ರಸ್ತೆಗಳಲ್ಲಿ ಬಿರುಕು: ಸಂಚಾರಕ್ಕೆ ಅಡ್ಡಿ

ಸಿದ್ದಾಪುರ : ಸಿದ್ದಾಪುರ-ಕುಮಟಾ, ಸಿದ್ದಾಪುರ-ಸೊರಬಾ, ಸಿದ್ದಾಪುರ-ಹೊನ್ನಾವರ ರಸ್ತೆಗಳು ಬಿರುಕು ಬಿಟ್ಟಿದ್ದು ವಾಹನ ಸಂಚಾರಕ್ಕೆ ಅಡಚಣೆಯಾಗಿತ್ತು. ಸಿದ್ದಾಪುರ-ಕುಮಟಾ ರಸ್ತೆ ಹೊರತು ಪಡಿಸಿ ಉಳಿದ ರಸ್ತೆಗಳಲ್ಲಿ ಭಾನುವಾರ ಲಘುವಾಹನಗಳಿಗೆ ಹಾಗೂ ಬಸ್‌ಗಳ ಸಂಚಾರಕ್ಕೆ ಅನುಮತಿ ನೀಡಲಾಗಿದ್ದು, ಭಾರಿ ವಾಹನಗಳ ಓಡಾಟವನ್ನು ತಡೆಹಿಡಿಯಲಾಗಿದೆ.

ಕುಮಟಾ-ಸಿದ್ದಾಪುರ ರಾಜ್ಯ ಹೆದ್ದಾರಿಯಲ್ಲಿ ಅಲ್ಲಲ್ಲಿ ಮರಗಳು, ಮಣ್ಣು ಗುಡ್ಡಗಳು ಕುಸಿಯುತ್ತಿದ್ದು, ವಾಹನ ಓಡಾಟಕ್ಕೆ ತೊಂದರೆಯಾಗುತ್ತಿದೆ. ದೊಡ್ಮನೆಯಿಂದ ರಸ್ತೆಗಳು ಸಂಪೂರ್ಣ ಹಾಳಾಗಿದ್ದು, ಬಡಾಳ ಘಾಟಿಯಲ್ಲಿ ವಾಹನ ಸಂಚಾರಕ್ಕೆ ಅವಕಾಶ ನೀಡುತ್ತಿಲ್ಲ. ಸಿದ್ದಾಪುರದಿಂದ ಬೀರಲಮಕ್ಕಿ, ಮೆಣಸಿ, ಲಂಬಾಪುರ, ಹಾರ್ಸಿಕಟ್ಟಾ ಸೇರಿದಂತೆ ವಿವಿಧ ರಸ್ತೆಗಳಲ್ಲಿ ಪ್ರತಿದಿನ ಗುಡ್ಡ, ಮರಗಳು ಕುಸಿಯುತ್ತಿದ್ದು, ಲೊಕೋಪಯೋಗಿ ಇಲಾಖೆಯವರು ಜೆಸಿಬಿ ಮೂಲಕ ಮಣ್ಣು ಮತ್ತು ಮರವನ್ನು ತೆರವುಗೊಳಿಸುತ್ತಿದ್ದಾರೆ. ಇದರಿಂದ ವಿಳಂಬವಾದರೂ ವಾಹನ ಸಂಚಾರಕ್ಕೆ ಅನುಕೂಲವಾಗುತ್ತಿದೆ.