ಫ್ಯಾಮಿಲಿ ಪ್ಲ್ಯಾನಿಂಗ್‌ ಯೋಜನೆ ಆಯೋಜನೆ

ಧಾರವಾಡ : ಹೆರಿಗೆ ವೇಳೆ ಮಹಿಳೆಯ ಮರಣ ಪ್ರಮಾಣ ಇಳಿಸುವ ಜತೆಗೆ ಸರಕಾರದ ಆರೋಗ್ಯ ಸೇವೆ ಜನರಿಗೆ ಮುಟ್ಟಿಸುವ ನಿಟ್ಟಿನಲ್ಲಿ ಫ್ಯಾಮಿಲಿ ಪ್ಲ್ಯಾನಿಂಗ್‌ - 2020 ಎಂಬ ಯೋಜನೆ ಹಾಕಿಕೊಳ್ಳಲಾಗಿದೆ ಎಂದು ಫ್ಯಾಮಿಲಿ ಪ್ಲ್ಯಾನಿಂಗ್‌ ಅಸೋಸಿಯೇಶನ್‌ ಆಫ್‌ ಇಂಡಿಯಾ ಧಾರವಾಡ ಶಾಖೆ ಅಧ್ಯಕ್ಷೆ ಡಾ.ರತ್ನಮಾಲಾ ದೇಸಾಯಿ ಹೇಳಿದರು.

ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಪ್ರತಿಯೊಬ್ಬ ವ್ಯಕ್ತಿ ಮಕ್ಕಳನ್ನು ಪಡೆಯುವ ಹಕ್ಕು ಹೊಂದಿದ್ದಾರೆ. ಇದಕ್ಕೆ ಪೂರಕವಾಗಿ ಈ ಯೋಜನೆ ಹಮ್ಮಿಕೊಳ್ಳಲಾಗಿದೆ ಎಂದು ತಿಳಿಸಿದರು.

ರಾಷ್ಟ್ರೀಯ ಕುಟುಂಬ ಆರೋಗ್ಯ ಸಮೀಕ್ಷೆ-4 ವರದಿಯ ಪ್ರಕಾರ ಸುಮಾರು 45ರಷ್ಟು ಯುವ ಮಹಿಳೆಯರು ನಾನಾ ಆರೋಗ್ಯ ಸೇವೆಗಳಿಂದ ವಂಚಿತವಾಗುತ್ತಿದ್ದಾರೆ. ಸಾಕಷ್ಟು ವಿವಾಹಿತ ಹಾಗೂ ಅವಿವಾಹಿತ ಯುವ ಜನರಿಗೆ ಗರ್ಭನಿರೋಧಕ (ಜನನದ ಅಂತರದ ಸಾಧನಗಳಾಗಿರಬಹುದು ಅಥವಾ ಗರ್ಭಧಾರಣೆ ತಡೆಯುವ ಸಾಧನಗಳಾಗಿರಬಹುದು) ಸೇವೆಗಳು ಸಿಗಲು ಅಡೆ-ತಡೆಗಳು ಉಂಟಾಗುತ್ತಿವೆ ಎಂದು ಅಧ್ಯಯನಗಳು ತಿಳಿಸಿವೆ ಎಂದರು.

ಯುವ ಜನತೆ ದೇಶದ ಶಕ್ತಿಯಾಗಿದ್ದು, ಅವರಿಗೆ ಲೈಂಗಿಕ ಶಿಕ್ಷ ಣ ಕುರಿತು ಸರಿಯಾದ ಮಾರ್ಗದರ್ಶನ ನೀಡಬೇಕು. ಇಲ್ಲವಾದಲ್ಲಿ ದೇಶದ ಭದ್ರತೆಗೆ ಧಕ್ಕೆ ಉಂಟಾಗಲಿದೆ. ಲೈಂಗಿಕತೆ ಕುರಿತು ಪಾಲಕರು ಮತ್ತು ವಿದ್ಯಾರ್ಥಿಗಳಲ್ಲಿ ತಪ್ಪು ಕಲ್ಪನೆ ಇದೆ. ಶಾಲಾ- ಕಾಲೇಜುಗಳಲ್ಲಿ ಲೈಂಗಿಕ ಶಿಕ್ಷ ಣದ ಬಗ್ಗೆ ತಿಳಿವಳಿಕೆ ನೀಡಿ ಸರಿಯಾದ ಮಾರ್ಗದರ್ಶನ ಮಾಡಬೇಕು ಎಂದು ಹೇಳಿದರು.