ಧೂಳುಮಯ ಮುಖ್ಯ ರಸ್ತೆ

ದಾಂಡೇಲಿ: ನಗರದ ಪ್ರಮುಖ ರಸ್ತೆಗಳಲ್ಲಿ ಒಂದಾದ ಜೆ.ಎನ್‌. ರಸ್ತೆಯು ಸಂಪೂರ್ಣ ಹದಗೆಟ್ಟಿದ್ದು ಧೂಳುಮಯವಾಗಿದೆ. ಕಳಪೆ ಕಾಮಗಾರಿಯಿಂದಾಗಿ ರಸ್ತೆಯು ಹೊಂಡಮಯವಾಗಿದೆ. ಹೊಂಡಮಯ ರಸ್ತೆಯಿಂದಾಗಿ ದಿನನಿತ್ಯ ಬೈಕ್‌ ಸವಾರರು ಸ್ಕಿಡ್‌ ಆಗಿ ಬೀಳುವುದಲ್ಲದೇ ಅಪಘಾತಕ್ಕೆ ಎಡೆಮಾಡಿಕೊಟ್ಟಂತಾಗಿದೆ. ದಿನನಿತ್ಯ ಇದೇ ರಸ್ತೆಯಲ್ಲಿ ಸಾವಿರಾರು ವಾಹನಗಳು ಓಡಾಡುತ್ತವೆ. ಬಸ್‌ ಅಥವಾ ಲಾರಿಯಂತಹ ದೊಡ್ಡ ವಾಹನ ಒಮ್ಮೆ ಹಾದು ಹೋದರೆ ರಸ್ತೆ ಧೂಳಿನಿಂದ ಕಾಣದಂತಾಗುತ್ತದೆ. ಪಾದಚಾರಿಗಳಂತೂ ಮೂಗು ಮುಚ್ಚಿಕೊಂಡೇ ಸಾಗಬೇಕಾಗಿದೇ. ಧೂಳೆದ್ದಿರುವ ಈ ರಸ್ತೆಯಿಂದಾಗಿ ರಸ್ತೆ ಬದಿಯಲ್ಲಿರುವ ಅಂಗಡಿಕಾರರಿಗೆ ಹೆಚ್ಚಿನ ಸಮಸ್ಯೆ ಉಂಟಾಗುತ್ತಿದೆ. ಈ ಬಗ್ಗೆ ನಗರಸಭೆ ಅಥವಾ ಲೋಕೋಪಯೋಗಿ ಇಲಾಖೆಗಳು ಗಮನ ಹರಿಸಿಲ್ಲ.

ರಸ್ತೆಯನ್ನು ದುರಸ್ತಿ ಮಾಡಿದರೂ, ತುರಾತುರಿಯಲ್ಲಿ ಮಾಡಿ ಸಮರ್ಪಕವಾಗಿ ಕಾಮಗಾರಿ ಮಾಡುವುದಿಲ್ಲ ಎಂದು ಸಾರ್ವಜನಿಕರು ದೂರುತ್ತಾರೆ. ಈ ರಸ್ತೆ ಯಾವಾಗ ನವೀಕರಣಗೊಳ್ಳುವುದೋ ಕಾದು ನೊಡಬೇಕಾಗಿದೆ.