ನದಿ ತೀರದಲ್ಲಿ ಸ್ಫೋಟಕ ಪತ್ತೆ

ಕಾರವಾರ/ಗೋಕರ್ಣ : ಗೋಕರ್ಣದ ಗಂಗಾವಳಿ ನದಿ ತೀರದಲ್ಲಿ ನೌಕಾಪಡೆಯ ಜಲಾಂತರ್ಗಾಮಿಯಲ್ಲಿ ಬಳಸುವ ಸ್ಫೋಟಕವೊಂದು ಶುಕ್ರವಾರ ಪತ್ತೆಯಾಗಿದೆ. ಪೊಲೀಸರ ವಶದಲ್ಲಿದ್ದ ಸ್ಫೋಟಕವನ್ನು ನೌಕಾಪಡೆಯವರು ಮರಳಿ ಕೊಂಡೊಯ್ದಿದ್ದಾರೆ.

ಗಂಗಾವಳಿ ನದಿಯಲ್ಲಿ ತೇಲಿಕೊಂಡು ಬಂದಿದ್ದ ಸ್ಫೋಟಕವನ್ನು ಸ್ಥಳೀಯರು ಗಮನಿಸಿ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಸುರಕ್ಷತೆಯ ದೃಷ್ಟಿಯಿಂದ ಪೊಲೀಸರು ಈ ವಸ್ತುವನ್ನು ಮರಳಿನಲ್ಲಿ ಹೂತಿಟ್ಟು ನೌಕಾಪಡೆಯವರಿಗೆ ವಿಷಯ ತಿಳಿಸಿದ್ದರು. ಕಾರವಾರದ ಕದಂಬ ನೌಕಾನೆಲೆಯ ಅಧಿಕಾರಿಗಳು ಆಗಮಿಸಿ ವಶಕ್ಕೆ ಪಡೆದುಕೊಂಡಿದ್ದಾರೆ.

ಏನಿದು ಸ್ಫೋಟಕ? : ಜಲಾಂತರ್ಗಾಮಿಗಳು ನೀರಿನ ಆಳದಲ್ಲಿ ಸಂಚರಿಸುವ ವೇಳೆ ಗುರುತು ಪತ್ತೆಯ ಸಲುವಾಗಿ ಈ ಸ್ಫೋಟಕಗಳನ್ನು ಬಳಸಲಾಗುತ್ತದೆ. ಇವು ಕೇವಲ ಭಾರಿ ಪ್ರಮಾಣದ ಬೆಳಕನ್ನು ಮಾತ್ರ ಹೊರಸೂಸುತ್ತವೆ.

ಇತ್ತೀಚೆಗೆ ಭಟ್ಕಳ ಸಮೀಪದ ನೇತ್ರಾಣಿಯಲ್ಲಿ ಇಂಡೋ-ಫ್ರಾನ್ಸ್‌ ಸಮರಾಭ್ಯಾಸದಲ್ಲಿ ಜಲಾಂತರ್ಗಾಮಿ ನೌಕೆಗಳನ್ನು ಬಳಸಲಾಗಿತ್ತು. ಈ ವೇಳೆ ಉಪಯೋಗಕ್ಕೆ ಇರಿಸಿದ್ದ ಸ್ಫೋಟಕ ನೀರಿನಲ್ಲಿ ತೇಲಿಕೊಂಡು ಬಂದಿರುವ ಸಾಧ್ಯತೆ ಇದೆ ಎಂದು ಗೋಕರ್ಣ ಪಿಎಸ್‌ಐ ಸಂತೋಷಕುಮಾರ ತಿಳಿಸಿದರು.