ಮಲವಳ್ಳಿಯಲ್ಲಿ ಹೆಚ್ಚಿದ ಚಿಕೂನ್‌ಗುನ್ಯಾ:ಆತಂಕ

ಮುಂಡಗೋಡ: ತಾಲೂಕಿನ ಚೌಡಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಮಲವಳ್ಳಿ ಗ್ರಾಮದ ನಾಲ್ಕು ಜನರಿಗೆ ಚಿಕೂನ್‌ ಗುನ್ಯಾ ಕಾಯಿಲೆ ಇದೆ ಎಂದು ಮುಂಡಗೋಡಿನ ತಾಲೂಕಾ ಆಸ್ಪತ್ರೆಯ ಆಡಳಿತಾಧಿಕಾರಿ ಎಚ್‌.ಎಫ್‌.ಇಂಗಳೆ ತಿಳಿಸಿದ್ದಾರೆ.

8-10 ದಿನಗಳಿಂದ ಮೈಕೈ ನೋವು ಜ್ವರ, ಸಂಧಿನೋವಿನಿಂದ ಬಳಲುತ್ತಿರುವವರ ಸಂಖ್ಯೆ 16ಕ್ಕಿಂತ ಹೆಚ್ಚಾಗಿತ್ತು. ಇದರಿಂದ ಗ್ರಾಮದ ಹಲವರು ಭಯಭೀತರಾಗಿದ್ದರು. ಇದನ್ನು ಗಂಭೀರವಾಗಿ ಪರಿಗಣಿಸಿದ್ದ ತಾಲೂಕಾ ಆಸ್ಪತ್ರೆಯವರು ನಿರಂತರ ಚಿಕಿತ್ಸೆ ಮಾಡಿದ್ದರು. ಆಡಳಿತಾಧಿಕಾರಿ ಡಾ.ಎಚ್‌.ಎಫ್‌.ಇಂಗಳೆಯವರು ನಾಲ್ಕು ಜನರ ರಕ್ತಮಾದರಿ ಪಡೆದು ಕಾರವಾರಕ್ಕೆ ಕಳುಹಿಸಿದ್ದರು. ಈಗ ವರದಿ ಬಂದಿದ್ದು ಚಿಕೂನ್‌ ಗುನ್ಯಾ ಎಂದು ದೃಢಪಟ್ಟಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

16 ಜನರಿಗೆ ಜ್ವರ ಹಾಗೂ ಸಂಧಿನೋವು ಕಾಣಿಸಿಕೊಂಡಿತ್ತು. ಗ್ರಾಮದ ಒಂದು ಓಣಿಯಲ್ಲಿಐದಾರು ಕುಟುಂಬದವರಿಗೆ ಮಾತ್ರ ಮೊದಲು ಸಮಸ್ಯೆ ಕಾಣಿಸಿತ್ತು. ನಂತರ ಇತರ ಕಡೆ ವ್ಯಾಪಿಸಿತ್ತು. ತಾಲೂಕಾ ಆಸ್ಪತ್ರೆಯ ಸಿಬ್ಬಂದಿ, ವೈದ್ಯರು ಮಂಗಳವಾರ ಗ್ರಾಮದ ಪ್ರತಿ ಮನೆಗೆ ತೆರಳಿ ಸಮೀಕ್ಷೆ ನಡೆಸಿದ್ದರು. ಈಗ ಮತ್ತೆ ಹೆಚ್ಚಿನ ಕಾಳಜಿ ವಹಿಸಿದ್ದಾರೆ.