ಅಭಿವೃದ್ಧಿ ಇನ್ನೂ ಆಗಬೇಕ್ರಿ

ಶಿರಸಿ :ಮೂರು ದಶಕಗಳ ಹಿಂದೆ ರಾಜ್ಯಮಟ್ಟದ ರಣಜಿ ಟ್ರೋಫಿ ಕ್ರಿಕೆಟ್‌ ಪಂದ್ಯವೇ ತುರುಸಿನಿಂದ ನಡೆದಿದ್ದ ವಿಶಾಲವಾದ ಕ್ರೀಡಾಂಗಣ ಶಿರಸಿ ನಗರದಲ್ಲಿದೆ. ಆದರೆ, ನಿರೀಕ್ಷಿತ ಮಟ್ಟದಲ್ಲಿ ಅದರ ಅಭಿವೃದ್ಧಿಯಾಗದೇ ಸೊರಗುತ್ತಿದ್ದಂತೆ ಭಾಸವಾಗುತ್ತದೆ.
ನಗರದ ಹುಬ್ಬಳ್ಳಿ ರಸ್ತೆ ಪಕ್ಕದಲ್ಲಿ, ಕಾಲೇಜುಗಳ ಸಮುಚ್ಚಯದ ಸಮೀಪದಲ್ಲಿ ಈ ಕ್ರೀಡಾಂಗಣವಿದ್ದು ಶ್ರೀಮಾರಿಕಾಂಬಾ ಜಿಲ್ಲಾ ಕ್ರೀಡಾಂಗಣವೆಂದು ನಾಮಕರಣಗೊಂಡಿದೆ. ಜಿಲ್ಲಾ ಮಟ್ಟದ ಸಕಲ ಸೌಲಭ್ಯಗಳನ್ನು ಕಲ್ಪಿಸಿ ಸುಸಜ್ಜಿತ ಕ್ರೀಡಾಂಗಣವಾಗಿ ಮಾರ್ಪಡಿಸುವ ಎಲ್ಲ ಅವಕಾಶಗಳೂ ಇಲ್ಲಿವೆ.

ಪ್ರಸ್ತುತ ಮಳೆಗಾಲದ ಅವಧಿಯಲ್ಲಿ ಶಿಕ್ಷ ಣ ಇಲಾಖೆಯ ವೇಳಾಪಟ್ಟಿಯ ಸರಣಿಯಂತೆ ಇಲ್ಲಿಯೂ ಶಾಲಾಕಾಲೇಜುಗಳ ಅನೇಕ ಕ್ರೀಡಾಕೂಟಗಳು ಇಲ್ಲಿಯೂ ನಡೆಯುತ್ತಿವೆ. ಉಳಿದೆಡೆಗಳಷ್ಟು ಜಾಸ್ತಿ ಅಲ್ಲದಿದ್ದರೂ ಇಲ್ಲಿಯೂ ಅಲ್ಲಲ್ಲಿ ನಿಂತ ನೀರಿನ ಮಧ್ಯೆಯೇ ಆಟೋಟ ಸ್ಪರ್ಧೆಗಳು ನಡೆಯುತ್ತಿರುತ್ತವೆ. ವಿದ್ಯಾರ್ಥಿಗಳಿಗೆ ಆತಂಕವೂ ಇದ್ದೇಇದೆ.

ಟ್ರ್ಯಾಕ್‌ ಕೊರತೆ :

ಕ್ರೀಡಾಂಗಣದ ಡ್ರೈನೇಜ್‌ ವ್ಯವಸ್ಥೆ ಇನ್ನಷ್ಟು ವ್ಯವಸ್ಥಿತಗೊಳಿಸಬೇಕು, ಆಟೋಟ ಸ್ಪರ್ಧೆಗಳಿಗೆ ತೊಂದರೆತೊಡಕು ಆಗದಂತೆ ಗಟ್ಟಿಯಾದ ಟ್ರ್ಯಾಕ್‌ಗಳ ನಿರ್ಮಾಣವಾಗಬೇಕು ಎನ್ನುವುದು ಈ ಸ್ಟೇಡಿಯಮ್‌ನ ಬಹುಮುಖ್ಯ ಬೇಡಿಕೆಯಾಗಿದೆ.

ಸಿಂಥೆಟಿಕ್‌ ಟ್ರ್ಯಾಕ್‌ ಆಗಬೇಕೆಂಬ ಆಗ್ರಹವಿದ್ದರೂ ಅದರ ನಿರ್ಮಾಣ ಮತ್ತು ನಿರ್ವಹಣೆ ಕಷ್ಟಕರವೆಂಬ ಅಭಿಪ್ರಾಯವಿದ್ದು ಸಾದಾ ಟ್ರ್ಯಾಕ್‌ನ್ನೇ ಕೂಡಲೇ ಬಲಗೊಳಿಸಬೇಕು ಎನ್ನುವ ಒತ್ತಾಯದ ಮಾತುಗಳು ಆಗಾಗ ವ್ಯಕ್ತವಾಗುತ್ತಲೇ ಇವೆ.

ಇರುವ ಸೌಲಭ್ಯಗಳು :

ಈ ಸ್ಟೇಡಿಯಂಗೆ ವ್ಯವಸ್ಥಿತ ಪೆವಿಲಿಯನ್‌, ವೃತ್ತಾಕಾರದಲ್ಲಿ ಸಿಮೆಂಟ್‌ ಮೆಟ್ಟಿಲುಗಳು, ಒಳಗಡೆ ಜಿಮ್‌, ಶೌಚಖಾನೆಗಳು ಮತ್ತಿತರ ಸೌಲಭ್ಯಗಳು ತಕ್ಕಮಟ್ಟಿಗೆ ಇವೆ. ಕ್ರೀಡಾಂಗಣದ ಪಕ್ಕದಲ್ಲಿಯೇ ಮೂರು ಕೋಟಿರೂ. ವೆಚ್ಚದಲ್ಲಿ ಈಜುಕೊಳ ನಿರ್ಮಾಣವಾಗುತ್ತಿದೆ.