ಪೊಲೀಸರಿಂದ ಶಾಲಾ ವಾಹನ ಪರಿಶೀಲನೆ

ಕುಮಟಾ : ಸಂಚಾರ ನಿಯಮ ಉಲ್ಲಂಘಿಸಿ ಶಾಲೆ ಮಕ್ಕಳನ್ನು ಸಾಗಿಸುವ ಆಟೋ, ಓಮ್ನಿ ಹಾಗೂ ಇತರ ಖಾಸಗಿ ವಾಹನಗಳನ್ನು ಕುಮಟಾ ಪೊಲೀಸರು ಸೋಮವಾರ ಪರಿಶೀಲಿಸಿದರು.

ಕುಮಟಾದ ಗಿಬ್‌ ಸರ್ಕಲ್‌ನ ಕಾನ್ವೆಂಟ್‌ ಎದುರುಗಡೆ ಹಾಗೂ ಪಟ್ಟಣ ವಿವಿಧೆಡೆ ಸಿಪಿಐ ಸಂತೋಷ ಶೆಟ್ಟಿ ಸೂಚನೆ ಮೇರೆಗೆ ಪಿಎಸ್‌ಐ ಸಂಪತ್‌ಕುಮಾರ ನೇತೃತ್ವದ ತಂಡ ತಪಾಸಣೆ ನಡೆಸಿತು. ಮಿತಿಮೀರಿ ಮಕ್ಕಳನ್ನು ಹೇರಿಕೊಂಡು ಹೋಗವ ಆಟೋ, ಓಮ್ನಿ ಹಾಗೂ ಇತರ ಖಾಸಗಿ ವಾಹನಗಳ ಚಾಲಕರಿಗೆ ಹೆಚ್ಚುವರಿಯಾಗಿ ಸೀಟ್‌ಗಳನ್ನು ವಾಹನದಲ್ಲಿ ಹಾಕದಂತೆ ಎಚ್ಚರಿಕೆ ನೀಡಲಾಯಿತು. ಆಟೋಗಳಲ್ಲಿ ವಿಶೇಷವಾಗಿ ಶಾಲಾ ಮಕ್ಕಳನ್ನು ಮಿತಿಗಿಂತ ಹೆಚ್ಚು ಹೇರಿಕೊಂಡು ಹೋಗುವುದರಿಂದ ಅಪಘಾತ ಸಂಭವಿಸುವ ಹಿನ್ನೆಲೆಯಲ್ಲಿ ಪೊಲೀಸ್‌ ಕಾರ್ಯಾಚರಣೆ ಅತಿ ಸೂಕ್ತವಾದದ್ದು. ಅಲ್ಲದೇ ಸಾರಿಗೆ ಇಲಾಖೆ ನಿಯಮಾನುಸಾರ ಮಕ್ಕಳನ್ನು ಸಾಗಿಸಬೇಕು. ಸರಕು ಸಾಗಣೆ ಮಾಡುವ ವಾಹನಗಳಲ್ಲಿ ಮಕ್ಕಳನ್ನು ಸಾಗಿಸಬಾರದು. ಇಂತಹ ನಿಯಮಗಳನ್ನು ಉಲ್ಲಂಘಿಸುವ ಚಾಲಕರ ವಿರುದ್ಧ ಪ್ರಕರಣ ದಾಖಲಿಸಿ, ದಂಡ ವಿಧಿಸಲಾಗುವುದು ಎಂದು ಚಾಲಕರಿಗೆ ಎಚ್ಚರಿಸಿದರು. ಹತ್ತಕ್ಕೂ ಹೆಚ್ಚು ವಾಹನಗಳಿಗೆ ದಂಡ ವಿಧಿಸಲಾಯಿತು. ಇನ್ನು ಕೆಲವು ವಾಹನ ಚಾಲಕರಿಗೆ ಎಚ್ಚರಿಕೆ ನೀಡಿ ಬಿಡಲಾಯಿತು.