ಪೋಪ್‌ ಫ್ರಾನ್ಸಿಸ್‌ಗೆ ಭಟ್ಕಳ ಕಲಾಕೃತಿ ಕಾಣಿಕೆ

ಭಟ್ಕಳ: ತಾಲೂಕಿನ ಬೆಂಗ್ರೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿಕೆಲವು ದಶಕಗಳಿಂದ ಅಸ್ತಿತ್ವದಲ್ಲಿಇರುವ ನಾಡಿನ ಪ್ರಸಿದ್ಧ ಕರಕುಶಲ ವಸ್ತುಗಳ 'ಉಸಿರಾ ಇಂಡಸ್ಟ್ರೀ' ಉತ್ಪನ್ನಗಳು ಇದೀಗ ಇಟಲಿಯ ರೋಮ್‌ ನಗರದ ವ್ಯಾಟಿಕನ್‌ ಮ್ಯೂಸಿಯಂ ಸೇರಲಿವೆ.

ಇತ್ತೀಚಿಗೆ ವ್ಯಾಟಿಕನ್‌ ಸಿಟಿಯಲ್ಲಿವಿಶ್ವದ ಕ್ಯಾಥೋಲಿಕ್‌ ಚರ್ಚ್ಗಳ ಪರಮೋಚ್ಛ ಧರ್ಮಗುರು ಪೋಪ್‌ ಫ್ರಾನ್ಸಿಸ್‌ ಅಧ್ಯಕ್ಷತೆಯಲ್ಲಿನಡೆದ ಭಾರತದ ಬಿಷಪ್‌ಗಳ ಮಹಾಸಭೆಯಲ್ಲಿಕಲಾಕೃತಿಗಳನ್ನು ಅರ್ಪಿಸಲಾಯಿತು.

'ಉಸಿರಾ' ಮಾಲಕ ಎಂ.ಡಿ.ಮ್ಯಾಥ್ಯೂ ತಯಾರಿಸಿದ ಲಾವಂಚದ ಹಾರ ಮತ್ತು ಲಾವಂಚದ ದಿವ್ಯ ಸಂಸ್ಕಾರದ ಕಲಾಕೃತಿಯನ್ನು ಬೆಳ್ತಂಗಡಿಯ ಬಿಷಪ್‌ ಲಾರೆನ್ಸ್‌ ಮೂಲಕ ಧರ್ಮಗುರು ಫ್ರಾನ್ಸಿಸ್‌ ಇವರಿಗೆ ಗೌರವ ಪೂರ್ವಕ ಕಾಣಿಕೆಯಾಗಿ ಅರ್ಪಿಸಲಾಯಿತು.

ಈ ವೇಳೆ ಲಾವಂಚದ ಕರಕುಶಲ ವಸ್ತುಗಳನ್ನು ಮೆಚ್ಚಿಕೊಂಡ ಪೋಪ್‌ ಇವುಗಳನ್ನು ಪ್ರಸಿದ್ಧ ವ್ಯಾಟಿಕನ್‌ ಮ್ಯೂಸಿಯಂನಲ್ಲಿಪ್ರದರ್ಶನಕ್ಕೆ ಇಡಲಾಗುತ್ತದೆ ಎಂದು ತಿಳಿಸಿರುವುದಾಗಿ ಬಿಷಪ್‌ ಲಾರೆನ್ಸ್‌ ಮೂಲಕ ಮಾಹಿತಿ ಸಿಕ್ಕಿದೆ ಎಂದು ಎಂ.ಡಿ.ಮ್ಯಾಥ್ಯೂ ಪ್ರಕಟಣೆಯಲ್ಲಿತಿಳಿಸಿದ್ದಾರೆ. ಇದರೊಂದಿಗೆ ದೇಶಾದ್ಯಂತ ಗಮನ ಸೆಳೆದಿರುವ ಭಟ್ಕಳ 'ಉಸಿರಾ' ಕರಕುಶಲ ವಸ್ತುಗಳು ಜಗತ್ತಿನ ಮನ್ನಣೆಗೂ ಪಾತ್ರರಾಗುತ್ತಿರುವುದು ಹೆಮ್ಮೆಯ ಸಂಗತಿಯಾಗಿದೆ.