ನೋಡಿರಿ, ಥರಾವರಿ ವಿಜ್ಞಾನ ಮಾದರಿ

ಶಿರಸಿ : ಅಲ್ಲಿ ನೂರಾರು ವಿಜ್ಞಾನಿಗಳು ನೆರೆದಿದ್ದರು. ಅವರೆಲ್ಲ ಭವಿಷ್ಯದಲ್ಲಿ ಸಂಶೋಧಿಸಬಲ್ಲ ವಿಜ್ಞಾನ ಮಾದರಿಗಳನ್ನು ಪ್ರದರ್ಶಿಸಿದರು. ಅಷ್ಟೇ ಅಲ್ಲದೇ ವಾಣಿಜ್ಯ, ಕಲಾ ಕೈಚಳಕವನ್ನು ತೋರಿ ನೋಡುಗರ ಹುಬ್ಬೇರಿಸುವಂತೆ ಮಾಡಿದರು.

ನಗರದ ಎಂಇಎಸ್‌ ಶಿಕ್ಷ ಣ ಸಂಸ್ಥೆಯ ಪದವಿ ಪೂರ್ವ ಮಹಾವಿದ್ಯಾಲಯದಲ್ಲಿ ಶನಿವಾರ ಸಂಘಟಿಸಿದ್ದ ವಿವಿಧ ವಸ್ತು ಪ್ರದರ್ಶನ ಇಂತಹ ವಿಶೇಷತೆಗೆ ಕಾರಣವಾಯಿತು. ಹದಿನಾರು ವರ್ಷಗಳಿಂದ ಪ್ರದರ್ಶನ ಏರ್ಪಡಿಸಿ ವಿದ್ಯಾರ್ಥಿಗಳಿಗೆ ವೇದಿಕೆ ಒದಗಿಸಲಾಗುತ್ತಿದೆ. 500ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಕಾಲೇಜಿನ ಸಭಾಭವನ ಸೇರಿದಂತೆ ವಿವಿಧ ಹಾಲ್‌ಗಳಲ್ಲಿ ತಾವು ತಯಾರಿಸಿದ ಮಾದರಿಗಳನ್ನು ಪ್ರದರ್ಶಿಸಿ ಸೈ ಎನಿಸಿಕೊಂಡರು.

ವಿಜ್ಞಾನ ವಿಭಾಗದ ವಿದ್ಯಾರ್ಥಿಗಳು ವೈಜ್ಞಾನಿಕ ಸಂಶೋಧನಾತ್ಮಕ ಮಾದರಿಗಳನ್ನು ರೂಪಿಸಿದ್ದರೆ, ವಾಣಿಜ್ಯ ವಿದ್ಯಾರ್ಥಿಗಳು ವಾಣಿಜ್ಯಾತ್ಮಕ ಅಂಶಗಳಿಗೆ ಒತ್ತು ನೀಡಿದ್ದರು. ಇನ್ನು ಕಲಾ ವಿಭಾಗದ ವಿದ್ಯಾರ್ಥಿಗಳು ಕಲಾ ಕೈಚಳಕ ತೋರಿದ್ದರು. ಸುಮಾರು 150 ಗುಂಪುಗಳಲ್ಲಿ 500ಕ್ಕೂ ಹೆಚ್ಚು ಮಕ್ಕಳು ಭಾಗವಹಿಸಿದ್ದು ವಿಶೇಷವಾಗಿತ್ತು.

ಹೈಡ್ರೋಲಿಕ್‌ ಲಿಫ್ಟ್‌, ಪ್ರಾಣಿಗಳನ್ನು ಓಡಿಸುವ ಸಾಧನ, ನಾಣ್ಯಗಳ ಸಂಗ್ರಹ, ಹಸಿರುಮನೆ, ಹಂಪಿ ಕಲ್ಲಿನ ರಥ, 20ಕ್ಕೂ ಹೆಚ್ಚು ಬಗೆಯ ಔಷಧಿ ಸಸ್ಯ ಸಂಗ್ರಹ ಸೇರಿದಂತೆ ಹತ್ತಾರು ಮಾದರಿಗಳು ಪ್ರದರ್ಶನದಲ್ಲಿ ಗಮನ ಸೆಳೆದವು.

ರೋಡ್‌ ಹಂಪ್‌ನಲ್ಲೇ ವಿದ್ಯುತ್‌ : ವಸ್ತು ಪ್ರದರ್ಶನದಲ್ಲಿ ರೋಡ್‌ಗಳಲ್ಲಿ ಅಳವಡಿಸುವ ಹಂಪ್‌ಗಳಿಂದಲೇ ವಿದ್ಯುತ್‌ ಉತ್ಪಾದನೆ ಮಾಡುವ ಮಾದರಿಯನ್ನು ವಿದ್ಯಾರ್ಥಿನಿಯರಿಬ್ಬರು ಪ್ರದರ್ಶಿಸಿ ಗಮನ ಸೆಳೆದರು. ಹಂಪ್‌ಗಳನ್ನು ರೋಲರ್‌ ಮೂಲಕ ರೂಪಿಸಿ ವಾಹನಗಳು ಹಂಪ್‌ನಲ್ಲಿ ಹಾದು ಹೋದಾಗ ರೋಲರ್‌ ತಿರುಗಿ ವಿದ್ಯುತ್‌ ಉತ್ಪಾದನೆಯಾಗುತ್ತದೆ. ಅದನ್ನು ಬ್ಯಾಟರಿಯಲ್ಲಿ ಸ್ಟೋರ್‌ ಮಾಡಿ ಬೀದಿ ದೀಪಗಳನ್ನು ಬೆಳಗಬಹುದು ಎಂಬುದು ಈ ಮಾದರಿಯ ವಿಶೇಷತೆ.

ಐ ಎಮ್‌ ಸ್ಮಾರ್ಟ್‌ ಡಸ್ಟ್‌ಬಿನ್‌ : ವಿದ್ಯಾರ್ಥಿಗಳು ಪ್ರದರ್ಶಿಸಿದ 'ಒಂದು ಹೆಜ್ಜೆ ಸ್ವಚ್ಛತೆಯ ಕಡೆಗೆ' ಸ್ಮಾರ್ಟ್‌ ಡಸ್ಟ್‌ಬಿನ್‌ ಗಮನ ಸೆಳೆಯಿತು. ಕಸವನ್ನು ಹಾಕಲು ಬಂದಾಗ ಅದಕ್ಕೆ ಅಳವಡಿಸಿದ ಮ್ಯಾಗ್ನೆಟ್‌ಗೆ ಕೈ ಹಿಡಿದಾಗ ಅದು ತೆರೆದುಕೊಳ್ಳುತ್ತದೆ. ಕಸ ಹಾಕಿದ ನಂತರ ಅದು ತನ್ನಿಂದ ತಾನೇ ಮುಚ್ಚಿಕೊಳ್ಳುತ್ತದೆ. ಇದರಿಂದ ಕಸವನ್ನು ಬೇಕಾಬಿಟ್ಟಿಯಾಗಿ ಎಸೆದು ಕಸದ ತೊಟ್ಟಿಗಳು ತುಂಬಿ ಚೆಲ್ಲುವುದು ತಪ್ಪುತ್ತದೆ ಎಂಬುದನ್ನು ಸಾರುವ ಮಾದರಿ ಇದಾಗಿತ್ತು.