ಐಪಿಎಲ್‌ ಕ್ರಿಕೆಟ್‌ ಬೆಟ್ಟಿಂಗ್‌: ಯುವಕನ ಬಂಧನ

ಹಳಿಯಾಳ : ಐಪಿಎಲ್‌ ಕ್ರಿಕೆಟ್‌ ಬೆಟ್ಟಿಂಗ್‌ನಲ್ಲಿ ತೊಡಗಿದ್ದ ಯುವಕನೊಬ್ಬನನ್ನು ಹಳಿಯಾಳ ಪೊಲೀಸರು ಮಂಗಳವಾರ ರಾತ್ರಿ ಬಂಧಿಸಿದ್ದು, ಆತನಿಂದ ಸಾವಿರಾರು ರೂಪಾಯಿ ನಗದು ಮತ್ತು ಎರಡು ಮೊಬೈಲ್‌ ಸೆಟ್‌ಗಳನ್ನು ವಶಕ್ಕೆ ಪಡೆದಿದ್ದಾರೆ.

ಪಟ್ಟಣದ ಮೊಹ್ಮದಅರೀಪ್‌ ಅಬ್ದುಲ್‌ರಶೀದ್‌ ಮುಗದ ಬಂಧಿತ ಯುವಕ. ಇಲ್ಲಿಯ ಯಲ್ಲಾಪೂರ ನಾಕಾ ಪ್ರದೇಶದಲ್ಲಿ ಐಪಿಎಲ್‌ ಕ್ರಿಕೆಟ್‌ ಬೆಟ್ಟಿಂಗ್‌ ಜೂಜಾಟದಲ್ಲಿ ನಿರತನಾಗಿದ್ದ ವೇಳೆ ಖಚಿತ ಮಾಹಿತಿ ಮೇರೆಗೆ ಹಠಾತ್‌ ದಾಳಿ ನಡೆಸಿದ ಪೊಲೀಸರು ಆತನನ್ನು ಬಂಧಿಸಿದ್ದಾರೆ. ಆತನಿಂದ 99150 ರೂ. ನಗದು ಮತ್ತು ಅದಕ್ಕಾಗಿ ಬಳಸಲಾದ ಎರಡು ಮೊಬೈಲ್‌ ಸೆಟ್‌ ಹಾಗೂ ಹಣ ಸಂಗ್ರಹಿಸಲು ಬಳಸಲಾದ ಬ್ಯಾಗ್‌ ವಶ ಪಡಿಸಿಕೊಂಡಿದ್ದಾರೆ.

ಪಿಎಸೈ ಆನಂದ ಮೂರ್ತಿ ಸಿ, ಸಿಬ್ಬಂದಿಗಳಾದ ಬಸವರಾಜ ವಾಲಿಶೆಟ್ಟರ್‌, ಪರಶುರಾಮ ನಾಗರಾಳ ಮತ್ತು ದುರ್ಗಪ್ಪಾ ಮೂಲಿಮನಿ ದಾಳಿಯಲ್ಲಿ ಭಾಗವಹಿಸಿದ್ದರು. ಎಸೈಐ ಆನಂದು ಪಾವಸ್ಕರ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.