ಯಾಣ ಸಂರಕ್ಷಿತ ಪ್ರದೇಶವಾಗಿಸಲು ಪ್ರಯತ್ನ: ಅನಂತ ಹೆಗಡೆ ಆಶೀಸರ

ಕಾರವಾರ: ಉತ್ತರಕನ್ನಡ ಜಿಲ್ಲೆಯ ಪ್ರವಾಸಿ ಸ್ಥಳಗಳಲ್ಲಿ ಒಂದಾಗಿರುವ ಕುಮಟಾದ ಯಾಣಕ್ಕೆ ಜೀವ ವೈವಿಧ್ಯ ಸಂರಕ್ಷಿತ ಪ್ರದೇಶ ಎಂಬ ಮಾನ್ಯತೆ ನೀಡುವ ಬಗ್ಗೆ ಪ್ರಯತ್ನ ನಡೆಸಲಾಗಿದೆ ಎಂದು ರಾಜ್ಯ ಜೀವ ವೈವಿಧ್ಯ ಮಂಡಳಿ ಅಧ್ಯಕ್ಷ ಅನಂತ ಹೆಗಡೆ ಅಶೀಸರ ತಿಳಿಸಿದರು.

ಕಾರವಾರದ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಅಧಿಕಾರಿಗಳ ಸಭೆ ನಡೆಸಿ ಶುಕ್ರವಾರ ಅವರು ಮಾತನಾಡಿದರು. ಮಲೆನಾಡಿನ ರೈತರ ತೋಟಗಳಿಗೆ ಮಂಗನ ಹಾವಳಿಯಿಂದ ಉಂಟಾಗುವ ನಷ್ಟ ಭರಿಸಲು ಸರಕಾರದ ಹಂತದಲ್ಲಿಕ್ರಮವಾಗಬೇಕಿದೆ. ಗದ್ದೆ ಹಾಗೂ ತೋಟಗಳಿಗೆ ನಿಗದಿತ ಕ್ರಿಮಿನಾಶಕ ಹಾಗೂ ರಸಗೊಬ್ಬರ ಬಳಕೆಗೆ ಕೃಷಿ ಇಲಾಖೆ ಮುಂದಾಗಬೇಕಿದೆ ಎಂದರು.

ಗೋಕರ್ಣ ಸಾಣಿಕಟ್ಟಾದ ಉಪ್ಪಿನ ಉತ್ಪಾದನೆಗೆ ವಿಶೇಷ ಮಾನ್ಯತೆ ನೀಡುವ ಬಗ್ಗೆ ಕ್ರಮವಾಗಬೇಕಿದ್ದು, ಆ ನಿಟ್ಟಿನಲ್ಲಿ ಪ್ರಯತ್ನ ನಡೆಸಲಾಗುವುದು ಎಂದು ಹೇಳಿದರು.

ಕಾರವಾರ ಅಂಕೋಲಾ ನಡುವಿನ ಗುಡ್ಡವನ್ನು ಹಸಿರು ವಲಯ ಎಂದು ಘೋಷಿಸಿ, ಇದ್ದ ಪರಿಸರ ಕಾಪಾಡುವ ಕುರಿತು ಕ್ರಮವಾಗಬೇಕಿದೆ. ಕುಮಟಾದ ಕಗ್ಗ ಭತ್ತಕ್ಕೆ ಜಿಯೋ ಟ್ಯಾಗಿಂಗ್‌ ನೀಡುವ ಬಗ್ಗೆ ಕ್ರಮ ವಹಿಸುವಂತೆ ಅಧಿಕಾರಿಗಳಿಗೆ ಈಗಾಗಲೇ ಸೂಚಿಸಲಾಗಿದೆ. ಶೀಘ್ರದಲ್ಲಿ ಅದು ದೊರೆಯುವ ವಿಶ್ವಾಸ ವ್ಯಕ್ತಪಡಿಸಿದರು.

ಮಂಡಳಿ ಸದಸ್ಯ ಪ್ರಕಾಶ ಮೇಸ್ತ, ಅಪರ ಜಿಲ್ಲಾಧಿಕಾರಿ ಕೃಷ್ಣಮೂರ್ತಿ ಎಚ್‌.ಕೆ. ಸಾಮಾಜಿಕ ಅರಣ್ಯ ವಿಭಾಗದ ಡಿಎಫ್‌ಒ ಉದಯ ನಾಯ್ಕ ಉಪಸ್ಥಿತರಿದ್ದರು.