ಮೌಢ್ಯ ಅಳಿಸುವಲ್ಲಿ ಶ್ರಮಿಸಿದ ದಾಸಿಮಯ್ಯ

ಶಿರಸಿ : ಸಮಾಜದ ಮೌಢ್ಯಗಳನ್ನು ಅಳಿಸುವಲ್ಲಿ ಶ್ರಮ ವಹಿಸಿದ್ದ ದೇವರ ದಾಸಿಮಯ್ಯ ಅವರು ಸಮಾಜದಲ್ಲಿ ಸಜ್ಜನಿಕೆಯ, ಸೌಮ್ಯ ಭಾವನೆಯ ವ್ಯಕ್ತಿಯಾಗಿ ಗುರುತಿಸಿಕೊಂಡಿದ್ದರು ಎಂದು ತಹಸೀಲ್ದಾರ ಎಂ.ಆರ್‌ ಕುಲಕರ್ಣಿ ಹೇಳಿದರು.

ತಾಲೂಕು ಆಡಳಿತದಿಂದ ಇಲ್ಲಿಯ ತಹಸೀಲ್ದಾರ ಕಚೇರಿ ಸಭಾಂಗಣದಲ್ಲಿ ನಡೆದ ಶ್ರೀ ದೇವರ ದಾಸಿಮಯ್ಯ ಜಯಂತ್ಯುತ್ಸವ ಉದ್ಘಾಟಿಸಿ ಅವರು ಮಾತನಾಡಿದರು.

ಸೀರೆ ನೇಯುವ ಮಧ್ಯಮ ವರ್ಗದ ಕುಟುಂಬದಲ್ಲಿ ಜನಿಸಿದ ಶ್ರೀ ದೇವರ ದಾಸೀಮಯ್ಯ ಸಮಾಜದಲ್ಲಿ ರಾಮನಾಥ ನಾಮಾಂಕಿತರಾಗಿ ದೇವ ಬ್ರಾಹ್ಮಣರಿಗೆ ಕುಲ ಗುರುಗಳಾಗಿಯೂ ಪ್ರಸಿದ್ಧಿ ಪಡೆದಿದ್ದರು. ಭಕ್ತಿ ಸಾಧನೆಯಲ್ಲಿ ತೊಡಗಿಕೊಂಡು ಮಾನವನ ಸಹಜ ಮನೋಭಾವ ಆಸ್ತಿ ಗಳಿಕೆಯಿಂದ ಅವರು ದೂರ ಉಳಿದಿದ್ದರು. ಜೀವನದುದ್ದಕ್ಕೂ ದೇವರ ಸ್ಮರಣೆಯಲ್ಲಿ ತೊಡಗಿಕೊಂಡಿದ್ದರು ಎಂದರು.

ಲೋಕಸಭಾ ಚುನಾವಣೆಯ ನೀತಿ ಸಂಹಿತೆಯ ಹಿನ್ನೆಲೆಯಲ್ಲಿ ಜಯಂತಿಯನ್ನು ಸರಳವಾಗಿ ಆಚರಿಸಲಾಗುತ್ತಿದೆ. ಪ್ರಸಿದ್ಧ ಶರಣರ ಜೀವನ ಮೌಲ್ಯಗಳನ್ನು ಜನತೆಗೆ ಸುಲಭವಾಗಿ ದೊರಕುವಂತೆ ಮಾಡಲು ಸೂಕ್ತ ಕ್ರಮಗಳನ್ನು ಕೈಗೊಳ್ಳಬೇಕಾದ ಅಗತ್ಯತೆ ಇದೆ ಎಂದರು. ಪ್ರಮುಖರಾದ ವಸಂತ ಭಂಡಾರಿ, ಕಂದಾಯ ಇಲಾಖೆ ಸಿಬ್ಬಂದಿ ಬಿ.ಎಲ್‌ ದಾಸರ್‌ ಪಾಲ್ಗೊಂಡಿದ್ದರು.