ಸಂತೋಷದ ಜೀವನ ನಡೆಸಿ

ದಾಂಡೇಲಿ : ಭೂಮಿ, ಮಳೆ, ನೀರು ಮತ್ತು ಆಹಾರವನ್ನು ಆ ಭಗವಂತ ನಮಗೆ ನೀಡಿದ್ದಾನೆ. ಪ್ರಕೃತಿಯಿಂದ ಪ್ರತಿಯೊಂದು ಸೌಲಭ್ಯವನ್ನು ಪಡೆದ ನಾವು ಭಾಗ್ಯವಂತರು ಎಂದು ಅರಿತು ಪ್ರತಿಕ್ಷ ಣದಲ್ಲ್ಲೂ ಸಂತೋಷದ ಜೀವನ ನಡೆಸುವದನ್ನು ಕಲಿಯಬೇಕು ಎಂದು ವಿಜಯಪುರದ ಜ್ಞಾನ ಯೋಗಾಶ್ರಮದ ಶ್ರೀ ಸಿದ್ದೇಶ್ವರ ಸ್ವಾಮೀಜಿ ಹೇಳಿದರು.

ನಗರದ ಶ್ರೀ ವೀರಭದ್ರೇಶ್ವರ ದೇವಸ್ಥಾನದ ಸಭಾಗಂಣದಲ್ಲಿ ಏರ್ಪಡಿಸಲಾದ ಸತ್ಸಂಗ ಕಾರ್ಯಕ್ರಮದಲ್ಲಿ ಅವರು ಆಶೀರ್ವಚನ ನೀಡಿದರು. ಸತ್ಸಂಗದ ಮೂಲಗುರಿ ಮೂರು ಮಾತು ಅರಿತು ಕೊಳ್ಳುವದಾಗಿದೆ. ಅವು ಯಾವುವೆಂದರೆ ಪ್ರಕೃತಿಯಿಂದ ಮನುಕುಲಕ್ಕೆ ದೊರೆತಿರುವ ಅನ್ನ, ನೀರು, ಸತ್ಸಂಗ ಇವುಗಳನ್ನು ಪಡೆದು ಸಂತೃಪ್ತರಾಗಿ, ಬಲ್ಲವರ ಮಾತು ಕೇಳಿ ಈ ಲೋಕದಲ್ಲಿ ಬಾಳುವದಾಗಿದೆ. ಇದನ್ನು ಅರಿತು ಬಾಳಿದರೆ ಈ ಭೂಲೋಕವೇ ಸ್ವರ್ಗವೆಂದು ಅವರು ತಿಳಿಸಿದರು.

ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಹಂಚನಾಳ, ಈಚಲಕರಂಜಿಯ ಭಕ್ತಿಯೋಗಾಶ್ರಮದ ಶ್ರೀ ಮಹೇಶಾನಂದ ಸ್ವಾಮೀಜಿ ಮಾತನಾಡಿ ಇಂದು ಪ್ರತಿಯೊಂದು ಮನೆಯಲ್ಲಿ ಮಕ್ಕಳಿಗೆ ಉತ್ತಮ ಸಂಸ್ಕಾರದ ಅವಶ್ಯಕತೆ ಇದೆ. ಮನಸ್ಸನ್ನು ಸ್ವಚ್ಛವಾಗಿ ಇಟ್ಟುಕೊಂಡು, ತಂದೆ ತಾಯಿಗೆ ಗೌರವ ನೀಡಿ ಬದುಕಲು ಸತ್ಸಂಗದ ಮೂಲಕ ಶರಣರ ಮಾತು ಆಲಿಸಬೇಕು ಎಂದರು.

ಉಳವಿಯ ಶ್ರೀ ಚೆನ್ನಬಸವೇಶ್ವರ ದೇವಸ್ಥಾನದ ಶಂಕರಯ್ಯ ಕಲ್ಮಠ ಶಾಸ್ತ್ರೀಗಳನ್ನು, ಮೃಂತುಜಯ ಮಠದ ಶಿವಪುತ್ರಯ್ಯಾ ಹಿರೇಮಠ, ನಗರದ ವೀರಭದ್ರೇಶ್ವರ ದೇವಸ್ಥಾನದ ಉದಯ ಬಸಯ್ಯಾ ಹಿರೇಮಠ ಸ್ವಾಮಿಗಳನ್ನು ಮತ್ತು ಮಾಜಿ ಶಾಸಕ ಸುನಿಲ ಹೆಗಡೆ ಇವರನ್ನು ಸನ್ಮಾನಿಸಲಾಯಿತು.

ಮಾನಸಾ ವಾಸರೆ ಪ್ರಾರ್ಥಿಸಿದರು. ಯು.ಎಸ್‌ ಪಾಟೀಲ್‌ ಸ್ವಾಗತಿಸಿದರು. ಹನುಮಂತ ಕುಂಬಾರ ನಿರೂಪಿಸಿದರು. ಗುರು ಮಠಪತಿ ವಂದಿಸಿದರು.