಿ ಪಡಿಸಿರುವ ಬ್ಯಾಗ್‌ ಲೆಸ್‌ ಡೇ ಮಕ್ಕಳಲ್ಲಿ ಖುಷಿಯನ್ನುಂಟು ಮಾಡುತ್ತಿದೆ.

ಈಗಂತೂ ಎಲ್‌ಕೆಜಿಯಿಂದ ಹಿಡಿದು ಕಿರಿಯ ಪ್ರಾಥಮಿಕ, ಹಿರಿಯ ಪ್ರಾಥಮಿಕ ಹೀಗೆ ಎಲ್ಲ ವಿದ್ಯಾರ್ಥಿಗಳ ಶಾಲಾ ಬ್ಯಾಗ್‌ ತುಂಬಿಯೇ ಇರುತ್ತದೆ. ಶಿಕ್ಷ ಣ ಗುಣಮಟ್ಟ ಹೆಚ್ಚಿಸುವ, ಪೈಪೋಟಿಯ ಯುಗದಲ್ಲಿ ವಿದ್ಯಾರ್ಥಿಗಳನ್ನು ಹಲವು ಬಗೆಯಲ್ಲಿ ಸಿದ್ಧಪಡಿಸುವ ಭಾಗವಾಗಿ ನೋಟ್‌ಬುಕ್‌ಗಳ ಸಂಖ್ಯೆ ಜಾಸ್ತಿಯಾಗಿದೆ. ಇದರಿಂದ ಶಾಲೆಗಳಿಗೆ ಕೊಂಡೊಯ್ಯುವ ಬ್ಯಾಗ್‌ಗಳಲ್ಲಿ ಎಷ್ಟೇ ಕಂಪಾರ್ಟ್‌ಮೆಂಟ್‌ಗಳಿದ್ದರೂ ಸಾಲದಾಗಿದೆ. ಇಷ್ಟೊಂದು ಹೊರೆಯ ಬ್ಯಾಗ್‌ನ್ನು ವಿದ್ಯಾರ್ಥಿಗಳು ಶಾಲೆಗೆ ಹೊತ್ತುಕೊಂಡು ಹೋಗುವಷ್ಟರಲ್ಲಿ ಸುಸ್ತಾಗುತ್ತಾರೆ. ಇಂತಹ ಒತ್ತಡವನ್ನು ನಿವಾರಿಸುವ ದೃಷ್ಟಿಯಿಂದ ಸರಕಾರ ಈಗಾಗಲೇ ಶಾಲಾ ಬ್ಯಾಗ್‌ ಎಷ್ಟು ಕೆಜಿ ಪ್ರಮಾಣ ಹೊಂದಿರಬೇಕು ಎಂಬುದನ್ನು ಸೂಚಿಸಿದೆ.

ಇದರ ಜತೆಯಲ್ಲಿ ಮುಖ್ಯವಾಗಿ ತಿಂಗಳ ಮೂರನೇ ಶನಿವಾರ ಬ್ಯಾಗ್‌ ರಹಿತ ದಿನವನ್ನಾಗಿ ನಿಗದಿಗೊಳಿಸಲಾಗಿದೆ. ಈ ದಿನ ಶಾಲೆಗೆ ವಿದ್ಯಾರ್ಥಿಗಳು ಬ್ಯಾಗ್‌ ರಹಿತವಾಗಿ ಬರುವುದಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಆ ದಿನ ಪಠ್ಯ ಚಟುವಟಿಕೆಗಳಿಗಿಂತ ಪಠ್ಯೇತರ ಚಟುವಟಿಕೆಗಳನ್ನು ಹೆಚ್ಚಾಗಿ ನಡೆಸಲಾಗುತ್ತಿದೆ. ವಿದ್ಯಾರ್ಥಿಗಳಲ್ಲಿ ಇದೊಂದು ರೀತಿಯಲ್ಲಿ ಸಂಭ್ರಮದ ವಾತಾವರಣ ಮೂಡಿಸಿದೆ.

ಸಾಮಾನ್ಯವಾಗಿ ಚಿಕ್ಕ ಮಕ್ಕಳಿಗೆ ಬೆಳಗ್ಗೆ ಎದ್ದು ಶಾಲೆಗೆ ಹೋಗುವುದೆಂದರೆ ಸಂಕಟ. ಇಂತಹ ಸಂದರ್ಭದಲ್ಲಿ ಭಾರವುಳ್ಳ ಬ್ಯಾಗ್‌, ಜತೆಯಲ್ಲಿ ತಿಂಡಿ ಬ್ಯಾಗ್‌ ಇವನ್ನೆಲ್ಲ ಹಿಡಿದು ತೆರಳುವ ಹೊತ್ತಿಗೆ ಸಾಕಪ್ಪ ಸಾಕು ಎನ್ನುವಂತಾಗುತ್ತದೆ. ತಮ್ಮ ಸಾಮರ್ಥ್ಯ‌ ಮೀರಿ ಬ್ಯಾಗ್‌ ಭಾರ ಇರುವುದರಿಂದ ಅದನ್ನು ಹೆಗಲಲ್ಲಿ ಅತ್ತಿಂದಿತ್ತ ಹೊರಳಾಡಿಸುವುದು, ಹೆಗಲಿನಿಂದ ತೆಗೆದು ಕೆಳಕ್ಕಿಡುವುದಕ್ಕೆ ಮಕ್ಕಳು ಹರಸಾಹಸ ಪಡುವ ಸ್ಥಿತಿಯಿದೆ. ಹೀಗಾಗಿ ತಿಂಗಳಲ್ಲಿ ಒಂದು ದಿನ ಬ್ಯಾಗ್‌ ಇಲ್ಲದೇ ಬರುವ ನಿರಾಳ ವಾತಾವರಣ ದೊರೆಯುತ್ತಿದೆ. ಇದು ಸಾಕಷ್ಟು ವಿದ್ಯಾರ್ಥಿಗಳ ಮೊಗದಲ್ಲಿ ಸಂತಸದ ಭಾವ ಮೂಡಿಸುತ್ತಿದೆ.

ಸರಕಾರ ಕಳೆದ ಮೇ ನಲ್ಲಿಯೇ ಬ್ಯಾಗ್‌ ಲೆಸ್‌ ಡೇ ಆರಂಭಿಸುವಂತೆ ಸೂಚನೆ ನೀಡಿತ್ತು. ಅದರನ್ವಯ ಜೂನ್‌ ಮಧ್ಯಭಾಗದಿಂದ ಇದು ಅನುಷ್ಠಾನಗೊಂಡಿದೆ. ಈಗಾಗಲೇ ಬ್ಯಾಗ್‌ ರಹಿತ ಎರಡು ದಿನ ನಡೆಸಲಾಗಿದೆ. ಇದು ಸರಕಾರಿ, ಅನುದಾನಿತ ಹಾಗೂ ಅನುದಾನ ರಹಿತ ಹೀಗೆ ಪ್ರಾಥಮಿಕ ಹಾಗೂ ಪ್ರೌಢಶಾಲೆಗಳಲ್ಲಿ ನಡೆಸಲಾಗುತ್ತಿದೆ.

ಲಕ್ಷಾಂತರ ವಿದ್ಯಾರ್ಥಿಗಳು : ಶಿರಸಿ ಶೈಕ್ಷ ಣಿಕ ಜಿಲ್ಲೆಯ ಶಿರಸಿ, ಸಿದ್ದಾಪುರ, ಯಲ್ಲಾಪುರ, ಮುಂಡಗೋಡ, ಹಳಿಯಾಳ, ಜೊಯಿಡಾ ಹೀಗೆ ಆರು ತಾಲೂಕುಗಳ ವ್ಯಾಪ್ತಿಯಲ್ಲಿ ಲಕ್ಷಾಂತರ ಸಂಖ್ಯೆಯಲ್ಲಿ ಸರಕಾರಿ, ಅನುದಾನಿತ ಹಾಗೂ ಅನುದಾನ ರಹಿತ ಶಾಲೆಗಳಲ್ಲಿ ವಿದ್ಯಾರ್ಥಿಗಳು ಅಭ್ಯಸಿಸುತ್ತಿದ್ದಾರೆ. ಅವರಿಗೆಲ್ಲ ಬ್ಯಾಗ್‌ ರಹಿತ ದಿನ ಸಹಜವಾಗಿ ಹಬ್ಬದ ದಿನದ ಸಂಭ್ರಮ ಮೂಡಿಸುತ್ತಿದೆ

ಏನಿದು ಬ್ಯಾಗ್‌ ಲೆಸ್‌ ಡೇ : ತಿಂಗಳ ಮೂರನೇ ಶನಿವಾರ ಶಾಲಾ ವಿದ್ಯಾರ್ಥಿಗಳ ಹೆಗಲಿಗೆ ಬ್ಯಾಗ್‌ ಇರುವುದಿಲ್ಲ. ಆ ದಿನ ಶಾಲಾ ಪುಸ್ತಕಗಳನ್ನು ಮಕ್ಕಳು ತರಬೇಕಾಗಿದ್ದಿಲ್ಲ. ಶನಿವಾರದ ಆ ಅರ್ಧ ದಿನ ಪಠ್ಯೇತರ ಚಟುವಟಿಕೆಗಳೇ ಹೆಚ್ಚಾಗಿ ನಡೆಯುತ್ತವೆ. ನಿತ್ಯ ತರಗತಿಗಳಲ್ಲಿ ಪಾಠ ಕೇಳುತ್ತಾ ಒತ್ತಡ, ಬೇಸರ ಸಹಜವಾಗಿ ವಿದ್ಯಾರ್ಥಿಗಳಲ್ಲಿ ಮೂಡಿರುತ್ತದೆ. ಹೀಗೆ ಒಂದು ಬ್ಯಾಗ್‌ ತರದೇ ಪಠ್ಯೇತರ ಚಟುವಟಿಕೆಗಳಿದ್ದರೆ ಸ್ವಲ್ಪ ರಿಲ್ಯಾಕ್ಸ್‌ ಆಗುವಂತಾಗುತ್ತದೆ. ಇದು ಹೊಸ ಲೋಕಕ್ಕೆ ಅವರನ್ನು ತೆರೆದುಕೊಳ್ಳುತ್ತದೆ. ಈಗಾಗಲೇ ಶಿಕ್ಷ ಣ ಇಲಾಖೆ ಅಧಿಕಾರಿಗಳು ಶಾಲೆಗಳಿಗೆ ತೆರಳಿ ಬ್ಯಾಗ್‌ ಲೆಸ್‌ ಡೇ ಅನುಷ್ಠಾನವನ್ನು ಸಹ ವೀಕ್ಷಿಸುತ್ತಿದ್ದಾರೆ.


ಖುಷಿ ಖುಷಿ ದಿನ : ಶೈಕ್ಷ ಣಿಕ ವರ್ಷ ಆರಂಭವಾಗಿ ಒಂದೂವರೆ ತಿಂಗಳು ಕಳೆದಿದ್ದು ಈ ಬಾರಿ ಜಾರಿಗೆ ತಂದಿರುವ ಬ್ಯಾಗ್‌ ರಹಿತ ದಿನದಂದು ವಿದ್ಯಾರ್ಥಿಗಳು ಹಾಡು, ಕಥೆ ಹೇಳುವುದರಲ್ಲಿ ತೊಡಗಿಕೊಳ್ಳುತ್ತಿದ್ದಾರೆ. ಕ್ವಿಜ್‌ಗಳಲ್ಲಿ ಭಾಗವಹಿಸುತ್ತಿದ್ದಾರೆ. ಆಟ ಆಡಲು ಸಮಯ ಸಿಗುತ್ತಿದೆ. ಪ್ರತಿಭಾ ಕಾರಂಜಿ ಸ್ಪರ್ಧೆಯ ಸಿದ್ಧತೆ ನಡೆಸುತ್ತಿದ್ದಾರೆ. ಹೀಗೆ ಪಠ್ಯ ಪೂರಕ ಹಾಗೂ ಪಠ್ಯೇತರ ಚಟುವಟಿಕೆಗೆ ಈ ದಿನ ಅವಕಾಶವಾಗುತ್ತಿದೆ. ಒಟ್ಟಾರೆ ಮಕ್ಕಳು ಖುಷಿಯಿಂದ ಕಳೆಯುವುದಕ್ಕೆ ಅನುಕೂಲವಾಗಿದೆ.