ಕಾರವಾರ: ತಾಯಿ-ಮಗಳು-ಮೊಮ್ಮಗನ ಶವ ನದಿಯಲ್ಲಿ ಪತ್ತೆ, ನಾಮಕರಣದ ದಿನದಂದೇ 11 ತಿಂಗಳ ಮಗುವಿನ ದುರ್ಮರಣ!

ಕಾರವಾರ: ಮನೆಯಿಂದ ಕಾಣೆಯಾಗಿದ್ದ ತಾಯಿ, ಮಗಳು ಹಾಗೂ ಮೊಮ್ಮಗನ ಶವಗಳು ಹಿತ್ಲಳ್ಳಿ ಸಮೀಪದ ಶಾಲ್ಮಲಾ ನದಿಯಲ್ಲಿ ತೇಲುತ್ತಿರುವ ಸ್ಥಿತಿಯಲ್ಲಿ ಭಾನುವಾರ ಪತ್ತೆಯಾಗಿರುವ ಘಟನೆ ನಡೆದಿದೆ. ಮೃತರನ್ನು ಹಿತ್ಲಳ್ಳಿ ಸಮೀಪದ ಕಲಕೊಡ್ಲಿನ ರಾಜೇಶ್ವರಿ ನಾರಾಯಣ ಹೆಗಡೆ (55), ಇವರ ಮಗಳು ವಾಣಿ ಪ್ರಕಾಶ ವೈ. (28) ಹಾಗೂ ಇವರ ಹನ್ನೊಂದು ತಿಂಗಳ ಗಂಡು ಮಗು ಎಂದು ಗುರುತಿಸಲಾಗಿದೆ.

ಈ ಮೂವರೂ ಶುಕ್ರವಾರ(20) ಮನೆಯಿಂದ ಯಲ್ಲಾಪುರಕ್ಕೆ ಹೋಗಿ ಬರುತ್ತೇವೆ ಎಂದು ಹೊರಟವರು ನಾಪತ್ತೆಯಾಗಿದ್ದರು. ಆದರೆ ಒಂದು ದಿನವಾದರು ಮನೆಗೆ ಬಾರದ ಹಿನ್ನೆಲೆ ಮನೆಯವರು ಎಲ್ಲಾ ಕಡೆ ಹುಡಕಾಟ ಆರಂಭಿಸಿದರು. ಕುಟುಂಬದವರ ಮನೆಗೆ ತೆರಳಿ ವಿಚಾರಿಸಿದರು. ಆದರೆ ಅವರ ಬಗ್ಗೆ ಸುಳಿವು ಪತ್ತೆಯಾಗಿರಲಿಲ್ಲ.

ಈ ಹಿನ್ನೆಲೆ ಈ ಕುರಿತು ಕುಟುಂಬಸ್ಥರು ಪೊಲೀಸರಿಗೆ ದೂರು ನೀಡಲು ಭಾನುವಾರ ಯಲ್ಲಾಪುರ ಪೊಲೀಸ್‌ ಠಾಣೆಗೆ ತೆರಳಿದ್ದಾರೆ. ಇದೇ ವೇಳೆಗೆ ಹಿತ್ಲಳ್ಳಿ ಸಮೀಪದ ಶಾಲ್ಮಲಾದಲ್ಲಿ ಮೃತದೇಹ ಪತ್ತೆಯಾಗಿದೆ. ಇನ್ನು ಶವವನ್ನು ಮನೆಯವರು ಗುರುತಿಸಿದ ಹಿನ್ನೆಲೆ ಮರಣೋತ್ತರ ಪರೀಕ್ಷಗೆ ಶವವನ್ನು ಕೊಂಡೊಯ್ಯಲಾಯ್ತು.

ಭೂ ಹಕ್ಕಿಗಾಗಿ ಬೃಹತ್‌ ಜಾಥಾ ನಾಳೆ

ಹೆಸರಿಡುವ ಮುಂಚೆ ಮಗು ಸಾವು
ವಾಣಿಯವರ ಗಂಡನ ಮನೆ ಶಿವಮೊಗ್ಗದಲ್ಲಿದೆ. ಅವರ ಮಗುವಿಗೆ ನಾಮಕರಣ ಕಾರ್ಯಕ್ರಮವನ್ನು ಭಾನುವಾರ ನಿಗದಿ ಮಾಡಲಾಗಿತ್ತು. ಆದರೆ ಹೆಸರಿಡುವ ಮೊದಲೇ ಮಗುವಿನ ಉಸಿರು ನಿಂತುಹೋಗಿದೆ. ಯಲ್ಲಾಪುರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದು, ಆತ್ಮಹತ್ಯೆಯೋ, ಕೊಲೆಯೋ ಎಂಬ ಕುರಿತು ತನಿಖೆ ಆರಂಭವಾಗಿದೆ.