ಆರು ವರ್ಷವಾದರೂ ಹಾಸ್ಟೆಲ್‌ ಅಪೂರ್ಣ

ಅಂಕೋಲಾ : ಪದವಿ ಶಿಕ್ಷಣ ಕಲಿಯುತ್ತಿರುವ ವಿದ್ಯಾರ್ಥಿಗಳಿಗೆ ವಸತಿ ಸೌಲಭ್ಯ ಒದಗಿಸುವ ಉದ್ದೇಶದಿಂದ ಸರಕಾರ ಮಂಜೂರಿ ಮಾಡಿದ ಪೂಜಗೇರಿಯ ಸರಕಾರಿ ಪದವಿ ಕಾಲೇಜಿನ ವಸತಿ ನಿಲಯದ ಕಟ್ಟಡ ಕಾಮಗಾರಿ ಅರ್ಧಂಬರ್ಧ ಮುಗಿದು ನನೆಗುದಿಗೆ ಬಿದ್ದಿದೆ.

ಸರಕಾರ ನೀಡಿದ 92.86 ಲಕ್ಷ ರೂ. ಹಣ ಪಾವತಿಯಾದರೂ, ಕಾಮಗಾರಿಯನ್ನು ಪೂರ್ಣಗೊಳಿಸದ ಲ್ಯಾಂಡ್‌ಆರ್ಮಿ ಬೋರ್ಡ್‌ನ ವೈಖರಿ ವಿದ್ಯಾರ್ಥಿಗಳು ಹಾಗೂ ಪಾಲಕರ ಆಕ್ರೋಶಕ್ಕೆ ಕಾರಣವಾಗಿದೆ.

6 ವರ್ಷದಿಂದ ನನೆಗುದಿಗೆ : 2013-14ರಲ್ಲಿಪದವಿ ಶಿಕ್ಷಣ ಇಲಾಖೆ ತಾಲೂಕಿನ ಪೂಜಗೇರಿಯಲ್ಲಿವಿದ್ಯಾರ್ಥಿ ವಸತಿ ನಿಲಯ ಸ್ಥಾಪಿಸಲು 92.86 ಲಕ್ಷ ರೂ.ಗೆ ಆಡಳಿತಾತ್ಮಕ ಅನುಮೋದನೆ ನೀಡಿತ್ತು. ಆದರೆ ಆ ಹಣವೆಲ್ಲವೂ ಲ್ಯಾಂಡ್‌ಆರ್ಮಿ (ರೂರಲ್‌ ಇನ್‌ಫ್ರಾಸ್ಟ್ರಕ್ಚರ್‌ ಕಂಪನಿ)ಗೆ ಪಾವತಿಯಾದರೂ ಕಾಮಗಾರಿ ಮಾತ್ರ ನನೆಗುದಿಗೆ ಬಿದ್ದಿದ್ದು, ಗ್ರಾಮೀಣ ಪ್ರದೇಶದಿಂದ ಈ ಕಾಲೇಜಿಗೆ ಬರುವ ವಿದ್ಯಾರ್ಥಿಗಳು ತೊಂದರೆ ಅನುಭವಿಸುವಂತಾಗಿದೆ.

ಹೆಚ್ಚಿನ ಅನುದಾನ ನೀಡಿ : ಕಾಮಗಾರಿಗಳನ್ನು ಗುತ್ತಿಗೆ ನೀಡುವಾಗ ಕೆಲಸದ ರೀತಿ ನೋಡಿ ನಿಗದಿ ಪಡಿಸಿ ಗುತ್ತಿಗೆ ನೀಡುತ್ತಾರೆ. ಅಂತೆಯೇ ಈ ಹಾಸ್ಟೆಲ್‌ ಕಾಮಗಾರಿಗೆ 92.86 ಲಕ್ಷ ರೂ. ಮಾತ್ರ ಆಡಳಿತಾತ್ಮಕ ಅನುಮೋದನೆ ನೀಡಲಾಗಿದೆ. ಹಣ ಪಾವತಿಯಲ್ಲಿವಿಳಂಬವಾಗಿದ್ದು, ಸಾಮಗ್ರಿಗಳ ದರದಲ್ಲಿಹೆಚ್ಚಳವಾಗಿ ಈ ಕಾಮಗಾರಿ ಪೂರ್ಣಗೊಳಿಸಲು ಇನ್ನೂ 21 ಲಕ್ಷ ರೂ. ಅನುದಾನ ಅವಶ್ಯವಿದೆ. ನೀಡಿದರೆ 3 ತಿಂಗಳೊಳಗೆ ಈ ಕಟ್ಟಡವನ್ನು ಕಾಲೇಜಿಗೆ ಹಸ್ತಾಂತರಿಸುತ್ತೇವೆ ಎನ್ನುತ್ತಾರೆ ಲ್ಯಾಂಡ್‌ ಆರ್ಮಿ ಬೋರ್ಡ್‌ನವರು.

ಇದ್ದ ಸ್ಥಿತಿಯಲ್ಲೇ ಹಸ್ತಾಂತರಿಸಿಕೊಳ್ಳಿ : ವಿದ್ಯಾರ್ಥಿ ವಸತಿನಿಲಯದ ಕಾಮಗಾರಿ 92.86 ಲಕ್ಷ ರೂ. ವೆಚ್ಚದ ಕಾಮಗಾರಿ ಮುಗಿದಿದೆ. ಇನ್ನೂ ಹೆಚ್ಚಿನ ಅನುದಾನ ನೀಡದಿದ್ದರೆ, ಈ ವಸತಿನಿಲಯವನ್ನು ಇದ್ದ ಸ್ಥಿತಿಯಲ್ಲಿಯೇ ಹಸ್ತಾಂತರಿಸಿಕೊಳ್ಳಿ ಎಂದು ಶಿಕ್ಷಣ ಇಲಾಖೆಗೆ ತಿಳಿಸಿದ್ದಾರೆ ಲ್ಯಾಂಡ್‌ ಆರ್ಮಿಯವರು.

ಯಾವ ಕೆಲಸಕ್ಕೆ ಎಷ್ಟು ಅವಧಿ ಎನ್ನುವುದನ್ನು ಸರಕಾರ ನಿಗದಿ ಪಡಿಸಿಯೇ ಭೂಸೇನಾ ನಿಗಮದವರಿಗೆ ಕಾಮಗಾರಿ ನೀಡಿರುತ್ತದೆ. ಕಟ್ಟಡ ಕಾಮಗಾರಿಗೆ ಒಂದು ವರ್ಷದ ಗಡುವು ಇದ್ದು, 2013-14ರಲ್ಲಿಮಂಜೂರಿಯಾದ ಕಾಮಗಾರಿ 6 ವರ್ಷದ ಅವಧಿ ತೆಗೆದುಕೊಂಡರೂ ಪೂರ್ಣಗೊಳಿಸಿಲ್ಲ. ಸರಕಾರದ ಹಣವನ್ನು ಪೋಲು ಮಾಡುತ್ತಿದ್ದರೂ ಯಾವ ಅಧಿಕಾರಿಗಳೂ ಪ್ರಶ್ನಿಸಿಲ್ಲ.