ಹೋಳಿ ಹಬ್ಬದ ಸುಗ್ಗಿ ಮೇಳಕ್ಕೆ ಇಂದು ತೆರೆ

ಕಾರವಾರ : ಜಿಲ್ಲೆಯ ಕಳೆದ ಒಂದು ವಾರದ ಹಿಂದೆ ಆರಂಭಗೊಂಡ ನಾನಾ ಸಮಾಜಗಳ ಸುಗ್ಗಿಕುಣಿತಕ್ಕೆ ಮಾ.24ಕ್ಕೆ ಪರಸ್ಪರ ಬಣ್ಣ ಹಚ್ಚಿ ಶುಭಾಶಯ ವಿನಿಮಯ ಮಾಡಿ ಕೆರೆ,ನದಿ,ಸಮುದ್ರದಲ್ಲಿ ಪವಿತ್ರ ಸ್ನಾನದೊಂದಿಗೆ ಸಂಪನ್ನಗೊಳ್ಳಲಿದೆ.

ಜಿಲ್ಲೆಯ ವಿಶೇಷವಾಗಿ ಕರಾವಳಿ ಭಾಗದಲ್ಲಿ ಹೋಳಿ ಹಬ್ಬವನ್ನು ಸಾಂಪ್ರದಾಯಿಕ ರೀತಿಯಲ್ಲಿ ವಿಶಿಷ್ಟವಾಗಿ ಆಚರಿಸಲಾಗುತ್ತದೆ. ಕಳೆದ ಒಂದು ವಾರದಿಂದ ವಿವಿಧ ಜನಸಮುದಾಯಗಳಿಗೆ ಸೇರಿದ ವೇಷಧಾರಿಗಳು ಮನೆ ಮನೆಗೂ ತೆರಳಿ ಹಾಡು, ಜನಪದಗೀತೆಗಳನ್ನು ಹಾಡಿ ಜನಮನ ರಂಜಿಸುತ್ತಾರೆ. ರಂಜಿಸಿದಕ್ಕಾಗಿ ವೇಷಧಾರಿಗಳಿಗೆ ಪ್ರತಿ ಮನೆಯವರು ಕಾಯಿ, ಫಲಾವಳಿಯ ಜತೆಗೆ ಸ್ವಲ್ಪ ನಗದು ಹಣ ದಾನವಾಗಿ ನೀಡುವುದು ಸಂಪ್ರದಾಯ.

ಅದರಂತೆ,ಜಿಲ್ಲೆಯ ಕರಾವಳಿ ಭಾಗದಲ್ಲಿ ಈಗ ಗೆಜ್ಜೆಗಳ ಜಲ್ ಜಲ್ ಸದ್ದು ಜೋರಾಗಿದೆ. ನಗರ,ಪಟ್ಟಣ,ಗ್ರಾಮಗಳಲ್ಲಿ ಹೋಳಿ ಹಬ್ಬದ ಸುಗ್ಗಿ ಮೇಳಗಳ ಕುಣಿತದ ದೃಶ್ಯ ಜನರ ಆಕರ್ಷಣೆಗೆ ಒಳಗಾಗಿದೆ. ಕಾರವಾರದಲ್ಲಿ 38 ವರ್ಷಗಳ ಬಳಿಕ ಬಿಣಗಾದ ಗುನಗಿ ಸಮಾಜದವರು ಮೇಳ ಕಟ್ಟಿದ್ದಾರೆ. ಅದೇ ರೀತಿ 20 ವರ್ಷಗಳಿಂದ ಸ್ಥಗಿತವಾಗಿದ್ದ ಅಂಬಿ ಸಮಾಜದ ಮೇಳ 4 ವರ್ಷದಿಂದ ಮತ್ತೆ ನಡೆಯುತ್ತಿದೆ. ಇದಲ್ಲದೇ ಬಣ್ಣದ ಹಬ್ಬ ಹೋಳಿಯ ಸಾಂಪ್ರದಾಯಿಕ ಆಚರಣೆಗಳು ಕಾರವಾರ, ಅಂಕೋಲಾ ಹೊನ್ನಾವರ, ಕುಮಟಾಗಳಲ್ಲಿ ಈಗಾಗಲೇ ಆರಂಭವಾಗಿವೆ. ವಿವಿಧ ವೇಷಭೂಷಣ ತೊಟ್ಟ ವಿವಿಧ ಸಮಾಜಗಳ ಕುಳಾವಿಗಳು ಮಾ.17 ರ ದಶಮಿಯಿಂದ ಸುಗ್ಗಿಮೇಳಕ್ಕೆ ಚಾಲನೆ ನೀಡಿದ್ದಾರೆ. ಮನೆ ಮನೆಗಳಿಗೆ ಜನಪದ ಹಾಡು ಹಾಡಿ ಕೋಲಾಟ ಆಡುತ್ತಿದ್ದಾರೆ.

ಸಾಂಪ್ರದಾಯಿಕ ಆಚರಣೆ: ಹೋಳಿ ಹುಣ್ಣಿಮೆಗೆ 7,9 ದಿನ ಇರುವಾಗ ಮೇಳಗಳು ಶುರುವಾಗುತ್ತವೆ. ಹಾಲಕ್ಕಿ ಗೌಡರು, ಪಡ್ತೆರು, ಅಗೇರರು, ಗುನಗಿ,ಅಂಬಿಗರ ಸಮಾಜದವರು ಮೇಳವನ್ನು ಸಂಘಟಿಸುತ್ತಾರೆ. ದಶಮಿ ದಿನ ಸಮಾಜದ ಮುಖಂಡರ ಮನೆಯಲ್ಲಿ ವಿಶೇಷ ಪೂಜೆ ನೆರವೇರಿಸಿ 10-15 ಜನರು ಕಿರೀಟ ಧರಿಸುತ್ತಾರೆ. ಬಿಗಡೆ, ಹಾರ ತುರಾಯಿ, ಹಣೆಕಟ್ಟು, ಗೆಜ್ಜೆ ತೊಟ್ಟು ವಿಶೇಷ ಬಟ್ಟೆ ತೊಡುತ್ತಾರೆ.

ಸಾಮರಸ್ಯದ ಆಚರಣೆ: ಕೆಲವರು ವೇಷಭೂಷಣ ತೊಟ್ಟು ಯಾರ ಮನೆ ಮುಂದೆ ಹೋಗುವುದಿಲ್ಲ.ಆದರೆ ಹೋಳಿಯ ಮಾರನೇ ದಿನ ಅಂದರೆ ಹುಣ್ಣಿಮೆಯ ಮಧ್ಯರಾತ್ರಿ ಹೋಲಿಕಾ ದಹನದ ನಂತರ ಮನೆ ಮನೆಗೂ ಹೋಗಿ ತಮ್ಮ ಸ್ನೇಹಿತರಿಗೆ ರಂಗುರಂಗಿನ ಬಣ್ಣ ಎರಚಿ ಪರಸ್ಪರ ಶುಭಾಶಯ ಕೋರುತ್ತಾರೆ.