ಬಾಂಡಿಸಿಟ್ಟಾ ರಸ್ತೆಯಲ್ಲಿ ಮೊಣಕಾಲುದ್ದ ನೀರು

ಕಾರವಾರ : ಕಳೆದ ಐದು ದಿನಗಳಿಂದ ಗ್ರಾಮೀಣ ಭಾಗದ ಜನರನ್ನು ಬೀದಿಪಾಲು ಮಾಡಿದ ಜಲ ಪ್ರವಾಹ ಶುಕ್ರವಾರ ನಗರ ಪ್ರದೇಶದಲ್ಲಿ ಆವರಿಸಿಕೊಂಡಿದೆ. ನಗರದ ಬಾಂಡಿಸಿಟ್ಟಾ ರಸ್ತೆಯಲ್ಲಿ ಮೊಣಕಾಲಿನಷ್ಟು ನೀರು ತುಂಬಿಕೊಂಡಿದ್ದು, ಜನರನ್ನು ಆತಂಕಕ್ಕೆ ಎಡೆ ಮಾಡಿದೆ.

ಕದ್ರಾ ಜಲಾಶಯದಿಂದ ಸತತ ಹೊರ ಬಿಡುತ್ತಿರುವ ನೀರಿನಿಂದಾಗಿ ಕಾಳಿ ನದಿ ಉಕ್ಕಿ ಹರಿದು ತೀರದ ಪ್ರದೇಶ ಜಲಾವೃತಗೊಂಡಿವೆ. ಕಳೆದ ಐದು ದಿನಗಳಿಂದ ತಾಲೂಕಿನ ಗ್ರಾಮೀಣ ಪ್ರದೇಶದ ಜನರು ನೆರೆಯಿಂದಾಗಿ ಸಂಕಷ್ಟದಲ್ಲಿ ಸಿಲುಕಿಕೊಂಡಿದ್ದಾರೆ. ಆದರೆ ನಗರಭಾಗದಲ್ಲಿ ಪ್ರವಾಹದ ಯಾವುದೇ ಪರಿಣಾಮ ಬೀರಲಿಲ್ಲ ಎಂದು ನಿಟ್ಟುಸಿರು ಬಿಟ್ಟ ನಗರದ ಜನರಿಗೆ ದುಗುಡ ಶುರುವಾಗಿದೆ.

ನಗರದ ತಗ್ಗು ಪ್ರದೇಶವಾಗಿರುವ ಬಾಂಡಿಸಿಟ್ಟಾದಲ್ಲಿ ನೀರು ಆವರಿಸುತ್ತಿದ್ದು, ಶುಕ್ರವಾರ ಸಂಜೆಗೆ ಬಾಂಡಿಸಿಟ್ಟಾ ರಸ್ತೆಯಿಂದ ದ್ವಿಚಕ್ರ ಮತ್ತು ಲಘು ವಾಹನಗಳ ಸಂಚಾರಕ್ಕೆ ಸಮಸ್ಯೆ ಎದುರಾಯಿತು. ಪೊಲೀಸರು ಸ್ಥಕ್ಕೆ ಆಗಮಿಸಿ ಈ ರಸ್ತೆಯಿಂದ ಸಂಚಾರವನ್ನು ಸ್ಥಗಿತಗೊಳಿಸಿದರಲ್ಲದೇ ರಸ್ತೆ ಪಕ್ಕದ ಅಂಗಡಿಗಳಗೆ ಆದಷ್ಟು ಬೇಗನೆ ಅಂಗಡಿಯ ವಸ್ತುಗಳನ್ನು ನೆಲದಿಂದ ಸ್ವಲ್ಪ ಎತ್ತರದಲ್ಲಿಡುವಂತೆ ಸೂಚಿಸಿದರು.