ಅನಂತಕುಮಾರ ಹಗಲುಗನಸು ಕಾಣುವುದನ್ನು ಬಿಡಲಿ

ಅಂಕೋಲಾ : ಅನಂತ ಕುಮಾರ ಗೆಲ್ಲುತ್ತೇನೆಂದು ಹಗಲುಗನಸು ಕಾಣುವುದನ್ನು ಬಿಟ್ಟು ದೇವರಲ್ಲಿ ಮಾಡಿಕೊಂಡಿರುವ ಹರಕೆಗಳನ್ನು ತೀರಿಸಿ ಇನ್ನೂ ಮುಂದಾದರೂ ಜನರ ಮಧ್ಯೆ ಇರಲಿ ಎಂದು ಉ.ಕ. ಲೋಕಸಭಾ ಕ್ಷೇತ್ರದ ಜೆಡಿಎಸ್‌ ಮತ್ತು ಕಾಂಗ್ರೆಸ್‌ ಪಕ್ಷ ದ ಮೈತ್ರಿ ಅಭ್ಯರ್ಥಿ ಆನಂದ ಅಸ್ನೋಟಿಕರ ಹೇಳಿದರು.

ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ದೇವೇಗೌಡರ ಅಣತಿಯಂತೆ ದೇಶದ ಗದ್ದುಗೆಯನ್ನು ಹಿಡಿಯುವವರು ನಿರ್ಧಾರವಾಗುತ್ತಾರೆ. ಮೋದಿ ಮತ್ತೊಮ್ಮೆ ಪ್ರಧಾನಿ ಪಟ್ಟ ಏರಲು ಸಾಧ್ಯವಿಲ್ಲ. ದೇಶದ ಜನ ಈ ಸರಕಾರವನ್ನು ಕಿತ್ತೊಗೆದು ಮೈತ್ರಿ ಸರಕಾರಕ್ಕೆ ಸಂಪೂರ್ಣ ಬೆಂಬಲ ನೀಡುತ್ತಾರೆ.

ರಾಜ್ಯದಲ್ಲಿಯೂ ಜೆಡಿಎಸ್‌ ಮತ್ತು ಕಾಂಗ್ರೆಸ್‌ ಸಮ್ಮಿಶ್ರ ಸರಕಾರ ಐದು ವರ್ಷ ಪೂರ್ಣಗೊಳಿಸಲಿದೆ. ಈ ಸರಕಾರಕ್ಕೆ ಯಾವುದೇ ಗಂಡಾಂತರವಿಲ್ಲ. ಇದು ಸುಭದ್ರವಾಗಿದೆ. ಉತ್ತರ ಕನ್ನಡ ಜನತೆ ನನಗೆ ಸಂಪೂರ್ಣ ಬೆಂಬಲ ನೀಡಿದರೆ ಈ ಭಾಗದ ಜ್ವಲಂತ ಸಮಸ್ಯೆಗಳ ಪಟ್ಟಿ ನನ್ನಲ್ಲಿದೆ. ನಾನು ಸಂಸದನಾಗಿ ಆಯ್ಕೆಯಾದ ಬಳಿಕ ಆ ಸಮಸ್ಯೆಗಳನ್ನು ಕೇಂದ್ರದಲ್ಲಿ ಪ್ರಧಾನಿಯವರ ಎದುರು ನಿಂತು ಹೋರಾಟ ಮಾಡಿ ಬಗೆಹರಿಸುತ್ತೇನೆ ಎಂದರು.

ಜೆಡಿಎಸ್‌ ಪ್ರಮುಖರಾದ ಮೋಹಿನಿ ನಾಯ್ಕ, ರವಿ ನಾಯ್ಕ, ಸಂದೀಪ ಬಂಟ, ಗುರುದಾಸ ಬಾನಾವಾಳಿಕರ, ಗಣಪತಿ ಬಾನಾವಾಳಿಕರ, ಆರ್‌.ಜಿ.ನಾಯ್ಕ, ಎಂ.ಎಚ್‌.ಗೌಡ, ಉಪೇಂದ್ರ ನಾಯ್ಕ ಉಪಸ್ಥಿತರಿದ್ದರು.

ಅನಂತ ಕುಮಾರ ಹೆಗಡೆ ಅವರ 25 ವರ್ಷದ ದುರಾಡಳಿತದಿಂದ ಜನ ಬೇಸತ್ತಿದ್ದಾರೆ. ಈ ಜಿಲ್ಲೆಯ ಜನ ನಮ್ಮ ಕೈಹಿಡಿದು ಗೆಲ್ಲಿಸಲು ಶ್ರಮ ಪಟ್ಟಿದ್ದಾರೆ. ಮೋದಿ ಹೆಸರಿನಲ್ಲಿ ಮತ ಯಾಚಿಸಿದ ಇವರಿಗೆ ಜನ ತಕ್ಕ ಪಾಠ ಕಲಿಸಲಿದ್ದಾರೆ. ಕೊನೆಯ ಪಕ್ಷ ನಾವು ಒಂದು ಮತದಿಂದಾದರೂ ಗೆದ್ದೇ ಗೆಲ್ಲುತ್ತೇವೆ.