ಜ.ಫಕೀರೇಶ್ವರರ ಸಂಭ್ರಮದ ರಥೋತ್ಸವ

ಶಿರಹಟ್ಟಿ (ಗದಗ) : ದ್ವೇಷ-ಬಿಡು, ಪ್ರೀತಿ-ಮಾಡು ಎಂಬ ದಿವ್ಯಸಂದೇಶವನ್ನು ಜಗತ್ತಿಗೆ ಸಾರಿ ದೇಶದ ಉದ್ದಗಲಕ್ಕೂ ಸಂಚರಿಸಿ ಕೋಮು-ಸೌಹಾರ್ದತೆಯ ಹರಿಕಾರನಾಗಿ, ರಾಜ-ಮಹಾರಾಜರುಗಳಿಂದ ಬಿರುದು ಬಾವಲಿಗಳನ್ನು ಪಡೆದು ಶಿರಹಟ್ಟಿಗೆ ಬಂದು ನೆಲೆಸಿ ಸರ್ಪರೂಪಿಯಾಗಿ ದೇಹತ್ಯಾಗ ಮಾಡಿದ ಕರ್ತೃ ಶ್ರೀ ಜ.ಫಕೀರೇಶ್ವರರ ಜಾತ್ರಾ ಮಹೋತ್ಸವ ಶನಿವಾರ ಸಂಜೆ ಸಹಸ್ರಾರು ಭಕ್ತರ ಹರ ಹರ ಮಹಾದೇವ ಜಯಘೋಷಣೆಯೊಂದಿಗೆ ಸಂಭ್ರಮದಿಂದ ಜರುಗಿತು.

ಇದಕ್ಕೂ ಮೊದಲು ಜ.ಫಕೀರ ಸಿದ್ದರಾಮ ಸ್ವಾಮೀಜಿಗಳು ಶ್ರೀಮಠದ ಪರಂಪರೆಯಂತೆ ಹಿಂದೂ-ಮುಸ್ಲಿಂ ಭಾವೈಕ್ಯತೆ ಸಾರುವ ಕೇಸರಿ ಹಾಗೂ ಹಸಿರು ಪೋಷಾಕುಗಳನ್ನು ಧರಿಸಿ, ಮೈ ಮೇಲೆ ವಜ್ರ-ವೈಡೂರ‍್ಯಗಳನ್ನು ಧರಿಸಿ ಅಶ್ವಾರೂಢರಾಗಿ ಕರ್ತೃ ಶ್ರೀ ಫಕೀರೇಶ್ವರರ ಗದ್ದುಗೆಗೆ ಪೂಜೆ ಸಲ್ಲಿಸಿ ತದನಂತರ ರಥದ ಚಕ್ರಕ್ಕೆ ಟೆಂಗಿನಕಾಯಿ ಒಡೆಯುವುದರ ಮೂಲಕ ರಥೋತ್ಸವಕ್ಕೆ ಚಾಲನೆ ನೀಡಿದರು.

ವಿಶೇಷ ಪರಂಪರೆಯನ್ನು ಹೊಂದಿರುವಂತಹ ಶ್ರೀ ಮಠಕ್ಕೆ ರಾಜ್ಯ ಹಾಗೂ ಹೊರರಾಜ್ಯಗಳಿಂದಲೂ ಜಾತ್ರಾ ಮಹೋತ್ಸವಕ್ಕೆ ಸಹಸ್ರಾರು ಸಂಖ್ಯೆಯಲ್ಲಿ ಭಕ್ತರು ಆಗಮಿಸಿ ರಥೋತ್ಸವದಲ್ಲಿ ಭಾಗಿಯಾಗಿದ್ದರು. ರಥೋತ್ಸವಕ್ಕೆ ಚಾಲನೆ ಸಿಗುತ್ತಿದ್ದಂತೆಯೇ ಭಕ್ತರು ರಥದ ಕಳಸಕ್ಕೆ ಉತ್ತತ್ತಿ, ಬಾಳೆಹಣ್ಣು ಸಮರ್ಪಿಸಿ ಭಕ್ತಿ ಭಾವದಿಂದ ಫಕೀರೇಶ್ವರರಿಗೆ ಜೈಕಾರ ಹಾಕಿದರು. ಪಟ್ಟಣದ ಎಲ್ಲ ಪ್ರಮುಖ ಬೀದಿಗಳಲ್ಲಿಯೂ ಸಹ ಬೆಳಗ್ಗೆಯಿಂದಲೇ ಭಕ್ತರ ದಂಡು ಹರಿದು ಬರುವುದು ಸಾಮಾನ್ಯವಾಗಿತ್ತು. ಜನದಟ್ಟಣೆ ನಿಯಂತ್ರಿಸಲು ಪೊಲೀಸರು ಅಗತ್ಯ ಬಂದೋಬಸ್ತ್‌ ವ್ಯವಸ್ಥೆ ಮಾಡಿದ್ದರು.