ಗೋಕರ್ಣ ರಸ್ತೆ ಸಂಪೂರ್ಣ ಜಲಾವೃತ

ಗೋಕರ್ಣ : ಶುಕ್ರವಾರ ಸುರಿದ ಭಾರಿ ಮಳೆಗೆ ಗೋಕರ್ಣ ರಸ್ತೆ ಸಂಪೂರ್ಣ ಜಲಾವೃತವಾಗಿದ್ದು, ಸ್ಥಳೀಯರು, ಪ್ರವಾಸಿಗರು ಪರದಾಡುವಂತಾಯಿತು. ಮುಖ್ಯರಸ್ತೆಯ ರಥಬೀದಿಯ ರಸ್ತೆ ಸಂಪೂರ್ಣ ನದಿಯಾಗಿ ಮಾರ್ಪಟ್ಟಿತ್ತು. ಜನರು ಹರಸಾಹಸ ಮಾಡಿ ದಾಟಲು ಯತ್ನಿಸಿದರು.

ಹಲವರು ಕಾಲು ಜಾರುವುದರಿಂದ ಹೇಗೂ ತಪ್ಪಿಸಿಕೊಂಡು ಬದಿಗೆ ಬಂದರು. ದ್ವಿಚಕ್ರವಾಹನ ಸವಾರರು ನೀರಿನ ಮಧ್ಯದಲ್ಲಿ ಸಿಕ್ಕಿಹಾಕಿಕೊಂಡು ವಾಹನ ತೆಗೆಯಲು ಹರಸಾಹಸ ಪಟ್ಟರು. ಪ್ರತಿ ವರ್ಷ ಈ ಸಮಸ್ಯೆ ಪುನರಾವರ್ತನೆಯಾಗುತ್ತಿದ್ದು, ಈ ಸಮಸ್ಯೆ ಬಗ್ಗೆ ಸ್ಥಳೀಯ ಆಡಳಿತವಾಗಲಿ, ಯಾವುದೇ ಕ್ರಮ ತೆಗೆದುಕೊಳ್ಳದಿರುವುದಕ್ಕೆ ಸ್ಥಳೀಯರು ಹಿಡಿ ಶಾಪ ಹಾಕುತ್ತಿದ್ದಾರೆ.

ಪ್ರತಿ ವರ್ಷ ಹೂಳು ಎತ್ತುವ ಕೆಲಸವನ್ನಾದರೂ ಗ್ರಾಮ ಪಂಚಾಯಿತಿ ಮಾಡುತ್ತಿತ್ತು, ಆದರೆ ಈ ವರ್ಷ ಮಾಡದಿರುವುದರಿಂದ ಸ್ವಲ್ಪ ಪ್ರಮಾಣದಲ್ಲಿ ಬರುತ್ತಿದ್ದ ನೀರು ಈ ವರ್ಷ ಪ್ರವಾಹದ ರೀತಿ ರಸ್ತೆಯಲ್ಲಿ ಹರಿಯಿತು. ಇದಲ್ಲದೆ ಇಲ್ಲಿನ ಅಂಗಡಿಗಳಿಗೆ ಸಹ ನೀರು ನುಗ್ಗಿದೆ.

ರಥಬೀದಿ ದೇವಾಲಯದ ಪ್ರದೇಶವೂ ಜಲಮಯ : ಮಹಾಬಲೇಶ್ವರ ದೇವಾಲಯದ ಪಕ್ಕ ಮಹಾಗಣಪತಿ ದೇವಾಲಯದ ಎದುರು ಸಹ ನೀರು ತುಂಬಿತ್ತು. ಇದರಂತೆ ರಥಬೀದಿ ಹಾಗೂ ಮೇಲಿನಕೇರಿಯ ರಸ್ತೆಯಲ್ಲಿ ಹೊಲಸು ರಾಡಿ, ಪ್ಲಾಸ್ಟಿಕ್‌ ತ್ಯಾಜ್ಯಗಳ ರಾಶಿಯೊಂದಿಗೆ ಸಂಪೂರ್ಣ ಜಲಮಯವಾಯಿತು.

ಪುರಾಣ ಪ್ರಸಿದ್ಧ ಕ್ಷೇತ್ರದಲ್ಲಿ ಸಮಸ್ಯೆಗಳ ಆಗರವಾಗಿದ್ದು, ಸ್ಥಳೀಯರು ಈ ಬಗ್ಗೆ ಅದೆಷ್ಟೂ ಬಾರಿ ಮನವಿ ಸಲ್ಲಿಸಿದರೂ ಕ್ರಮ ಕೈಗೊಳ್ಳದ ಕಾರಣ ರೋಸಿ ಹೋಗಿದ್ದಾರೆ. ಈ ಬಗ್ಗೆ ಜಿಲ್ಲಾಡಳಿತ ತಕ್ಷ ಣ ಕಾರ್ಯಪ್ರವೃತ್ತರಾಗಬೇಕು, ಇಲ್ಲವಾದರೆ ರಾಜ್ಯ ಸರಕಾರ ಅಥವಾ ಕೇಂದ್ರ ಸರಕಾರವಾದರೂ ಗೋಕರ್ಣವನ್ನು ಅಭಿವೃದ್ದಿ ಪಡಿಸಲು ಮುಂದಾಗಬೇಕೆಂದು ಒತ್ತಾಯಿಸಿದ್ದಾರೆ.