ರಾಷ್ಟ್ರೀಯ ಲೋಕ ಅದಾಲತ್‌ ನಾಳೆ

ಕಾರವಾರ: ಜಿಲ್ಲೆಯ ಎಲ್ಲ ನ್ಯಾಯಾಲಯಗಳಲ್ಲಿ ಜು.13ರಂದು ರಾಷ್ಟ್ರೀಯ ಲೋಕ ಅದಾಲತ್‌ ಹಮ್ಮಿಕೊಳ್ಳಲಾಗಿದೆ ಎಂದು ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಟಿ.ಗೋವಿಂದಯ್ಯ ಹೇಳಿದರು.

ಕಾರವಾರದ ವಕೀಲರ ಸಂಘದ ಸಭಾಂಗಣದಲ್ಲಿ ಮಂಗಳವಾರ ನಡೆದ ಲೋಕ ಅದಾಲತ್‌ ಪೂರ್ವಭಾವಿ ಸಭೆಯಲ್ಲಿ ಅವರು ಮಾತನಾಡಿದರು.

ಜಿಲ್ಲೆಯ ವಿವಿಧ ನ್ಯಾಯಾಲಯಗಳಲ್ಲಿ ಬಾಕಿ ಇರುವ ಪ್ರಕರಣಗಳ ಶೀಘ್ರ ವಿಲೇವಾರಿಗಾಗಿ ಜು.13ರಂದು ಲೋಕ ಅದಾಲತ್‌ ಹಮ್ಮಿಕೊಳ್ಳಲಾಗುತ್ತಿದೆ. ಜಿಲ್ಲೆಯಲ್ಲಿ ಒಟ್ಟು 14,514 ಕ್ರಿಮಿನಲ್‌ ಹಾಗೂ 14,062 ಸಿವಿಲ್‌ ಪ್ರಕರಣಗಳು ಬಾಕಿ ಇವೆ. ಲೋಕ ಅದಾಲತ್‌ ಮೂಲಕ ರಾಜಿ ಪಂಚಾಯಿತಿ ನಡೆಸಲಾಗುವುದು. ಜಿಲ್ಲಾ ನ್ಯಾಯಾಲಯದಲ್ಲಿ ಅತಿ ಹೆಚ್ಚು ಪ್ರಕರಣಗಳು ಬಾಕಿ ಇವೆ. ಈ ಹಿನ್ನೆಲೆಯಲ್ಲಿ ಜಿಲ್ಲಾ ನ್ಯಾಯಾಲಯದಲ್ಲಿ ಐದು ಪೀಠ ಸೇರಿದಂತೆ ಜಿಲ್ಲೆಯ ಒಟ್ಟು 29 ಪೀಠಗಳಲ್ಲಿ ಒಂದೇ ಅವಧಿಯಲ್ಲಿ ಲೋಕ ಅದಾಲತ್‌ ನಡೆಯಲಿದೆ ಎಂದರು.

ಲೋಕ ಅದಾಲತ್‌ಗಾಗಿ ಒಟ್ಟು 1950 ಪ್ರಕರಣಗಳನ್ನು ತೆಗೆದುಕೊಳ್ಳಲಾಗಿದೆ. ರಾಜಿಯಾಗಬಹುದಾದಕ್ರಿಮಿನಲ್‌ ಪ್ರಕರಣಗಳು, 320ರಷ್ಟು ಚೆಕ್‌ ಬೌನ್ಸ್‌ ಪ್ರಕರಣಗಳು, 364 ಬ್ಯಾಂಕ್‌ ರಿಕವರಿ ಪ್ರಕರಣಗಳು 410 ವಾಹನ ಅಪಘಾತ ಪ್ರಕರಣಗಳು, 360 ಇತರೆ ಕ್ರಿಮಿನಲ್‌ ಹಾಗೂ 359 ಸಿವಿಲ್‌ ಪ್ರಕರಣಗಳನ್ನು ಗುರುತಿಸಿ ಸಂಬಂಧಪಟ್ಟವರಿಗೆ ಆಗಮಿಸುವಂತೆ ನೋಟಿಸ್‌ ನೀಡಲಾಗಿದೆ ಎಂದರು.

ಹಿರಿಯ ವಕೀಲ ಆರ್‌.ಎಸ್‌.ಹೆಗಡೆ ಮಾತನಾಡಿ, ಪ್ರತಿ ವಿಭಾಗಕ್ಕೆ ಪ್ರತ್ಯೇಕ ಪೀಠ ಮಾಡಿ ಅದಕ್ಕೆ ಒಬ್ಬ ಹಿರಿಯ ವಕೀಲರನ್ನು ಸಂಧಾನಕಾರರನ್ನಾಗಿ ನೇಮಿಸಿ ಎಂದರು.

ವಕೀಲರ ಸಂಘದ ಅಧ್ಯಕ್ಷ ಚಂದ್ರಶೇಖರ ನಾಯ್ಕ ಮಾತನಾಡಿ, ಲೋಕ ಅದಾಲತ್‌ ಯಶಸ್ಸಿಗೆ ನ್ಯಾಯಾಧೀಶರಿಂದಲೂ ಸಹಕಾರ ಬೇಕು ಎಂದು ಮನವಿ ಮಾಡಿದರು. ನ್ಯಾಯಾಧೀಶರಾದ ಎ.ಎಂ.ರಮೇಶ, ಅಮರನಾಥ ಕೆ.ಕೆ. ವಿವೇಕ ಗ್ರಾಮೋಪಾಧ್ಯೆ, ಕೇಶವ ಕೆ. ಉಪಸ್ಥಿತರಿದ್ದರು.