ಮನೆ ಹಾನಿ: ಪರಿಹಾರ ಧನ ವಿತರಣೆ

ಯಲ್ಲಾಪುರ : ಪ್ರಸಕ್ತ ಸಾಲಿನಲ್ಲಿ ಕಳೆದ ಕೆಲವು ದಿನಗಳ ಹಿಂದೆ, ತಾಲೂಕಿನ ವಿವಿಧ ಪಂಚಾಯಿತಿ ವ್ಯಾಪ್ತಿಗಳಲ್ಲಿ ಅಕಾಲಿಕ ಮಳೆ ಹಾಗೂ ಗಾಳಿಯಿಂದಾಗಿ ವಾಸದ ಮನೆಗಳು ಹಾನಿಯಾಗಿದ್ದವು. ಮನೆ ಹಾನಿಗೊಳಗಾದ ಸಂತ್ರಸ್ಥರಿಗೆ ತಹಸೀಲ್ದಾರ್‌ ಶಂಕರ್‌ ಜಿ.ಎಸ್‌. ಅವರು ಬುಧವಾರ ತುರ್ತು ಪರಿಹಾರ ಧನ ವಿತರಿಸಿದರು. ಒಟ್ಟು 10 ಜನರಿಗೆ 2,24,775 ರೂ.ಗಳ ಪರಿಹಾರ ಧನವನ್ನು ಈ ಸಂದರ್ಭದಲ್ಲಿ ವಿತರಿಸಲಾಯಿತು.

ತಾಲೂಕಿನ ಹುಣಸಗೇರಿ ಕಿರವತ್ತಿಯ ಹನುಮಂತ ಮಿರಾಶಿ, ಕಿರವತ್ತಿಯ ಶಿವಾಜಿ ರಾಮಾ ಮಿರಾಶಿ, ಬೈಲಂದೂರಿನ ಸುಮತಿ ಚವ್ಹಾಣ, ಗೇರಾಳದ ವಿಲಾಸಿ ಬಿಕ್ಕು ಪಾರ್ಕರ್‌, ಜನಶೆಟ್ಟಿಕೊಪ್ಪದ ದಯಾ ಸಿರೀಲ್‌ ಸಿದ್ದಿ, ಜನಶೆಟ್ಟಿಕೊಪ್ಪದ ಮಂಗಲಾ ಮಂಜುನಾಥ ಸಿದ್ದಿ, ಬೈಲಂದೂರಿನ ಸೋಮಲಿಂಗ ಪುನ್ನಪ್ಪಾ ಸೋಮಾಪುರಕರ್‌, ಗುಡಂದೂರಿನ ರವಳಪ್ಪಾ ಧಾರವಾಡಕರ್‌, ಗುಡಂದೂರಿನ ಭರತ್‌ ಮಹಾಬಲೇಶ್ವರ ಧಾರವಾಡಕರ್‌, ಹುಣಸಗೇರಿಯ ಅನಸೂಯಾ ಸೋಮಾಪುರಕರ್‌ ಅವರಿಗೆ ಪರಿಹಾರ ಧನವನ್ನು ವಿತರಿಸಲಾಯಿತು.

ತಹಸೀಲ್ದಾರ್‌ ಶಂಕರ್‌ ಜಿ.ಎಸ್‌. ಮಾತನಾಡಿ, ಅಕಾಲಿಕ ಮಳೆ ಹಾಗೂ ಗಾಳಿಯಿಂದ ಹಾನಿಗೊಳಗಾದ ಮನೆಗಳಿಗೆ ಜಿಲ್ಲಾಧಿಕಾರಿಯವರ ಆದೇಶದಂತೆ ಪರಿಹಾರ ಧನ ವಿತರಿಸಲಾಗಿದೆ. ಮನೆ ಕುಸಿತ ಹಾಗೂ ಭಾಗಶಃ ಹಾನಿಗೊಳಗಾದ ಮನೆಗಳನ್ನು ಪರಿಶೀಲಿಸಿ ಕಂದಾಯ ಅಧಿಕಾರಿಗಳ ವರದಿ ಪಡೆದು, ಪರಿಹಾರ ಧನವನ್ನು ಆರ್‌.ಟಿ.ಜಿ.ಎಸ್‌. ಮೂಲಕ ತಲುಪಿಸಲಾಗಿದೆ ಎಂದರು.